Кондак 1

Избранный святителю и предивный угодниче Христов, Господа и люди своя всем сердцем возлюбивый, душу свою за овцы своя положивый, за мучители своя Господу моливыйся, священномучениче Иосифе, крепкое града Астрахани ограждение. Похвальная восписуем ти, к раце мощей твоих притекающе, ты же, яко имеяй дерзновение ко Господу, от всяких бед нас свободи зовущих: Радуйся, священномучениче Иосифе, верный Астраханския земли страже.

Икос 1

Ангелов Творец и Господь во дни великих бед и напастей, обышедших отечество наше, восхотев людем страждущим утешение даровати, яви тя, святителю Иосифе, человеком наставника, от юности и до мученической смерти возлюбившаго божественное учение. Сего ради тебе, на небеси и на земли прославленному, вопием сице: Радуйся, яко Бога истиннаго Отца нашего из детска познавый; Радуйся, от юности путь мирскаго жития оставивый. Радуйся, чистоту сердца твоего до конца сохранивый; Радуйся, осмилетним от мятежных людей во главу ударенный. Радуйся, от удара того, даже до смерти, главою своею трясенный; Радуйся, рассуждения даром почтенный. Радуйся, образом жития твоего и нам путь к небеси показавый; Радуйся, всю жизнь свою Господеви предавый. Радуйся, коемуждо во благо усердно служивый. Радуйся, священномучениче Иосифе, верный Астраханския земли страже.

Кондак 2

Видя Благопромыслитель Господь души твоея доброту, направи твой помысл ко исканию единаго на потребу. Ты же, сего возжелав, еще от юности навыкл взывати Богу: Аллилуиа.

Икос 2

Разум Божественный имый, всю суету привременныя жизни презрел еси, святителю Иосифе; тем же оставив мир и вся яже в нем, измлада приял еси образ ангельский, всего себе отдав на служение Господу и ближним твоим, даже до смерти. Таковое убо изволение твое восхваляюще, глаголем ти сицевая: Радуйся, яко путь правый в Царствие Небесное обрел еси; Радуйся, яко сим путем невозвратно шел еси. Радуйся, мучение и смерть мужественно приявый; Радуйся, душу свою положивый за овцы своя. Радуйся, молитвенниче ко Господу наш непрестанный; Радуйся, волею своею от беззаконных в жертву принесенный. Радуйся, града Астрахани и отечества нашего святый покровителю; Радуйся, от творящих беззаконие и зло уклонивыйся. Радуйся, путь незлобия спасительнаго взыскавый; Радуйся, священномучениче Иосифе, верный Астраханския земли страже.

Кондак 3

Силою Божиею укрепляем, священномучениче Иосифе, вся послушания добре проходил еси во обители Троицкия и святительскаго сана достигнув, от беззаконных мучителей свержения со стены града претерпел еси, жизнь свою страданьми за правду увенчав, преселился еси в небесныя обители, идеже предстоя Престолу Святыя Троицы, поеши: Аллилуиа.

Икос 3

Имея помысл чист и душу непорочну, священства благодать достойно восприял еси, святителю Иосифе; темже во игумена обители избран е был и саном архимандрита почтен, ревностно подвизался о спасении Богом врученного тебе словеснаго стада. Сего ради вопием ти: Радуйся, яко вся послушания иноческая неленостно прошел еси; Радуйся, яко сим на высоту добродетелей возшел еси. Радуйся, иночествующих мудрый наставниче; Радуйся, всех благочестному житию научающий. Радуйся, отечество земное молитвами своими не оставляющий; Радуйся, и по смерти твоей всем, с верою к тебе притекающим, благодать источающий. Радуйся, и святыми мощами твоими с нами пребывающий; Радуйся, от святых мощей твоих исцеления подавающий. Радуйся, путь из тьмы греховной к невечернему свету освещающий; Радуйся, священномучениче Иосифе, верный Астраханския земли страже.

Кондак 4

Бури злословия и людскаго мятежа не убоялся еси, святителю Иосифе, егда укры в доме своем люди беззащитныя, увещая бо беззаконных престати от зла, не проливати крови, но в покаянии обратитися ко Господу, взывая Ему: Аллилуиа.

