Тропари и кондаки воскресные восьми гласов.

Устав о пении тропарей и кондаков

Общие положения:

Тропари и кондаки в службе поются:
а) Тропари в конце вечерни, после чтения Трисвятого;
б) Тропари на повечерии, после Достойно есть: и Трисвятого;
в) Тропари в начале утрени, после Великой ектении;
г) Кондак после 6-й песни канона. Если два кондака - после 3-й и 6-й песни канона;
д) Тропари в конце утрени, после чтения Благо есть: и Трисвятого, или, если поется Великое славословие, сразу после пения Трисвятого;
е) Тропари на часах (не более двух), после трипсалмия. По Трисвятом кондак (не более одного). Кондак Взбранной воеводе: в конце первого часа имеет не уставное, а традиционное происхождение;
ж) Тропари и кондаки на литургии, по малом входе.
з) Кондаки на Изобразительных по Отче наш: На Литургии всегда поются сначала тропари, затем кондаки. Тропари на Литургии поются по иерархии - Господские, Богородичные, святым. Иерархия кондаков более сложная.

Храмовые тропари и кондаки на Литургии отменяются:
а) В храме Христовом - ради Господского праздника (но не попразднства)
б) В храме Богородичном - ради Богородичного праздника и попразднства.
в) В храме святого - в субботу, ради тропаря и кондака всем святым Если на седмичной службе святой Минеи имеет знак славословия и выше, то на Литургии не поются тропарь и кондак дня. В толкованиях Розанова и Никольского отмечены разночтения Типикона при изложении Устава о тропарех и кондаках.

Како пети тропари и кондаки во вся лето на вечерне, утрене и Божественной Литургии во храме Христовом, Богородичном и святаго

Аще святой не имеяй славословия (рядовой), вне предпразднства и попразднства

 

 

 

Аще Минейному святому славословие
(на будничных службах не поются тропарь и кондак дня)

 

 

Аще Минейному святому полиелей

 

 

              Аще Минейному святому бдение

 

Тропари и кондаки в праздник Божией Матери

Аще Божией Матери славословие, или полиелей

 

               Аще Божией Матери бдение

 

 

1. Глас 1:

Тропарь
Камени запечатану от иудей и воином стрегущим Пречистое Тело Твое, воскресл еси тридневный, Спасе, даруяй мирови жизнь. Сего ради силы небесныя вопияху Ти, Жизнодавче: слава воскресению Твоему, Христе, слава Царствию Твоему, слава смотрению Твоему, едине Человеколюбче.
Богородичен
Гавриилу, вещавшу Тебе Дево, радуйся, со гласом воплощашеся всех Владыка, в Тебе, Святем Кивоте, якоже рече праведный Давид: явилася еси ширшая небес, поносивши Зиждителя Твоего. Слава всельшемуся в Тя, слава прошедшему из Тебе, слава свободившему нас Рождеством Твоим.КондакВоскресл есияко Бог из гроба во славе, и мир совоскресил еси; и естество человеческое яко Бога воспевает Тя, и смерть исчезе; Адам же ликует, Владыко; Ева ныне от уз избавляема радуется, зовущи: Ты еси, Иже всем подая, Христе, воскресение.

2. Глас 2:

Тропарь
Егда снизшел еси к смерти, Животе Безсмертный, тогда ад умертвил еси блистанием Божества: егда же и умершия от преисподних воскресил еси, вся силы небесныя взываху: Жизнодавче, Христе Боже наш, слава Тебе.
Богородичен
Вся паче смысла, Вся преславная Твоя, Богородице, таинства, чистоте запечатанной, и девству храниму, Мати позналася еси неложна, Бога рождши истиннаго; Того моли спастися душам нашим. Кондак Воскресл еси от гроба, Всесильне Спасе, и ад видев чудо, ужасеся, и мертвии восташа; тварь же видящи срадуется Тебе, и Адам свеселится, и мир, Спасе мой, воспевает Тя присно.

3. Глас 3:

Тропарь
Да веселятся небесная, да радуются земная, яко сотвори державу мышцею Своею Господь, попра смертию смерть, первенец мертвых бысть; из чрева адова избави нас, и подаде мирови велию милость.
Богородичен
Тя Ходатайствовавшую спасение рода нашего, воспеваем, Богородице Дево: плотию бо от Тебе восприятую Сын Твой и Бог наш, Крестом восприим страсть, избави нас от тли яко Человеколюбец. Кондак Воскресл еси днесь из гроба, Щедре, и нас возвел еси от врат смертных; днесь Адам ликует, и радуется Ева, вкупе же и пророцы с патриархи воспевают непрестанно Божественную державу власти Твоея.

4. Глас 4:

Тропарь
Светлую воскресения проповедь от Ангела уведевша Господни ученицы и прадеднее осуждение отвергша, апостолом хвалящася глаголаху: испровержеся смерть, воскресе Христос Бог, даруяй мирови велию милость.
Богородичен
Еже от века утаенное, и Ангелом несведомое таинство, Тобою, Богородице, сущим на земли явися Бог, в неслитном соединении воплощаем, и Крест волею нас ради восприим, Имже воскресив первозданного, спасе от смерти душы наша.КондакСпас и Избавитель мой из гроба, яко Бог, воскреси от уз земнородныя, и врата адова сокруши, и яко Владыка воскресе тридневен.

5. Глас 5:

Тропарь
Собезначальное Слово Отцу и Духови, от Девы рождшееся на спасение наше, воспоим, вернии, и поклонимся, яко благоволи плотию взыти на крест, и смерть претерпети, и воскресити умершия славным воскресением Своим.
Богородичен
Радуйся, двере Господня непроходимая. Радуйся, стено и покрове притекающих к Тебе. Радуйся, необуреваемое пристанище и неискусобрачная, рождшая плотию Творца Твоего и Бога, молящи не оскудевай от воспевающих, и кланяющихся рождеству Твоему. КондакКо аду, Спасе мой, сошел еси, и врата сокрушивый яко Всесилен, умерших яко Создатель совоскресил еси, и смерти жало сокрушил еси, и Адам от клятвы избавлен бысть, Человеколюбче, темже вси зовем: спаси нас, Господи.

6. Глас 6:

Тропарь
Ангельския силы на гробе Твоем и стрегущии омертвеша, и стояше Мария во гробе, ищущи Пречистаго Тела Твоего. Пленил еси ад, не искусився от него; сретил еси Деву, даруяй живот. Воскресый из мертвых, Господи, слава Тебе.
Богородичен
Благословенную нарекий Твою Матерь, пришел еси на страсть вольным хотением, возсияв на Кресте, взыскати хотя Адама, глаголя Ангелом: срадуйтеся Мне, яко обретеся погибшая драхма. Вся мудре устроивый, Боже наш, слава Тебе. КондакЖивоначальною дланию умершия от мрачных удолий Жизнодавец воскресив всех Христос Бог, воскресение подаде человеческому роду: есть бо всех Спаситель, воскресение и живот, и Бог всех.

7. Глас 7:

Тропарь
Разрушил еси Крестом Твоим смерть, отверзл еси разбойнику рай, мироносицам плач преложил еси, и апостолом проповедати повелел еси, яко воскресл еси, Христе Боже, даруяй мирови велию милость.
Богородичен
Яко нашего воскресения сокровище, на Тя надеющиеся, Всепетая, от рова и глубины прегрешений возведи; Ты бо повинныя греху спасла еси, рождши Спасение наше; яже прежде рождества Дева, и в рождестве Дева, и по рождестве паки пребываеши Дева.КондакНе ктому держава смертная возможет держати человеки: Христос бо сниде, сокрушая и разоряя силы ея; связуемъ бывает ад, пророцы согласно радуются, предста, глаголюще, Спас сущим в вере: изыдите, вернии, в воскресение.

8. Глас 8:

Тропарь
С высоты снизшел еси, Благоутробне, погребение приял еси тридневное, да нас свободиши страстей, Животе и воскресение наше, Господи, слава Тебе.
Богородичен
Иже нас ради рождейся от Девы, и распятие претерпев, Благий, испровергий смертию смерть, и воскресение явлей яко Бог, не презри, яже создал еси рукою Твоею; яви человеколюбие Твое, Милостиве, приими рождшую Тя Богородицу молящуюся за ны; и спаси, Спасе наш, люди отчаянныя.КондакВоскрес из гроба, умершия воздвигл еси, и Адама воскресил еси, и Ева ликует во Твоем воскресении, и мирстии концы торжествуют еже из мертвых востанием Твоим, Многомилостиве.

Тропари и кондаки во всю седмицу.

9.В понедельник, Небесным силам

Тропарь, Глас 4:
Небесных воинств Архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны припадающия прилежно и вопиющия: от бед избавите ны, яко чиноначальницы Вышних Сил.
Кондак, Глас 2:
Архистратизи Божии, служителие Божественныя славы, Ангелов начальницы, и человеков наставницы, полезное нам просите, и велию милость, яко Безплотных Архистратизи.

10.Во вторник, Иоанну Предтече.

Тропарь, Глас 2:
Память праведнаго с похвалами, тебе же довлеет свидетельство Господне, Предтече: показал бо ся еси воистину и пророков честнейший, яко и в струях крестити сподобился еси Проповеданнаго. Темже за истину пострадав радуяся, благовестил еси и сущим во аде Бога явльшагося плотию, вземлющаго грех мира, и подающаго нам велию милость.
Кондак, Глас 2:
Пророче Божий и Предтече благодати, главу твою яко шипок священнейший от земли обретше, исцеления всегда приемлем, ибо паки, якоже прежде в мире проповедуеши покаяние.

11.В среду и пяток, Кресту

Тропарь, Глас 1:
Спаси, Господи, люди Твоя и благослови достояние Твое, победы на сопротивныя даруя и Твое сохраняя Крестом Твоим жительство.
Кондак, Глас 4:
Вознесыйся на Крест волею, тезоименитому Твоему новому жительству, щедроты Твоя даруй, Христе Боже, возвесели нас силою Твоею, победы дая нам на сопостаты, пособие имущим Твое оружие мира, непобедимую победу.