Икос 4

Слыша и видя премногую твою добродетель, блаженный Никон патриарх святителя тя нарече и паству Астраханскую смотрению твоему вручи. Мы же, о сем веселящеся, глаголем ти сицевая: Радуйся, вся степени иноческаго звания с честию и славою прошедый; Радуйся, на престоле святительстем достойно возседый. Радуйся, страже Церкви Христовы неустрашимый; Радуйся, делателю винограда Христова неутомимый. Радуйся, о невежествиих людских печальниче; Радуйся, благовременне и безвременне паству твою поучавый. Радуйся, овцы заблудшия ко Христу призвавый; Радуйся, люди во тьме сидящия светом Христовым озаривый. Радуйся, сим от погибели их сохранивый; Радуйся, священномучениче Иосифе, верный Астраханския земли страже.

Кондак 5

Бурями житейскими искушаем, не убоялся еси, святителю, стати противу беззаконных, чашу бо страданий за правду испив, со стены града низвержен был еси и, кровию своею землю обагрив, непрестанно взывал Богу: Аллилуиа.

Икос 5

Видя нестроения во граде Астрахани и скорбию о сем объят, покоя не познал еси, святителю Иосифе, Господь же даде знамение с небеси о мученической кончине твоей, еяже не убоявся, священномученик был еси, и с благочестием к тебе прибегающим помощник в бедах и болезнех явился еси, вопиющим с любовию тебе таковая: Радуйся, непрестанными молитвами сердце твое освятивый; Радуйся, очеса твоя к небу всегда, возводивый. Радуйся, славу небесную паче всего возлюбивый; Радуйся, во единем Бозе сладость жития полагати всегда вразумляяй. Радуйся, добрый воине Христов и проповедниче спасения; Радуйся, сердца наша в единомыслии и любве ко отечеству нашему направляяй. Радуйся, устами твоими премудрость глаголивый; Радуйся, светильниче Церкви Христовы, во тьме века сего возсиявый. Радуйся, люди добродетели всегда научаяй; Радуйся, священномучениче Иосифе, верный Астраханския земли страже.

Кондак 6

Проповедник смирения и ревнитель благочестия словом и житием твоим был еси, святителю Иосифе, возлюбив бо Христа, не устрашился еси мучений и, хулы прияв за мирныя люди, яже в доме твоем укры, воспел еси Господеви песнь победную: Аллилуиа.

Икос 6

Возсиял еси во стране Астраханстей и Терстей светом Христова учения и ревностию твоею о славе Божией, святителю богоблаженне, ты бо красоту Господню возлюбив, о устроении храмов святых и благочинии церковнем всеусердно прилежал еси. Сего ради вопием ти сице: Радуйся, славы Христовы ревнителю; Радуйся, храмов святых строителю. Радуйся, благочиния церковнаго строгий охранителю; Радуйся, тобою бо церковь Астраханская благоукрасися. Радуйся, яко в ней вера Христова утвердися; Радуйся, града Астрахани славо и украшение. Радуйся, всем нам защита и ограждение; Радуйся, Господа и люди своя до конца возлюбивый. Радуйся, душу за други своя положивый; Радуйся, священномучениче Иосифе, верный Астраханския земли страже.

Кондак 7

Хотя на путь правый покаянием люди наставити, возстающим на тя дерзновенно глаголал еси: “Престаните убо от зол ваших и милость и прощение обрящите”, — они же глуси быша словеси твоему, распыхахуся на тя и Мирона Богобоязненна, глаголюща им о святости сана твоего, умертвиша, ты же, святе Иосифе, все упование на Бога возлагая, воспевал: Аллилуиа.

Икос 7

Новаго тя молитвенника и чудотворца предивна яви Господь стране Российстей и граду Астрахани, святителю Иосифе убиенне. Взем бо меч духовный — слово Божие, беззаконныя от Божественнаго писания увещал еси правый путь покаяния обрести в истинном от грехов отвращении. Сего ради усердно зовем ти: Радуйся, рабе Господень верный; Радуйся, угодниче Его нелицемерный. Радуйся, на камени заповедей Господних утвержденный; Радуйся, беззаконными на муки огнем вещественным осужденный. Радуйся, руками беззаконных заушенный; Радуйся, связанный по рукама и ногама, на огни опаленный. Радуйся, от злых людей убиенный; Радуйся, душею на небо восхищенный. Радуйся, об отечестве нашем печальниче нелицемерный; Радуйся, священномучениче Иосифе, верный Астраханский земли страже.

Кондак 8

Странно бе видети страже нощней небо отверсто и огнь, на град ниспадающий. Ты же, святе Иосифе, слыша о сем, горько плакася в келии своей глаголя: “Излияся с небеси фиал гнева Божия”. Таковаго гнева избави нас, Господи, молитвами священномученика Иосифа, Богу воспевающих: Аллилуиа.

Икос 8

Весь исполнь любве Христовы, душу твою за овцы твоя положити готов был еси, священномучениче, не иский своя, подвигом добрым подвизался еси, блаженне, обидимых защищая, печальных утешая, невинно убиенных благословляя, продерзных и злых с кротостию обличая и вразумляя. Ныне же светло радуешися, идеже правда и мир, и радость о Господе нашем. Сего ради чтим святую память твою и усердно вопием ти: Радуйся, святителю благосердный, о спасении многих поревновавый; Радуйся, не своих си, но ближняго искавый. Радуйся, страже неусыпный, от волков хищных овцы твоя охранявый; Радуйся, сирых защитниче и обидимых предстателю. Радуйся, яко и ныне во всяких нуждах скоро нам помогаеши; Радуйся, заступниче наш неусыпный. Радуйся, и к раце мощей твоих с верою притекающих милостивно утешаеши; Радуйся, яко в райских обителех ныне пребываеши. Радуйся, града Астрахани святый покровителю; Радуйся, священномучениче Иосифе, верный Астраханския земли страже.

Кондак 9

Вся помыслы к Богу возводил еси, святителю Иосифе, егда огнем бо жегом был еси и на смерть ведомый, очи твоя горе имел еси, моляся, яко первомученик Христов Стефан: “Господи, не помяни им греха сего”. Мы же, воспоминающе сия, вопием Богу: Аллилуиа.

Икос 9

Витийство человеческое не может по достоянию восхвалити тя, вечныя славы достойнаго, священномучениче Иосифе; в ризах бо святительских вшел еси в нечестивых соборище и дерзновенно, яко пророк Божий, глаголал еси: “Почто звасте мене? Оставите упорство ваше и злобу!” Они же, яко звери дивии, жаждуще крови твоея, скрежетаху на тя зубы своими, предати смерти хотя. Мы же в похвалу тебе сице глаголем: Радуйся, священномучениче, яко в тебе вселися сила Христова; Радуйся, яко и власяница твоя честная, на недужныя полагаемая, дарует им исцеление. Радуйся, яко и гроб твой святый с верою приходящим явися неоскудной врачебницей; Радуйся, силою Христовою чудеса содевающий. Радуйся, милостию Божиею немым уста отверзающий; Радуйся, в сонии и видении помощь твою являющий. Радуйся, расслабленным даровавый укрепление; Радуйся, бесноватых от насилия диавольскаго освобождение. Радуйся, врачу безмездный, туне врачевание всем подающий; Радуйся, священномучениче Иосифе, верный Астраханския земли страже.

Кондак 10

Спасение вечное унаследовал еси, святителю Иосифе, яко звезда пресветлая, возсиял еси во граде Астрахани, идеже родился еси, и за верность Богу мученическую смерть приял еси. Мы же, чтуще страдания твоя, зовем ти: “Святителю Иосифе убиенне, моли Христа Бога, да избавит нас вечныя муки, вопиющих Ему: Аллилуиа”.

Икос 10

Царя Небеснаго, Господа Иисуса, кротости подражая, добрыми делы зло побеждал еси, богоблаженне Иосифе. Сам бо ризы своя совлекл еси пред беззаконными и, во власянице (суконной одежде) пред ними представ, на мучения веден был еси. Таковое незлобие твое зряще, сице тебе вопием: Радуйся, священномучениче, огнем на земли опаленный, пламени вечнаго избавленный; Радуйся, ум и сердце твое посреде огненнаго мучения ко Господу устремивший. Радуйся, подобно отроком Вавилонским, во огни палимый, взывал еси: “Боже, благословен еси”; Радуйся, со онеми отроки и всеми святыми ликовствуеши ныне во Царствии Небеснем. Радуйся, кроткому Иисусу поревновавый; Радуйся, Того благодатию незлобие стяжавый. Радуйся, землю бо кротких наследовавый; Радуйся, смирения ради Самим Господом возвеличенный. Радуйся, незлобию и любви нас научающий; Радуйся, священномучениче Иосифе, верный Астраханския земли страже.