12.В четверток, апостолам и святителю Николаю Апостолам:

Тропарь, Глас 3:
Апостоли святии, молите милостиваго Бога, да прегрешений оставление подаст душам нашим.
Кондак, Глас 2:
Твердыя и Боговещанныя проповедатели, всех апостолов Твоих, Господи, приял еси в наслаждение благих Твоих и покой; болезни бо онех и смерть приял еси паче всякого всеплодия, Едине сведый сердечная.

13.Святителю Николаю, архиеп. Мир Ликийскому

Тропарь, Глас 4:
Правило веры и образ кротости, воздержания учителя яви тя стаду твоему, яже вещей истина: сего ради стяжал еси смирением высокая, нищетою богатая, отче священноначальниче Николае, моли Христа Бога спастися душам нашим.
Кондак, Глас 3:
В Мирех святе священнодействитель показался еси: Христово бо преподобне Евангелие исполнив, положил еси душу твою о людех твоих, и спасл еси неповинныя от смерти: сего ради освятился еси, яко великий таинник Божия благодати.

14.В субботу, всем святым и за умерших

Тропарь, Глас 2:
Апостоли, мученицы и пророцы, святителие, преподобнии и праведнии, добре подвиг совершившии и веру соблюдшии, дерзновение имуще ко Спасу, о нас Того, яко Блага, молите, спастися, молимся, душам нашим.
Слава: Помяни, Господи, яко благ, души раб Твоих, и, елика в житии согрешиша, прости, никтоже бо безгрешен, токмо Ты, могий и преставленным дати покой.
И ныне: Мати Святая неизреченнаго Света, ангельскими Тя песньми почитающе, благочестно величаем.
Кондак всем святым, Глас 8:
Яко начатки естества, Насадителю твари, вселенная приносит Ти, Господи, богоносныя мученики; тех молитвами в мире глубоце Церковь Твою, жительство Твое Богородицею соблюди, Многомилостиве.
Кондак заупокой, Глас 6:
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.

Тропари и кондаки Господские.

14.Всемилостивому Спасу.

Тропарь, Глас 8:
С вышних призирая, убогия приемля, посети нас озлобленныя грехи, Владыко Всемилостиве, молитвами Богородицы даруй душам нашим велию милость.
Кондак, Глас 4:
Всякия скверны, всемилостивый Спасе, аз бых делатель, и во отчаяния ров падся, но стеню от сердца, и вопию к Тебе, Слове, ускори, Щедрый, и потщися на помощь нашу, яко Милостив.

15.Благодарственный Спасителю

Тропарь, Глас 4:
Благодарни суще недостойнии раби Твои, Господи, о Твоих великих благодеяниих на нас бывших, славяще Тя хвалим, благословим, благодарим, поем и величаем Твое благоутробие и рабски любовию вопием Ти: Благодетелю Спасе наш, слава Тебе.
Кондак, Глас 3:
Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Прещедрый.

16.Индикту (новолетию)

Тропарь, Глас 4: Благодарни суще...(см. предыдущий)
Слава: Глас 3:
Твоих благодеяний...(см. предыдущий)
И ныне: Глас 2:
Всея твари Содетелю, времена и лета во Своей власти положивый, благослови венец лета благости Твоея, Господи, сохраняя в мире люди и град Твой молитвами Богородицы и спаси ны.
Кондак, Глас тойже:
В вышних живый, Христе Царю, всех видимых и невидимых Творче и Зиждителю, Иже дни и нощи, времена и лета сотворивый, благослови ныне венец лета, соблюди и сохрани в мире град и люди Твоя, Многомилостиве.

17.Убрусу, нерукотворному образу Господню

Тропарь, Глас 2:
Пречистому Твоему Образу покланяемся, Благий, просяще прощения прегрешений наших, Христе Боже, волею бо благоволил еси плотию взыти на крест, да избавиши яже создал еси от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.
Кондак, Глас тойже:
Неизреченнаго и Божественнаго Твоего к человеком смотрения, неописанное Слово Отчее, и Образ неписанный и Богописанный победителен, ведуще неложнаго Твоего воплощения, почитаем Того лобызающе.

18.Воспоминание знамения Честнаго Креста во святем граде Иерусалиме

Тропарь Кресту, Глас 8:
Креста Твоего образ ныне паче солнца возсия, егоже от горы святыя даже до лобнаго места простерл еси, и в нем Твою, Спасе, крепость уяснил еси, сим укрепляя и верныя люди Своя, яже и спасай выну в мире, молитвами Богородицы, Христе Боже, и спаси нас.
Кондак, Глас 4:
Отверзый небеса заключенная, на небеси пресветлыя лучи, на земли возсия пречистый Крест; Темже сияний Его действа приемше, к незаходимому наставляемся свету и во бранех имамы Его оружие мира непобедимую победу.

19.Обновлению храма

Тропарь, Глас 4:
Якоже вышния тверди благолепие, и нижнюю показал еси красоту Святаго селения славы Твоея, Господи, утверди сие во век века и приими наша в нем непрестанно приносимая Тебе моления, Богородицею, всех Животе и Воскресение.
Кондак, Глас 4:
Небо многосветлое Церковь показася, вся просвещающая верныя, в нейже стояще зовем: сей дом утверди, Господи.
Ин кондак, Глас 4:
Обновления духа в сердцах, и просвещение внутренним даруй, верою совершающим священная обновления храма дому Твоего, емуже благоволил еси создатися в Твое Божественное Имя, Едине во святых прославляемый.

20.Обрезанию Господню

Тропарь, Глас 1:
На Престоле огнезрачнем в вышних седяй со Отцем Безначальным, и Божественным Твоим Духом, благоволил еси родитися на земли от Отроковицы, неискусомужныя Твоея Матере, Иисусе: сего ради и обрезан был еси яко человек осмодневный. Слава всеблагому Твоему совету, слава смотрению Твоему, слава снизхождению Твоему, Едине Человеколюбче.
Кондак, Глас 3:
Всех Господь обрезание терпит и человеческая прегрешения яко Благ обрезует, дает спасение днесь миру, радуется же в вышних и Создателев иерарх и светоносный, Божественный таинник Христов Василий.

21.Положению Ризы Господней

Тропарь, Глас 4:
Днесь притецем, вернии, к Божественней и цельбоносней Ризе Спасителя нашего Бога, благоизволившаго сию Плотию носити, и на Кресте Святую Свою Кровь излияти, еюже искупи нас от работы вражия. Тем благодаряще вопием Ему: спаси отечество наше, и град, и вся люди честною Твоею Ризою защити, и спаси души наша, яко Человеколюбец.
Кондак, Глас 4:
Одеяние нетления, спасительнаго целения всем человеком, Владыко, даровал еси Твое Божественное сокровище, Честную Ризу, яже есть хитон, еюже живоносную и Святую Плоть вочеловечения Твоего одеяти благоволил еси. Cию желанием приемлюще светло празднуем, страхом же и любовию, яко Благодателю воспевающе, зовем Ти, Христе: сохрани в мире отечество наше, и вся люди, по велицей Твоей милости.

Тропари и кондаки Господские на молебнах.

22.О умножении любви

Тропарь, Глас 4:
Союзом любве апостолы Твоя связавый, Христе, и нас, Твоих верных рабов к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче.
Кондак, Глас 5:
Пламенем любве распали к Тебе сердца наша, Христе Боже, да тою разжизаеми, сердцем, мыслию же и душею и всею крепостию нашею возлюбим Тя, и искренняго своего яко себе, и повеления Твоя храняще, славим Тя, всех благ Дателя.

23.О болящих

Тропарь, Глас 4:
Скорый в заступлении Един сый, Христе, скорое свыше покажи посещение страждущим рабом Твоим, и избави от недуг и горьких болезней, и воздвигни во еже пети Тя и славити непрестанно, молитвами Богородицы, Едине Человеколюбче.
Кондак, Глас 2:
На одре болезни лежащих и смертною раною уязвленных, якоже иногда воздвигл еси, Спасе, Петрову тещу, и расслабленнаго на одре носимаго, сице и ныне, Милосерде, страждущих посети и исцели: Ты бо Един еси недуги и болезни рода нашего понесый, и вся могий, яко Многомилостив.

24.О заключенных

Тропарь, Глас 2:
Манассию от уз и горькаго заточения, молитв ради свободивый, Всещедрый Боже, и рабы Твоя (и раба Твоего имя рек) нами ныне молящияся (молящагося), от уз и заточения свободи, и от всякаго злаго обстояния избави, яко Един Человеколюбец.
Кондак, Глас 5:
Яко Милосердия Источник, и благости Пучина, Христе Боже, не презри в скорбех и бедах Тебе верою призывающих, но яко Щедр, помилуй, и от уз скоро свободи, да поем Ти: Аллилуя.

25.О усопших

Тропарь, Глас 8:
Глубиною мудрости человеколюбно вся строяй, и полезное всем подаваяй, едине Содетелю, упокой, Господи, души раб Твоих; на Тя бо упование возложиша, Творца и Зиждителя, и Бога нашего.
Слава: кондак, глас 8:Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь бесконечная.
И ныне: Богородичен, глас 8:Тебе и стену и пристанище имамы, и молитвенницу благоприятну к Богу, Егоже родила еси, Богородице безневестная, верных спасение.

26.О ненавидящих и обидящих нас

Тропарь, Глас 4:
О распенших Тя моливыйся, любодушне Господи, и рабом Твоим о вразех молитися повелевый, ненавидящих и обидящих нас прости, и от всякого зла и лукавства к братолюбному и добродетельному настави жительству, смиренно мольбу Тебе приносим, да в согласном единомыслии славим Тя, Единаго Человеколюбца.
Кондак, Глас 5:
Якоже первомученик Твой Стефан, о убивающих его моляше Тя, Господи, и мы припадающе молим: ненавидящих всех и обидящих нас прости, во еже ни единому от них нас ради погибнути, но всем спастися благодатию Твоею, Боже Всещедрый.

27.О путешествующих

Тропарь, Глас 2:
Путь и Истина сый, Христе, спутника ангела Твоего рабом Твоим ныне, якоже Товии иногда, посли сохраняюща, и невредимых к славе Своей, от всякаго зла во всяком благополучии соблюдающа, молитвами Богородицы, Едине Человеколюбче.
Кондак, Глас 2:
Луце и Клеопе в Еммаус спутешествовавый Спасе, сшествуй и ныне рабом Твоим, путешествовати хотящим, от всякаго избавляя их злаго обстояния: вся бо Ты, яко Человеколюбец, можеши, хотяй.

28.О еже хотящим по водам плыти

Тропарь, Глас 2:
К Тебе, Спасе, прибегающих и от Твоея всесильныя десницы помощи и благословения, яко от Творца и Владыки ищущих, не презри; но якоже иногда на мори, словом тишину апостолом своим подал еси, и ныне тихое и безмятежное плавание, со здравием им даруй, молитвами Богородицы, Едине Человеколюбче.
Слава: Глас 5:
Всю надежду на Тя возложившим, Спасе, буди помощник и избавитель, и благое намерение дела с путешествием их благослови, да вси славим Тя, Единаго всех благ Подателя.
И ныне: Глас тойже:
Под Твой покров прибегаем, Богородице Дево, молитв наших не презри в скорбех, но от бед избави нас, Едина Чистая и Благословенная.

29.О еже по воздуху летети

Тропарь, Глас 2:
К Тебе, Спасе прибегающих, и от Твоея всесильныя десницы помощи и благословения, яко от Творца и Владыки, ищущих не презри, но якоже апостолы Твоя древле, на погребение Пречистыя Матери Твоея от конец облаки принесый, сице и ныне рабом Твоим сим скорое и безмятежное по воздуху превождение со здравием даруй, молитвами Преблагословенныя Богородицы, Едине Человеколюбче.
Слава: Глас 5:
Всю надежду на Тя возложившим, Спасе, буди помощник и избавитель, и благое намерение дела с воздушным путешествием их благослови, да вси славим Тя, Единаго всех благ Подателя.
И ныне: Глас тойже:
Под Твой покров прибегаем, Богородице Дево, молитв наших не презри в скорбех, но от бед избави нас, Едина Чистая и Благословенная.

30.Перед начатком всякаго добраго дела

Тропарь, Глас 2:
Творче и Создателю всяческих, Боже, дела рук наших, к славе Твоей начинаемая, Твоим благословением спешно исправи, и нас от всякаго зла избави, яко Един всесилен и Человеколюбец.
Кондак, Глас 6:
Скорый в заступление и крепкий в помощь, предстани благодатию силы Твоея ныне и, благословив, укрепи, и в совершение намерения благаго дела рабов Твоих произведи; вся бо, елика хощеши, яко Всесильный Бог, творити можеши.

31.Перед началом учения

Тропарь, Глас 6:
Яко посреде учеников Твоих, пришел еси, Спасе, мир дая им, прииди к нам, и спаси нас.Ин тропарь, Глас тойже:Безкнижныя ученики Дух Твой Святый наказатели яви, Христе Боже, и многовещанным сличием прелесть упраздни, яко Всесилен.
Слава: Благословен еси, Христе Боже наш...(см. N46)
И ныне: Предстательство Христиан...(см.N76)

32. Во время бездождия

Тропарь, Глас 2:
Воздуха растворение повелением Твоим предлагаяй, Господи, вольный дождь с благорастворенными воздухи даруй земли, еже приносити людем Твоим плоды изобильныя, и насыщати всякое животно Твоим благоволением, молитвами Богородицы и всех святых Твоих.
Кондак, Глас 6:
Всех Творца и Зиждителя, и благих Дателя Тя сведуще, Господи, к Тебе припадаем, и прилежно молим: пощади, Милосерде, и прости яко Благ беззакония наша, и настоящаго праведнаго гнева избави рабы Своя, подая, яко Благ, жаждущей земли благоплодныя дожди, яко Един Многомилостив.

33. Во время безведрия

Тропарь, Глас 2:
Призри милостивно, Боже, на люди согрешшия, и не презри в покаянии к Тебе припадающих, но яко Благ помилуй, и вскоре праведнаго Твоего избави прещения, молитвами Богородицы, Едине Человеколюбче.
Кондак, Глас 2:
Не отрини до конца согрешшия люди Твоя, Владыко, ниже отстави милости и щедроты Твоя от нас, но яко бездна сый щедрот, и милосердия пучина, приими мольбы наша, и избави нас от належащия беды и нужды, Един бо еси Благоуветлив.

34. На благословение нового дома

Тропарь, Глас 8:
Якоже Закхееву дому Твоим, Христе, входом спасения бысть, сице и ныне входом священных служителей Твоих и с ними святых Твоих ангел мир Твой подаждь дому сему и милостивно благослови его, спасая и просвещая всех жити хотящих в нем.

35. При нападении врагов

Тропарь, Глас 4:
Скоро предвари, прежде даже не поработимся врагом, хулящим Тя и претящим нам, Христе Боже наш, погуби Крестом Твоим борющия нас, да разумеют, како может православных вера, молитвами Богородицы, Едине Человеколюбче.
Кондак, Глас 8:
Возбранный Воеводо и Господи, ада Победителю! Яко избавлься от вечныя смерти, похвальная восписую Ти, создание и раб Твой, но яко имеяй милосердие неизреченное, от всяких мя бед свободи, зовуща: Иисусе, Сыне Божий, помилуй мя.

36.О избавлении от землетрясения

Тропарь, Глас 8:
Призираяй на землю, и творяй ю трястися, избави ны страшнаго труса прещения, Христе Боже наш, и ниспосли нам богатыя милости Твоя, молитвами Богородицы и спаси ны.
Кондак, Глас 6:
Избави труса тяжкаго всех нас, Господи, и язвы нестерпимыя, грех ради наших. Пощади, Господи, люди Твоя, яже стяжал еси Твоею Кровию, Владыко, и град не предаждь в погибель трусом страшным, иного бо разве Тебе Бога не вемы, и воззови поющим: Аз есмь с вами, и никтоже на вы.

Тропари и кондаки двунадесятым праздникам.

37.Рождеству Богородицы

Тропарь, Глас 4:
Рождество Твое, Богородице Дево, радость возвести всей вселенней: из Тебе бо возсия Солнце правды Христос Бог наш, и разрушив клятву, даде благословение, и упразднив смерть, дарова нам живот вечный.
Кондак, Глас 4:
Иоаким и Анна поношения безчадства, и Адам и Ева от тли смертныя свободистася, Пречистая, во святем рождестве Твоем. То празднуют и людие Твои, вины прегрешений избавльшеся, внегда звати Ти: неплоды раждает Богородицу и питательницу жизни нашея.

38.Воздвижению Честнаго и Животворящего Креста

Тропарь, Глас 1:
Спаси, Господи, люди Твоя и благослови достояние Твое, победы на сопротивныя даруя и Твое сохраняя Крестом Твоим жительство.
Кондак, Глас 4:
Вознесыйся на Крест волею, тезоименитому Твоему новому жительству, щедроты Твоя даруй, Христе Боже, возвесели нас силою Твоею, победы дая нам на сопостаты, пособие имущим Твое оружие мира, непобедимую победу.

39.Введению во Храм Богородицы

Тропарь, Глас 4:
Днесь благоволения Божия предображение, и человеков спасение проповедание, в храме Божии ясно Дева является, и Христа всем предвозвещает. Той и мы велегласно возопиим: радуйся смотрения Зиждителева исполнение. 
Кондак, Глас 4:
Пречистый Храм Спасов, многоценный Чертог и Дева, священное Сокровище славы Божия, днесь вводится в дом Господень, благодать совводящи, яже в Дусе Божественном, Юже воспевают ангели Божии: Сия есть селение небесное.

40.Рождеству Христову

Тропарь, Глас 4:
Рождество Твое, Христе Боже наш, возсия мирови свет разума: в нем бо звездам служащии, звездою учахуся, Тебе кланятися Солнцу правды, и Тебе ведети с высоты Востока: Господи, слава Тебе.
Кондак, Глас 3:
Дева днесь Пресущественнаго раждает, и земля вертеп Неприступному приносит, Ангели с пастырьми славословят, волсви же со звездою путешествуют: нас бо ради родися отроча младо, Превечный Бог.

41. Крещению Господню

Тропарь, Глас 1:
Во Иордане крещающуся Тебе, Господи, троическое явися поклонение: Родителев бо глас свидетельствовавше Тебе, возлюбленнаго Тя Сына именуя, и Дух в виде голубине, извествоваше словесе утверждение. Явлейся Христе Боже, и мир просвещей, слава Тебе.
Кондак, Глас 4:
Явился еси днесь вселенней, и свет Твой, Господи, знаменася на нас, в разуме поющих Тя: пришел еси, и явился еси, свет неприступный.

42.Сретению Господню

Тропарь, Глас 1:
Радуйся, Благодатная Богородице Дево, из Тебе бо возсия Солнце правды, Христос Бог наш, просвещаяй сущия во тьме. Веселися и ты, старче праведный, приемый во объятия Свободителя душ наших, дарующаго нам воскресение.
Кондак, Глас 1:
Утробу Девичу освятивый рождеством Твоим, и руце Симеоне благословивый, якоже подобаше, предварив, и ныне спасл еси нас Христе Боже, но умири во бранех жительство, Едине Человеколюбче.

43. Благовещению Пресвятыя Богородицы

Тропарь, Глас 4:
Днесь спасения нашего главизна, и еже от века таинства явление, Сын Божий, Сын Девы бывает, и Гавриил благодать благовествует, тем же и мы с ним Богородице возопиим: радуйся, Благодатная, Господь с Тобою.
Кондак, Глас 8:
Взбранной воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

44.В неделю Ваий

Тропарь, Глас 1:
Общее воскресение прежде Твоея страсти уверяя из мертвых воздвигл еси Лазаря, Христе Боже. Темже и мы, яко отроцы победы знамения носяще, Тебе Победителю смерти вопием: осанна в вышних, благословен Грядый во Имя Господне.
Ин тропарь, Глас 4:
Спогребшеся Тебе крещением, Христе Боже наш, безсмертныя жизни сподобихомся воскресением Твоим, и воспевающе зовем: осанна в вышних, благословен Грядый во Имя Господне.
Кондак, Глас 6:
На престоле на небеси, на жребяти на земли носимый, Христе Боже, Ангелов хваление и детей воспевание приял еси зовущих Ти: благословен еси, грядый Адама воззвати.