Кондак 11

Пение немолчное совершая у святей раце мощей твоих, святителю Иосифе, покаяния молитвы за безумие отцов наших приносим, слезно глаголя: “Господи, даруй им прощение молитвами священномученика Твоего”, да всегда прославляюще милосердие Божие, поют: Аллилуиа.

Икос 11

Свет невещественный видеша люди на месте, идеже от падения со стены града смерть от беззаконных приял еси, святителю Иосифе, просвети убо молитвами твоими и нас, в пучине греха погибающих, да благодарно вопием ти: Радуйся, веру, надежду и любовь даже до конца сохранивый; Радуйся, светильниче многосветлый, светом истиннаго богопознания нас озаривый. Радуйся, луче солнца правды, теплотою Божественныя любве души наша согревающий; Радуйся, бисере честный, сиянием небесныя славы сердца наша увеселивый. Радуйся, каменю драгий, страну поволжскую украсивый; Радуйся, бездну милосердия Божия нам призывающий. Радуйся, священномучениче, люди земли поволжстей не забывающий; Радуйся, в молитвах с нами всегда пребывающий. Радуйся, за Господа распятаго опаленный, изъязвленный и убиенный; Радуйся, священномучениче Иосифе, верный Астраханския земли страже.

Кондак 12

Благодатию от Бога почтенный болящия исцеляти и демонов прогоняти священномучениче Иосифе, тем же и нас, добродетели лишенных и молитвы не стяжавших, паче же фарисея возносящихся, твоею молитвою исцели, да в сокрушении поживши, купно с тобою Господеви воспоем: Аллилуиа.

Икос 12

Поюще твое богоугодное житие, святителю Иосифе, и на небеси от Бога прославленное, величаем бесчисленныя чудеса и исцеления, у гроба твоего бывшая, и на неусыпныя молитвы твоя уповающе взываем ти сице: Радуйся, посреде крамолы, волнений и бедствий все земное житие твое проведший; Радуйся, житие сие благочестне скончавый. Радуйся, от Царя Небеснаго венец славы приемый; Радуйся, не оставивый паствы своей во времена напасти. Радуйся, многая лишения правды ради претерпевый; Радуйся, сердце твое сосуд благодати соделавый. Радуйся, по убиении гробом твоим три лета во храме стоявший; Радуйся, гробом сим покаяние людей принимавший. Радуйся, града Астрахани и Церкви святей похвало; Радуйся, священномучениче Иосифе, верный Астраханския земли страже.

Кондак 13

О преславный угодниче Божий, священномучениче Иосифе! Приими сие от любве нашея приносимое тебе благохваление и твоим благоприятным ходатайством избави нас от всяких бед и зол. Умоли Господа Бога оставление прегрешений нам даровати, да сподобимся купно с тобою во веки пети: Аллилуиа.

(Этот кондак читается трижды, затем икос 1 и кондак 1)

Молитва священномученику Иосифу, первому митрополиту Астраханскому и Терскому

О священная главо, преславный чудотворче, первопастырю святыя Астраханския церкви, святителю отче Иосифе! К тебе припадаем и молимся мы, смиреннии и грешнии, и яко отца чадолюбиваго просим: всели в сердца наша любовь, еюже к Богу и ближним твоим при жизни земней преисполнен был еси, яко и душу твою положил еси, мученически пострадав. Научи нас, отче, подражати тебе верно, Бога и ближних наших любити искренне и заповеди Господни совершати непогрешительно, да будем и мы с тобою чада Божия, не по имени токмо, но и самим делом и всем житием нашим. Призри благоутробно на всякую душу христианскую, милости и помощи от тебе ищущую. Буди всем нам в болезнех целитель, в скорбех утешитель, в печалех избавитель, бедах помощник, в час смертный покровитель, да помощию молитв твоих святых сподобимся и мы грешнии спасение вечное получити и Царство Небесное унаследовати. Ей, святителю Христов, не посрами упования нашего, еже по Бозе и Пресвятей Богородице на тя крепко возлагаем, но яви нам многомощное заступление, да хвалим, славим и величаем человеколюбие дивнаго во святых Своих Бога, Отца и Сына и Святаго Духа, во веки веков. Аминь.

Тропарь священномученику Иосифу Астраханскому, митрополиту

Тропарь, глас 6

Подвигом добрым подвизався, жизнь твою страданиями за правду увенчав, преселился еси в Небесныя обители, идеже предстоя Престолу Святыя Троицы, моли, святителю Иосифе, граду Астрахани и отечеству нашему в мире спастися.