45. Вознесению

Тропарь, Глас 4:
Вознеслся еси во славе, Христе Боже наш, радость сотворивый учеником обетованием Святаго Духа, извещенным им бывшим благословением, яко Ты еси Сын Божий, Избавитель мира.
Кондак, Глас 6:
Еже о нас исполнив смотрение, и яже на земли соединив небесным, вознеслся еси во славе, Христе Боже наш, никакоже отлучаяся, но пребывая неотступный, и вопия любящим Тя: Аз есмь с вами и никтоже на вы.

46.Пятидесятнице

Тропарь, Глас 8:
Благословен еси, Христе Боже наш, Иже премудры ловцы явлей, низпослав им Духа Святаго, и теми уловлей вселенную, Человеколюбче, слава Тебе.
Кондак, Глас 8:
Егда снизшед языки слия, разделяше языки Вышний, егда же огненныя языки раздаяше, в соединение вся призва; и согласно славим Всесвятаго Духа.

47. Преображению Господню

Тропарь, Глас 7:
Преобразился еси на горе, Христе Боже, показавый учеником Твоим славу Твою, якоже можаху: да возсияет и нам грешным свет Твой присносущный, молитвами Богородицы, Светодавче, слава Тебе.
Кондак, Глас 7:
На горе преобразился еси, и якоже вмещаху ученицы Твои славу Твою, Христе Боже, видеша: да егда Тя узрят распинаема, страдание убо уразумеют вольное, мирови же проповедят, яко Ты еси воистинну Отчее сияние.

48.Успению

Тропарь, Глас 1:
В рождестве девство сохранила еси, во успении мира не оставила еси, Богородице: преставилася еси животу, Мати сущи Живота, и молитвами Твоими избавляеши от смерти души наша.
Кондак, Глас 2:
В молитвах неусыпающую Богородицу, и в предстательствах непреложное упование, гроб и умерщвление не удержаста: якоже бо Живота Матерь, к животу престави, во утробу Вселивыйся Приснодевственную.

Тропари и кондаки Триоди постной и цветной.

49.В неделю о мытаре и фарисее

Кондак, Глас 4:
Фарисеева убежим высокоглаголания, и мытареве научимся высоте глагол смиренных, покаянием взывающе: Спасе мира, очисти рабы Твоя.
Ин кондак, Глас 3:
Воздыхания принесем мытарская Господеви, и к нему приступим грешнии, яко Владыце: хощет бо спасения всех Человеков, оставление подает всем кающимся, нас бо ради воплотися, Бог сый, Отцу Собезначальный.

50.В неделю о блудном сыне:

Кондак, Глас 3:
Отеческая славы Твоея удалихся безумно, в злых расточив, еже ми предал еси богатство. Темже Ти блуднаго глас приношу: согреших пред Тобою, Отче щедрый, приими мя кающася, и сотвори мя яко единаго от наемник Твоих.

51.В неделю мясопустную:

Кондак, Глас 1:
Егда приидеши, Боже, на землю со славою, и трепещут всяческая: река же огненная пред судищем влечет, книги разгибаются, и тайная являются; тогда избави мя от огня неугасимаго, и сподоби мя одесную Тебе стати, Судие Праведнейший.

52.В неделю сыропустную

Кондак, Глас 6:
Премудрости наставниче, Смысла Подателю, немудрых Наказателю, и нищих Защитителю, утверди, вразуми сердце мое, Владыко! Ты даждь ми слово, Отчее слово, се бо устне мои не возбраню, во еже звати Тебе: Милостиве, помилуй мя падшаго.

53.На вечерии Великого поста, Глас 4:

Богородице Дево, радуйся, Благодатная Марие, Господь с Тобою: благословенна Ты в женах, и благословен Плод чрева Твоего, яко Спаса родила еси душ наших.
Слава: Крестителю Христов, всех нас помяни, да избавимся от беззаконий наших: тебе бо дадеся благодать молитися за ны.
И ныне: Молите за ны святии апостоли, святии вси, да избавимся от бед и скорбей: вас бо теплыя предстатели ко Спасу стяжахом.
Под Твое благоутробие прибегаем, Богородице, моления наша не презри во обстоянии; но от бед избави ны, Едина Чистая, Едина Благословенная.

54. На великопостных часах

Первого часа тропарь, Глас 6:
Заутра услыши глас мой, Царю мой и Боже мой.
Стих 1: Глаголы моя внуши, Господи, разумей звание мое.
Стих 2: Яко к Тебе помолюся, Господи.
Третьего часа тропарь, Глас 6:
Господи, Иже Пресвятаго Твоего Духа в третий час апостолом Твоим низпославый, Того, Благий, не отыми от нас, но обнови нас, молящих Ти ся.
Стих 1: Сердце чисто созижди во мне, Боже, и дух прав обнови во утробе моей.
Стих 2: Не отвержи мене от лица Твоего и Духа Твоего Святаго не отыми от мене.
Шестого часа тропарь,Глас2:
Иже в шестый день же и час, на кресте пригвождей в рай дерзновенный Адамов грех, и согрешений наших рукописание раздери, Христе Боже, и спаси нас.
Стих 1: Внуши, Боже, молитву мою, и не презри моления моего.
Стих 2: Аз к Богу воззвах, и Господь услыша мя.
Девятого часа тропарь, Глас 8:
Иже в девятыый час нас ради плотию смерть вкусивый, умертви плоти нашея мудрование, Христе Боже, и спаси нас.
Стих 1: Да приближится молитва моя пред Тя, Господи, по словеси Твоему вразуми мя.
Стих 2: Да внидет прошение мое пред Тя, Господи, по словеси Твоему избави мя.

55.На Великом повечерии в 1-ю седмицу

Кондак Великого канона, Глас 6:
Душе моя, душе моя, востани, что спиши? Конец приближается, и имаши смутитися; воспряни убо, да пощадит Тя Христос Бог, везде сый и вся исполняяй.

56.В субботу первую Великого Поста, вмч. Феодору Тирону

Тропарь, Глас 2:
Велия веры исправления, во источнице пламене, яко на воде упокоения, святый мученик Феодор радовашеся; огнем бо всесожжегся, яко хлеб сладкий Троице принесеся. Того молитвами, Христе Боже, спаси души наша.
Кондак, Глас 8:
Веру Христову, яко щит, внутрь приим в сердцы твоем, противныя силы попрал еси многострадальче, и венцем небесным венчался еси вечно, Феодоре, яко непобедимый.

57.В неделю первую Великого Поста, Торжества Православия

Тропарь, Глас 2:
Пречистому Образу Твоему покланяемся, Благий, просяще прощения прегрешений наших, Христе Боже; волею бо благоволил еси плотию взыти на крест, да избавиши яже создал от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.
Кондак, Глас 2:
Неописанное Слово Отчее, из Тебе, Богородице, описася воплощаем: и неоскверншийся образ в древнее вообразив, Божественною добротою смеси. Но исповедающе спасение, делом и словом, сие воображаем.

58.В неделю вторую Великого Поста, Григория Паламы

Тропарь, Глас 8:
Православия светильниче, Церкве утверждение и учителю, монахов доброто, богословов поборниче непреборимый, Григорие Чудотворче, Фессалонитская похвало, проповедниче благодати, молися выну спастися душам нашим.
Кондак, Глас 4:
Ныне время делательное явися, при дверех суд, востанем убо постящеся, принесем слезы умиления, милостынями, зовуще: согрешихом паче песка морскаго, но ослаби, Содетелю всех, яко да приимем нетленныя венцы.

59.В неделю третию Великого Поста, Крестопоклонную

Тропарь, Глас 1:
Спаси, Господи, люди Твоя... (см. N11)
Кондак, Глас 7:
Не ктому пламенное оружие хранит врат Едемских; на тыя бо найде преславный соуз древо крестное, смертное жало, и адова победа прогнася. Предстал бо еси, Спасе мой, вопия сущим во аде: внидите паки в рай.
Тропарь на поклонение Кресту, Глас 6:
Кресту Твоему покланяемся, Владыко, и святое воскресение Твое славим.

60. В неделю четвертую Великого Поста, Иоанна Лествичника

Тропарь, Глас 1:
Пустынный житель и телеси ангел, и чудотворец явился еси, богоносе отче наш Иоанне; постом, бдением, молитвою небесная дарования приим, исцеляеши недужныя, и души верою притекающих ти. Слава Давшему Ти крепость, слава Венчавшему тя, слава Действующему тобою всем исцеления.
Кондак, Глас 4:На высоте Господь воздержания истинна тя положи, якоже звезду нелестную, световодящую концы, наставниче, Иоанне, отче наш.

61.В неделю пятую Великого Поста, Марии Египетской

Тропарь, Глас 8:
В тебе, мати, известно спасеся еже по образу; приимши бо крест, последовала еси Христу, и деющи учила еси презирати убо плоть, преходит бо, прилежати же о души вещи безсмертней. Темже и со ангелы срадуется, преподобная Марие, дух твой.
Кондак, Глас 3:
Блудами первее преисполнена всяческими, Христова невеста днесь покаянием явися, ангельское жительство подражающи, демоны Креста оружием погубляет. Сего ради Царствия невеста явилася еси, Марие преславная.

Тропари и кондаки на страстной седмице.

62.В Великий Понедельник, Вторник и Среду

Тропарь, Глас 8: 
Се Жених грядет в полунощи, и блажен раб, Егоже обрящет бдяща, недостоин же паки, Егоже обрящет унывающа. Блюди убо, душе моя, не сном отяготися, да не смерти предана будеши, и Царствия вне затворишися, но воспряни зовущи: Свят, Свят, Свят еси, Боже, Богородицею помилуй нас.
Кондак Великого Понедельника, Глас 8:
Иаков рыдаша Иосифова лишения, и доблий седяше на колеснице, яко царь почитаемъ; египтяныни бо тогда сластем не поработав, воспрославляшеся от Ведущаго человеческая сердца, и посылающаго венец нетленный.
Кондак Великого Вторника, Глас 2:
Час душе конца помысливши, и посечения смоковницы убоявшися, данный тебе талант трудолюбно делай, окаянная, бодрствующи и зовущи: да не пребудем вне чертога Христова.
Кондак Великой Среды, Глас 4:
Паче блудницы, Блаже, беззаконновав, слез тучи никакоже Тебе принесох; но молчанием моляся припадаю Ти, любовию облобызая пречистеи Твои нозе, яко да оставление мне, яко Владыка подаси долгов, зовущу Ти, Спасе: от скверных дел моих избави мя.

63.Во Святой и Великий Четверток

Тропарь, Глас 8:
Егда славнии ученицы на умовении вечери просвещахуся, тогда Иуда злочестивый сребролюбием недуговав омрачашеся, и беззаконным судиям Тебе, Праведнаго Судию, предает. Виждь, имений рачителю, сих ради удавление употребивша! Бежи, несытыя души, Учителю таковая дерзнувшия; Иже о всех Благий, Господи, слава Тебе.
Кондак, Глас 2:
Хлеб прием в руце предатель, сокровенно тыя простирает, и приемлет цену Создавшаго Своима руками человека, и неисправлен пребысть Иуда раб и льстец.

64.Во Святой и Великий пяток

Тропарь, Глас 8:
Егда славнии ученицы┘
Кондак, Глас 8:
Нас ради Распятого приидите вси воспоим, Того бо виде Мария и глаголаше: аще и распятие терпиши, Ты еси Сын и Бог Мой.

65.Во Святую и Великую Субботу

Тропарь, Глас 2:
Благообразный Иосиф, с древа снем пречистое Тело Твое, плащаницею чистою обвив, и вонями во гробе нове покрыв положи.
Слава: Егда снизшел еси к смерти, Животе Безсмертный, тогда ад умертвил еси блистанием Божества. Егда же и умершия от преисподних воскресил еси, вся силы небесныя взываху: Жизнодавче Христе Боже наш, слава Тебе.
И ныне: Мироносицам женам при гробе представ, ангел вопияше: мира мертвым суть прилична, Христос же истления явися чуждь.
Кондак, Глас 6:
Бездну заключивый, мертв зрится, и смирною и плащаницею обвився, во гробе полагается, яко смертный, Бессмертный; жены же приидоша помазати Его миром, плачущи горько и вопиющия: сия Суббота есть Преблагословенная, в нейже Христос уснув, воскреснет тридневен.

66.Во Святую и Великую неделю Пасхи

Стихира, Глас 6:
Воскресение Твое, Христе Спасе, Ангели поют на небесех, и нас на земли сподоби чистым сердцем Тебе славити.
Тропарь, Глас 5:
Христос воскресе из мертвых, смертию смерть поправ и сущим во гробех живот даровав.
Кондак, Глас 8:
Аще и во гроб снизшел еси, Безсмертне, но адову разрушил еси силу, и воскресл еси, яко Победитель, Христе Боже, женам мироносицам вещавый: радуйтеся! и Твоим апостолом мир даруяй, падшим подаяй воскресение.

67. В неделю о Фоме

Тропарь, Глас 7:
Запечатану гробу, живот от гроба возсиял еси, Христе Боже, и дверем заключенным, учеником предстал еси, всех воскресение; дух правый теми обновляя нам, по велицей Твоей милости.
Кондак, Глас 8:
Любопытною десницею жизноподательная Твоя ребра Фома испыта, Христе Боже; созаключенным бо дверем яко вшел еси, с прочими апостолы вопияше Тебе: Господь еси и Бог мой.

68.В неделю жен мироносиц

Тропарь, Глас 2:
Егда снизшел еси к смерти, Животе Безсмертный, тогда ад умертвил еси блистанием Божества. Егда же и умершия от преисподних воскресил еси, вся силы небесныя взываху: Жизнодавче Христе Боже наш, слава Тебе.
Слава: Благообразный Иосиф с древа снем Пречистое Твое Тело, плащаницею чистою обвив, и благоуханьми во гробе нове закрыв положи; но тридневен воскресл еси, Господи, подаяй мирови велию милость.
И ныне: Мироносицам женам при гробе представ ангел, вопияше: мира мертвым суть прилична Христос же истления явися чуждь. Но возопийте: воскресе Господь, подаяй мирови велию милость.
Кондак, Глас 2:
Радоватися мироносицам повелел еси, плачь праматере Евы утолил еси воскресением Твоим, Христе Боже, апостолом же Твоим проповедати повелел еси: Спас воскресе от гроба.

69.В неделю о расслабленном

Тропарь воскресен, Глас 3:
Да веселятся небесная┘ (см. ╧ 3)
Кондак, Глас 3:
Душу мою, Господи, во гресех всяческих, и безместными деяньми люте разслаблену, воздвигни Божественным Твоим предстательством, якоже и разслабленнаго воздвигл еси древле, да зову Ти спасаемъ: Щедрый, слава, Христе, державе Твоей.

70.В среду Преполовения

Тропарь, Глас 8:
Преполовившуся празднику, жаждущую душу мою благочестия напой водами, яко всем, Спасе, возопил еси: жаждай да грядет ко Мне и да пиет. Источниче жизни нашея, Христе Боже слава Тебе.
Кондак, Глас 4:
Празднику законному преполовляющуся, всех Творче и Владыко, к предстоящим глаголал еси, Христе Боже: приидите и почерпите воду безсмертия. Темже Тебе припадаем, и верно вопием: щедроты Твоя даруй нам, Ты бо еси Источник жизни нашея.

71. В неделю о самаряныне

Тропарь воскресен, Глас 4:
Светлую воскресения проповедь┘ (см. ╧ 4)
Кондак, Глас 8:
Верою пришедшая на кладязь самаряныня, видя Тя премудрости воду, еюже напоишася обильно, Царствие вышнее наследова вечно, яко приснославная.

72.В неделю о слепом

Тропарь воскресен, Глас 5:
Собезначальное Слово Отцу и Духови┘ (см. ╧ 5)
Кондак, Глас 4:
Душевными очима ослеплен, к Тебе, Христе, прихожду, якоже слепый от рождения, покаянием зову Ти: Ты сущих во тьме Свет пресветлый.

73. В неделю святых отец

Тропарь, Глас 8:
Препрославлен еси, Христе Боже наш, светила на земли отцы наша основавый, и теми ко истенней вере вся ны наставивый, Многоблагоутробне, слава Тебе.
Кондак, Глас 8:
Апостол проповедание, и отец догматы, Церкви едину веру запечатлеша, яже и ризу носящи истины, исткану от еже свыше богословия, исправляет и славит благочестия великое таинство.

74.В неделю всех святых

Тропарь воскресен, Глас 8:
С высоты снизшел еси, Благоутробне┘ (см. ╧ 8)
Слава: тропарь святым, Глас 4:
Иже во всем мире мученик Твоих, яко багряницею и виссом, кровьми Церковь Твоя украсившися, теми вопиет Ти, Христе Боже: людем Твоим щедроты Твоя низпосли, мир жительству Твоему даруй, и душам нашим велию милость.
Кондак, Глас 8:
Яко начатки естества, Насадителю твари вселенная приносит Ти, Господи, богоносныя мученики: тех молитвами в мире глубоце, Церковь Твою, жительство Твое Богородицею соблюди, Многомилостиве.

Тропари и кондаки Богородичные.

75.Богородичный тропарь великой вечерни, Глас 4:

Богородице Дево, радуйся, благодатная Марие, Господь с Тобою. Благословенна Ты в женах, и благословен Плод чрева Твоего, яко Спаса родила еси душ наших.

75.В праздники Богородичные

Тропарь, Глас 4:
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и Едину надежду имамы.
Ин тропарь, Глас тойже:
Не умолчим никогда, Богородице, силы Твоя глаголати недостойнии, аще бо Ты не бы предстояла молящи, кто бы нас избавил от толиких бед? Кто же бы сохранил доныне свободны? Не отступим, Владычице, от Тебе, Твоя бо рабы спасаеши присно от всяких лютых.
Кондак, Глас 6:
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.
Ин кондак, Глас 6:
Не имамы иныя помощи, не имамы иныя надежды, разве Тебе, Владычице, Ты нам помози, на Тебе надеемся и Тобою хвалимся, Твои бо есмы раби, да не постыдимся.

76.В субботу акафиста Похвала Богородице

Тропарь, Глас 8:
Повеленное тайно, прием в разуме, в крове Иосифове, тщанием предста бесплотный, глаголя Неискусобрачней: приклонивый схождением небеса, вмещается неизменно весь в Тя. Егоже и видя в ложеснах Твоих, приемша рабий зрак, ужасаюся звати Тебе: Радуйся, Невесто Неневестная.
Кондак, Глас 8:
Взбранной воеводе победительная, яко избавльшеся от злых, благодарственная восписуем Ти, раби Твои, Богородице. Но, яко имущая державу непобедимую, от всяких нас бед свободи, да зовем Ти: Радуйся, Невесто Неневестная.

77.Положению ризы

Тропарь, Глас 8:
Богородице Приснодево, человеков Покрове, ризу и пояс Пречистаго Твоего телесе, державное граду Твоему обложение даровала еси, безсеменным Рождеством Твоим, нетленна прибывающи: о Тебе бо и естество обнавляется и время. Темже молим Тя, мир граду Твоему даровати, и душам нашим велию милость.
Кондак,Глас4:
Одеяние всем верным нетления, Богоблагодатная Чистая, даровала еси священную ризу Твою, еюже священное тело Твое покрывала еси, Покрове всех человеков, еяже положение празднуем любовию, и вопием со страхом Ти, Чистая: радуйся, Дево, христиан похвало.
Кондак положению пояса, Глас 2:
Благоприятное Твое чрево, Богородице, объемший пояс Твой честный, держава граду Твоему необорима, и сокровище есть благих неоскудно, едина рождшая, Приснодево.
Ин кондак, Глас 4:
Честнаго пояса Твоего положение празднует днесь Твой, Препетая, храм, и прилежно взывает Ти: радуйся, Дево, христиан Похвало.

78. Покрову

Тропарь, Глас 4:
Днесь благовернии людие светло празднуем осеняемы Твоим, Богомати, пришествием, и к Твоему взирающе Пречистому образу, умильно глаголем: покрый нас честным Твоим Покровом, и избави нас от всякаго зла, молящи Сына Твоего Христа Бога нашего, спасти души наша.
Кондак, Глас 3:
Дева днесь предстоит в Церкви, и с лики святых невидимо за ны молится Богу, ангели со архиереи покланяются, апостоли же со пророки ликовствуют: нас бо ради молит Богородица Превечнаго Бога.

Тропари и кондаки иконам Божией Матери.

79. Боголюбская

Тропарь, Глас 1:
Боголюбивая Царице, неискусомужная Дево Богородице Марие! Моли за ны Тебе Возлюбившаго и рождшагося от Тебе Сына Твоего Христа Бога нашего, подати нам оставление прегрешений, и мирови мир, земли плодов изобилие, пастырем святыню и всему человечу роду спасение. Грады наша и страны Российския от нахождения иноплеменных заступи и от междуусобныя брани сохрани. О Мати Боголюбивая Дево! О Царице всепетая! Ризою Твоею покрый нас от всякаго зла, от видимых и невидимых враг защити, и спаси души наша.
<;FONT size=2>Ин тропарь, Глас 1:
Всепетая и Всеславная Царице Богородице, Мати всея твари Содетеля, христианская Надеждо и Заступнице, печальных Утешение, ненадеющихся и отчаявшихся скорое Надеяние! молим Тя, милостива буди нам грешным, и не остави раб Твоих, и не отрини моления верных, в скорбях и бедах пред честным образом Твоим избавления требующих. О Владычице, Благая Помощнице! Ризою Твоею честною нас защити и от всех зол избави, молящи Сына Твоего, Христа Бога нашего, да спасет души наша, яко Милосерд.
Кондак, Глас 3:
Дева днесь предстоит Сыну, руце Свои к Нему проостирающи, святый князь Андрей радуется, и с ним Российская страна торжествует, нас бо ради молит Богородица превечного Бога.

80. Взыскание погибших

 Тропарь, Глас 7:
Радуйся, Благодатная Богородице Дево, во объятиях Своих Предвечнаго Младенца и Бога носившая. Проси Его дати миру умирение и душам нашим спасение. Сын бо Тебе, Богомати, вещает, яко вся прошения Твоя во благое исполнит. Сего ради и мы припадающе, молимся и надеющиися на Тя, да не погибнем, имя Твое именуем: Ты бо еси Владычице Взыскание погибших.
Кондак общий Богородице (см. ╧ 76)

81. Владимирская

Тропарь, Глас 4:
Днесь светло красуется славнейший град Москва, яко зарю солнечную восприемши, Владычице, чудотворную Твою икону, к нейже ныне мы притекающе и молящеся, Тебе взываем сице: о, пречудная Владычице Богородице! Молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет души наша, яко Милосерд.
Кондак, Глас 8:
Взбранной воеводе победительная, яко избавльшеся от злых пришествием Твоего честнаго образа, Владычице Богородице, светло сотворяем празднество сретения Твоего и обычно зовем Ти: радуйся, Невесто Неневестная.

82. Всех скорбящих Радосте

Тропарь, Глас 4:
К Богородице прилежно ныне ритецем┘ (см. ╧ 76)
Стихира, поемая вместо тропаря, Глас 2:
Всех скорбящих Радосте, и обидимых Заступнице, и алчущих Питательнице, странных Утешение, обуреваемых Пристанище, больных Посещение, немощных покров и заступнице, Жезл старости, Мати Бога Вышняго Ты еси, Пречистая: потщися, молимся, спастися рабом Твоим.
Кондак общий Богородице, Глас 8:
Взбранной воеводе┘ (см. ╧ 76)

83. Гребневская

Тропарь, Глас 8:
Днесь, яко солнце пресветло, просия в Российстей стране, в конце ея полуденнем, всечестная икона Твоя, Владычице, юже благоверный великий князь Димитрий в град Москву принесе. Светло празднуем, благовернии людие, честнаго образа пришествие, молящеся прилежно: Владычице Богородице, молися Сыну Твоему, Христу Богу нашему, избавити град Москву, страну нашу и вся православныя христианы от варварскаго пленения, и междоусобныя брани, и всех навет вражиих, Тебе бо Едину Заступницу имамы.
Кондак, Глас тойже:
От святыя иконы Твоея, Богородице Дево, источаются исцеления, яко реки многи, яже видевше, российстии людие, сице глаголем: о Пресвятая Владычице Богородице, не забуди грешных раб Твоих, молящихся Христу Богу нашему спастися нам.

84.Державная

Тропарь, Глас 4:
Града Сионска взыскующе, под Твой покров, Дева Чистая, днесь притекаем, и никтоже возможет на ны, яко несть град силен, аще не Сущаго Бога, и несть ина крепость, аще не милость Владычицы Девы.
Ин тропарь, Глас тойже:
Ангелов лицы благоговейно Тебе служат, и вся небесныя силы немолчными гласы Тя ублажают, Богородице Дево; усердно молим Тя, Владычице, да пребудет Божественная благодать на честней иконе Твоей Державней, и светозарный луч славы чудес Твоих да нисходит от нея на всех с верою Тебе молящихся и вопиющих Богу: Аллилуия.
Кондак, Глас 8:
Взбранной воеводе победительныя песни приносим, яко даровася нам Держава Твоя, и ничесоже устрашимся, не от мира бо спасение наше, но Превознесенныя Владычицы милосердием ограждаемся и тому днесь радуемся, яко прииде Заступница на стражу земли Своея.

85.Донская

Тропарь, Глас 4:
Заступнице верных Преблагая и Скорая, Пречистая Богородице Дево! Молим Тя пред святым и чудотворным образом Твоим, да, якоже древле от него заступление Твое граду Москве даровала еси, тако и ныне нас от всяких бед и напастей милостивно избави, и спаси души наша, яко Милосердая.
Ин тропарь, глас тойже:
Всепетая и Всеславная Царице Богородице, Мати всея твари Содетеля, христианская надеждо и Заступнице, ненадеющимся и отчаявшимся скорое надеяние, молим Тя: милостива буди нам, грешным, не остави раб Твоих и не отрини моления недостойных. Молимся, взирающе ко образу Твоему честному святыя и чудотворныя иконы Твоея и вопиюще: с плавающими и путешествующими да пребудет милость Твоя. О Владычице, ризою Твоею честною защити, и во всяких местех злых верныя соблюди, и молися к Рождшемуся из Тебе Христу Богу нашему, да спасет от грех души наша.
Кондак, Глас 2:
Небесныя обители преселившаяся с плотию, сущия на земли никакоже оставила еси, Богородице, образ Божественный и многочудесный Пречистаго Лица Твоего зрети любящим Тя и покланятися даровала еси, яко знамение Твоея благодати; чтим его, лобызающе.

86. Достойно есть, или Милующая

Тропарь, Глас 4:
Притецем, вернии, со дерзновением к Милующей Царице Богородице и умиленно воззовем к Ней: ниспосли на ны милости Твоя богатыя: град сей избави от всякаго обстояния, мир даруй мирови и спасение душам нашим.
Кондак, Глас 4:
Празднует днесь весь Афон, яко песнь прият от ангела чудно Тебе, Чистей Богоматери, Юже вся тварь чтит, славящи.
Ин кондак, Глас 8:
Архангельский глас вопием Ти, Всецарице: достойно есть, яко воистинну, блажити Тя, Богородицу, Присноблаженную и Пренепорочную, и Матерь Бога нашего.

87. Живоносный Источник 

Тропарь, Глас 2:
Источник еси воистинну воды живыя, Владычице, недуги бо душ и телес лютыя прикосновением единым Твоим измываеши, Воду спасения Христа изливающи.
Кондак, Глас 8:
От неистощимыя Ты, источниче богоблагодатный, подаеши ми, точащи воды Твоея благодати, приснотекущий паче слова. Яко бо Слово рождшая паче смысла, молю Ти ся, ороси мя благодатию, да зову Ти: радуйся, Водо спасительная.

88. Жировицкая

Тропарь, Глас 2:
Помощи от Тебе требующия не презри, Владычице, и милосердия бездну отверзи всем притекающим к цельбоносней иконе Твоей. Печали наша житейская утоли, Всещедрая, и от юдоли сея плачевныя к радости вечной верныя Твоя престави. Тебе бо вси стяжахом, надежду и утверждение, милости источник, покров и спасение душ наших.
Ин тропарь, Глас 5:
Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают Темже и нам, к Тебе припадающим, грехов оставления испроси, помыслами благочестия сердца наша проствети и к Сыну Твоему молитву вознеси о спасении душ наших.
Кондак, Глас 4:
Величия Твоя кто исповесть, Пресвятая Дево, Творца всех Христа Бога Рождшая? Едина бо еси Мати и Дево, Преблагая, Препрославленная, упование наше, источник благостыни, верным прибежище и миру спасение.

89. Знамение

Тропарь, Глас 4:
Яко необоримую стену и источник чудес стяжавше Тя раби твои, Богородице Пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.

Кондак, глас 4:
Честнаго образа Твоего знамение празднующе людие Твои, Богородительнице, имже дивную победу на сопротивныя граду Твоему даровала еси. Темже Тебе верою взываем: радуйся, Дево, христиан Похвало.

90. Иверская

Тропарь, Глас 1:
От святыя иконы Твоея, о Владычице Богородице, исцеления и цельбы подаются обильно с верою и любовию приходящим к ней, тако и мою немощь посети, и душу мою помилуй, Благая, и тело исцели благодатию Твоею, Пречистая.
Ин тропарь, Глас тойже:
Дерзость ненавидящих образ Господень, и держава нечестивых безбожно в Никею прииде, и посланнии безчеловечно вдовицу, благочестно чтущую икону Богоматере, истязуют. Но тая нощию с сыном икону в море пусти, вопиющи: слава Тебе, Чистая, яко непроходимое море плещи своя подаде, слава правошествию Твоему, едина нетленная.
Кондак, Глас 8:
Аще и в море ввержена бысть святая икона Твоя, Богородице, от вдовицы, не могущия спасти сию от врагов, но явилася есть хранительница Афона и вратарнтца обители Иверския, враги устрашающая и в православней Российстей стране чтущия Тя от всех бед и напастей избавляющая.

91. Иерусалимская

Тропарь, Глас 4:
Богорадованная Владычице, препрославленная Мати Щедрот и Человеколюбия, всемилостивая о всем мире Ходатаице! Прилежно раби Твои ко Твоему предстательству прибегаем, и ко пречудному образу Твоему со умилением припадающе молимся: молитву теплую Сыну Твоему и Богу нашему сотвори, о Всепетая Царице Богородице, да от всяких болезней и печалей нас Тебе ради избавит, и от грехов всяких свободив, Царствия Своего Небеснаго наследники ны покажет: всяких свободив, велие бо и неизреченное яко Мати к Нему дерзновение имаши, и вся от Него испросити можеши, едина во веки Преблагословенная.
Кондак, Глас 3:
Твоего предстательства уверение и милосердия Твоего явление икона Иерусалимская нам, Владычице, показася. Пред нею же души наша в молитве излеваем и верою Тебе вопием: воззри, Милосердная, на люди Твоя, вся скорби наша и печали утоли, утешение благое в сердца наша низпосли и спасение вечное душам нашим, Пречистая, испроси.

92. Избавительница

Тропарь, Глас 4:
Избавление приносящая всем, от сердца Тебе призывающим, принеси избавление скорое и нам, в лютых бедах погибающим и в Тебе Единой избавление наше на Бозе полагающим.
Ин тропарь, Глас 4:
Яко пресветлая звезда, просия Божественными чудесы святой Твой образ Избавительницы, лучами благодати и милосердия Твоего озарив в нощи скорбей. Подаждь убо и нам, Всеблагая Дево, избавление недугов телесных, спасение и велию милость.
Кондак, Глас 4:
Ко иконе Твоей, Пресвятая Госпоже, бедствовавшии с верою притекше, заступлением Твоим избавитися от злых, но яко Матерь Христа Бога, и нас свободи от лютых обстояний, временных и вечных, да зовем Ти: радуйся, Избавительнице, от всех бед.

93. Казанская

Тропарь, Глас 4:
Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим. Всех нас заступи, о Госпоже Царице и Владычице, иже в напастех и в скорбех, и в болезнех, обремененных грехи многими, предстоящих и молящихся Тебе умиленною душею и сокрушенным сердцем, пред пречистым Твоим образом со слезами, и невозвратно надежду имущих на Тя, избавления всех зол, всем полезная даруй, и вся спаси, богородице Дево: Ты бо еси Божественный Покров рабом Твоим.
Кондак, Глас 8:
Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы, ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь, и избавляет от великих бед и зол благонравныя и богобоящияся рабы Своя.

94.Коневская

Тропарь, Глас 1:
Возсия нам, яко солнце светозарное, от востока в велелепии Твоя, Владычице, икона, озаряющи чудес сиянием преславно всех, непрестанно приходящих к ней с верою и любовию, и молящихся усердно Твоему еже о Сыне Твоем и Бозе величию. Слава Богу, Арсением сию давшему нам, слава Возвратившему ю от Новаграда, слава Действующему Тою всем исцеления.
Кондак, Глас 8:
Препрославленная Вышняго Мати созывает к песнопению нас Своего образа пришествием от Новаграда, и возбуждает зрением того на подвиг, побеждати сопротивных силу, и к Ней, яко нашея радости виновней, пети: радуйся, Невесто Неневестная.

95.Млекопитательница

Тропарь, Глас 3:
Без семени от Божественнаго Духа, волею же Отчею зачала еси Сына Божия, от Отца без матере прежде век суща, нас же ради из Тебе без отца бывша, плотию родила еси и Младенца млеком питала еси, темже не престай молити избавитися от бед душам нашим.
Кондак, Глас 5:
Душ наших чувствия очистивше, узрим на иконе таинство преславное, Творца Вселенной и Господа вышних сил, во объятиих держима и от сосцу Твоею яко Младенца питаема, и, со страхом и радостию покланяющеся Тебе и рождшемуся от Тебе Спасу нашему, воззовем: радуйся, Владычице, жизни нашея Питательнице.

96.Неопалимая Купина

Тропарь, Глас 4:
Иже в Купине, огнем горящей и несгораемей, показавый Моисеови Пречистую Твою Матерь, Христе Боже, огнь Божества неопальне во чреве Приимшую и нетленну по Рождестве Пребывшую, Тоя молитвами от пламене страстей избави нас и от огненных запалений град Твой сохрани, яко Многомилостив.
Кондак, Глас 8:
Предочистим чувствия душ и телес наших, да видим таинство Божественное, образно явленное древле великому во пророцех Моисею купиною, горевшую огнем и не сгаравшею, в нейже Твоего безсеменнаго Рождества, Богородице, предвозвещение исповедуем, и, благоговейно покланяющеся Тебе и Рождшемуся от Тебе Спасу нашему, со страхом вопием: радуйся, Владычице, Покрове, и Прибежище, и Спасение душ наших.

97.Нечаянная Радость

Тропарь, Глас 4:
Днесь вернии людие духовно торжествуем, прославляюще Заступницу усердную рода христианскаго и притекающе к пречистому Ея образу, взываем сице: о, Премилостивая Владычице Богородице, подаждь нам нечаянную радость, обремененным грехи и скорбьми многими, и избави нас от всякаго зла, молящи Сына Твоего, Христа Бога нашего, спасти души наша.
Кондак общий Богородице (см. ╧ 76)

98.Неупиваемая Чаша

Тропарь, Глас 4:
Днесь притецем вернии к Божественному и пречудному образу Пресвятыя Богоматери, напояющей верных сердца небесною Неупиваемою Чашею Своего милосердия и людем верным чудеса показующей. Яже мы видяще и слышаще духовно празднуем и тепле вопием: Владычице премилостивая, исцели наша недуги и страсти молящи Сына Твоего Христа Бога нашего спасти души наша.

99. Почаевская

Тропарь, Глас 5:
Пред святою Твоею иконою, Владычице, молящиися исцелений добляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети, и к Сыну Твоему молитву вознеси о спасении душ наших.
Кондак, Глас 1:
Источник исцелений и веры православныя утверждение Почаевская Твоя икона, Богородице, явися: темже и нас, к ней притекающих, от бед и искушений свободи. Лавру твою невредиму сохрани, Православие во окрест стоящих странах утверди, и грехи разреши молитвенник твоих: елика бо хощеши, можеши.

100. Прибавление ума

Тропарь, Глас 3:
Волею Отца Небеснаго зачала Сына Божия, без семени земнаго отца, прежде творения мира от отца без матери Рожденнаго плотию родила еси, и Егоже моли о даровании нам ума ко спасению душ наших.
Кондак, Глас 6:
Рожденнаго Духом от Отца Небеснаго, прежде сотворения денницы, Тобою плотию Рожденнаго без Отца, не нарушив девства, Того умоли помочь нам победить завистью одержимаго падшаго денницу. Да одержим полную победу над дьяволом, миром и плотию, Твоими молитвами, Богоневестная.

101.Семистрельная, или Умягчение злых сердец

Тропарь, Глас 5:
Умягчи наша злая сердца, Богородице, и напасти ненавидящих нас угаси и всякую тесноту души нашея разреши, на Твой бо святый образ взирающе, Твоим состраданием и милосердованием о нас умиляемся и раны Твоя лобызаем, стрел же наших, Тя терзающих, ужасаемся. Не даждь нам, Мати Благосердная, в жестосердии нашем и от жестосердия ближних погибнути, Ты бо еси воистину злых сердец умягчение.
Кондак, Глас 2:
Благодатию Твоею, Владычице, умягчи сердца злодеев, низпосли благодетелей, соблюдающи их от всякаго зла, благомолящимся Ти усердно пред честными иконами Твоими.

102.Скоропослушница

Тропарь, Глас 4:
К Богородице притецем, сущии в бедах, и ко святей иконе Ея ныне припадем, с верою зовуще из глубины души: скоро наше услыши моление, Дево, яко Скоропослушница нарекшаяся, Тебе бо раби Твои в нуждах готовую Помощницу имамы.
Кондак, Глас 8:
В мори житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, всеблагая Скоропослушнице.

103.Смоленская

Тропарь и кондак общие Богородице (см. ╧ 76)

104.Софии, Премудрости Божии

Тропарь, Глас 1:
Превечная Премудросте, Христе Боже наш! Божественным смотрением Своим преклонивый Небеса, благоволил еси вселитися во утробу Чистыя Отроковицы, средостение вражды разрушив, освятил еси естество наше и Царствие Твое нам отверзл еси; сего ради Тебе, Творца нашего и Избавителя, и рождшую Тя, спасения нашего тайне послужившую Деву Чистую, православно величаем.
Ин тропарь, Глас 4:
Велия и неизреченная Премудрости Божии сила смотрения плотскаго таинства! Софие Преименитая, девственных душе и неизглаголаннаго девства чистоте, смиренныя мудрости истине, покоище Святаго Духа, пречестный храме непостижимыя славы Его, огнезрачный престоле Христа Бога нашего, в Тя бо вселися неизреченно Слово Божие, и плоть бысть, Невидимый явися, и неприкосновенный из Тебе изыде, и с человеки поживе, врага исконнаго уловляя и человеки от клятвы древния свобождая, возводя паки, отнюдуже испадохом. Молимтися, Владычице, отягченныя ны во гресех лютых помиловати и спасти души наша, и, яко человеколюбивая и милосердая Царица, Мати Премудрости Божия Слова, призри на ны, грешныя люди Твоя, и умилосердися, заступи от напастей и скорбей лютых и грады наша невредимы сохрани, идеже ныне Имя Твое пресвятое благолепно славится.
Кондак, Глас 4:
Притецем, православнии людие, к Премудрости Божии и видим чудотворную икону Пречистыя Богоматере, Юже именуем по явлению Софию, Премудрость Божию, зане храм бысть одушевлен Единороднаго Сына и Слова Божия. Сия убо светолучно сияет в пречестнем храме Своем и сердца наша веселит, приходящих с верою и взирающих со страхом и благоговением на пречистую сию икону, помышляюще в сердцах наших, яко воистинну Премудрости Божии есть селение и таинства Его смотрение, на упование бо верным воображение огнезрачное Ея зрим и покланяемся, яко истинному и пренепорочному Ея девству в рождестве и по рождестве паки; от Неяже изыде Огнь Божественный, попаляя тленные страсти и просвещая души наша и чисты сотворяя, Имже и веки сотвори Отец, Той же и Мудрость, Слово и Сила наречется, сияние славы и Образ Отчи Ипостаси. И паки убо молим и, припадающе, лобызаем пречестную икону Премудрости Божия Матере и велигласно вопием: о, Милосердая Владычице, спаси рабы Своя от насилия диавола, от нахождения иноплеменных и междоусобныя брани, яко Ты еси всех благих Подательница и Покровительница притекающим к Тебе с верою и просящим велия милости.

105.Споручница грешных

Тропарь, Глас 4:
Умолкает ныне всякое уныние и страх отчаяния исчезает, грешницы в скорбех сердца обретают утешение и небесною любовию озаряются светло. Днесь бо Мати Божия простирает к нам спасающую руку и от Пречистаго образа Своего вещает, глаголя: Аз Споручница грешных к Моему Сыну, Сей дал Мне за них руце слышати Мя выну. Темже людие, обремененнии грехми и скорбьми многими, припадите к подножия Ея иконы со слезами, вопиюще: Заступнице мира, грешных Споручнице! Умоли Матерними Твоими молитвами Избавителя всех, да Божественным всепрощением покрыет грехи наша и светлыя двери райския отверзет нам, Ты бо еси предстательство и спасение рода христианскаго.
Кондак, Глас 1:
Честное Жилище бывшее неизреченнаго естества Божественнаго выше слова и паче ума, и грешным еси Споручница, подаваеши благодать и исцеления, яко Мати всех Царствующаго, моли Сына Твоего, получити нам милость в день судный.

106.Спорительница хлебов

Тропарь, Глас 3:
Пречистая Дево Марие, Мати Царя небеси, благоутробно призираеши на любящих Сына Твоего, Христа Бога нашего, и труждающихся во Имя Его вечнаго ради спасения, и подаеши им вся обильно к наслаждению. Спорительнице сущи хлебов им, избавляя их всякия нужды и утеснения и устрояя им, рабом Твоим сущим, избавление вечныя муки и жизнь вечную.
Кондак, Глас 1:
Честное Жилище бывшее неизреченнаго естества Божественнаго выше слова и паче ума, и грешным еси Споручница, подаваеши благодать и исцеления, яко Мати всех Царствующаго, моли Сына Твоего, получити нам милость в день судный.

107.Страстная

Тропарь, Глас 4:
Днесь возсия неизреченно царствующему граду нашему Москве икона Богоматере и яко светозарным солнцем, пришествием Тоя озарися весь мир. Небесныя силы и души праведных мысленно торжествуют, радующеся, мы же на Ню взирающе, к Богородице со слезами вопием: о, Всемилостивая Госпоже, Владычице Богородице, молимся из Тебе воплощенному Христу Богу нашему, да подаст мир и здравие всем христианом по велицей и неизреченней Своей милости.
Кондак, Глас 3:
Благодать прияхом нетления еже даровала еси нам, спасительнаго Твоего целения чудотворным Твоим образом честным, Богородице Дево, темже вопием Ти и с радостию зовем, Госпоже Царице, молимтися умильно, грешнии, со слезами глаголюще: о Пресвятая Владычице, скорое нам яви заступление и помощь, спаси ны от супостат наших и от всякия скорби соблюди, землю нашу миром огради, и вся люди Твоя покрый, и соблюди на Тя уповающия, потщися избавити, да не погибнем зле, раби Твои, но да зовем Ти: радуйся, Невесто Неневестная.

108.Тихвинская

Тропарь, Глас 4:
Днесь, яко солнце пресветлое, возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный свыше благоговейне восприимши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих и спасет верою поклоняющихся Его Божественному и Твоему пречистому образу, Дево Неискусобрачная.
Кондак, Глас 4:
Притецем, людие, к Деве Богородице Царице, благодаряще Христа Бога, и к Тоя чудотворней иконе умильно взирающе припадем, и возопием Ей: о Владычице Марие! Присетивши страну сию Твоего честнаго образа явлением чудесно, спасай в мире и благовременстве вся христианы, наследники показующи небесныя жизни. Тебе бо верно зовем: радуйся, Дево, мира спасение.

109.Толгская

Тропарь, Глас 4:
Днесь светло сияет на Толге образ Твой, Пречистая Дево Богородице, и, яко солнце незаходимое, всегда верным подадеся, егоже видев на воздусе, невидимо Ангелы, яко никим, держима, преосвященный епископ града Ростова Трифон тече ко явленному светящемуся столпу огненну, и по водам, яко по суху, прейде, и молящеся Ти верно о пастве и о людех. И мы, к Тебе притекающе, зовем: Пресвятая Дево Богородице, верно Тя славящих спасай, страну нашу, архиереев и вся Российския народы от всех бед избавляй по велицей Твоей милости.
Кондак, Глас 8:
Чудное и богоприятное светоноснаго зрака Твоего явление, Пречистая Дево, с верою взирающим бывает известное чаяние спасения, столпом бо огненным являющи предстательство, неусыпное и теплое за ны к Богу возсылаеши моление, имже страну Российскую от всяких бед избави, молимся, да радостными усты вопием Ти вси: радуйся, Предводительнице вечнаго блаженства.

110. Троеручица

Тропарь, Глас 4:
Днесь всемирная радость возсия нам велия, даровася святей горе Афонстей цельбоносная Твоя, Владычице Богородице, икона, со изображением тричисленно и нераздельно пречистых рук Твоих, в прославление Святыя Троицы, созываеши бо верных и молящихся Тебе о сем познати, яко двема имаши Сына и Господа держати, третию же яви на прибежище и покров чтущих Тя, и от всяких напастей и бед избавляти, да вси, притекающии к Тебе верою, приемлют неоскудно от всех зол свобождение, от врагов защищение. Сего ради и мы вкупе с Афоном вопием: радуйся, Благодатная, Господь с Тобою.
Кондак, Глас 8:
Днесь веселое наста ныне Твое торжество, Богомати Пречистая, вси вернии исполнишася радости и веселия, яко сподобльшеся изрядно воспети предивное явление честнаго образа Твоего и рождшагося из Тебе Младенца, истинна же Бога, Егоже двема рукама объемлеши, и третиею от напастей и бед нас изымаеши, и избавляеши от всех зол и обстояний.

111.Умиление

Тропарь, Глас 4:
К Богородице с умилением припадем, вси грехми обремаененнии, чудотворную Ея икону Умиление облобызающе и вопиюще со слезами: Владычице, приими моление недостойных раб Твоих и подаждь нам, просящим, велию Твою милость.
Кондак, Глас 3:
Юже подражая неплодную смоковницу, аз, окаянный, умиления плода отнюд не приношу и посечения страшуся, но, взирая к чудотворней иконе Твоей Умиления, Владычице, стеню от сердца и вопию: умилися, Благосердая, и мне, окамененному сердцем, благоволи подати душевное и сердечное умиление.

112.Утоли моя печали

Тропарь, Глас 5:
Утоли болезни многовоздыхающия души моея, утолившая всякую слезу от лица земли: Ты бо человеком болезни отгониши и грешных скорби разрушаеши, Тебе бо вси стяжахом надежду и утверждение, Пресвятая Мати Дево.
Кондак, Глас 6:
Предстательство христиан непостыдное┘ (см. ╧ 76)

113.Феодоровская

Тропарь, Глас 4:
Пришествием честныя Твоея иконы, Богоотроковице, обрадованный днесь Богохранимый град Кострома, якоже древний Израиль к кивоту Завета, притекает ко изображению лица Твоего и воплотившагося от Тебе Бога нашего, да Твоим Матерним к Нему предстательством присно ходатайствуеши всем, под сень крова Твоего прибегающим, мир и велию милость.
Кондак, Глас 8:
Благодарственная приносяще Ти, раби Твои, Богородительнице, о всех, имиже благодеяла еси граду нашему, из глубины души взываем к Тебе и мили ся деем: не престани, Владычице, Матерними к Сыну Твоему и Богу нашему молитвами подавати вся благая и спасительная всем, верою и любовию вопиющим Ти: радуйся, Дево, христиан похвало.

114.Целительница

Тропарь, Глас 1:
Любовию, Чистая Дево, Твою святую икону почитающим, и Божию Тя истинную Матерь прославляющим, и верно поклоняющимтися Целительница явися, всякое зло и болезни от сих удаляющая, яко Всемогущая.
Кондак общий Богородице (см. ╧ 76)

Тропари и кондаки Небесным Силам бесплотным.

115.Бесплотным Силам общий

Тропарь, Глас 4:
Небесных воинств Архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны припадающия прилежно и вопиющия: от бед избавити ны, яко чиноначальницы Вышних Сил.
Кондак, Глас 2:
Архистратизи Божии, служителие Божественныя славы, Ангелов начальницы, и человеков наставницы, полезное нам просите, и велию милость, яко Безплотных Архистратизи.

116.Архангелу единому

Тропарь, Глас 4:
Небесных воинств Архистратиже, молим Тя присно мы недостойнии, да твоими молитвами оградиши нас кровом крил невещественныя твоея славы, сохраняя ны, припадающия прилежно и вопиющия: от бед избави ны, яко чиноначальник Вышних Сил.
Кондак, Глас 2:
Архистратиже Божий, служителю Божественныя славы, Ангелов начальниче, и человеков наставниче, полезное нам проси, и велию милость, яко безплотных Архистратиг.

117. Архангелу Гавриилу

Тропарь общий, Глас 4:
Небесных воинств Архистратиже┘
Кондак, Глас 8:
Пресветлыя и Честныя, и Вседетельныя, Пренеисчетныя и Страшныя Троицы, ты еси, Архистратиже, славный служителю и молитвенниче, ныне непрестанно моли избавитися нам от всяких бед и мук, да зовем ти: радуйся, покрове рабом твоим.
Ин кондак, Глас 2:
На Небесех зря Божию славу и на земли с высоты подая благодать, начальниче Ангелов, мудре Гаврииле, Божия славы служителю и мира Божественный поборниче, спасай, соблюдай вопиющия ти: сам буди помощник, и никтоже на ны.

118.Ангелу хранителю

Тропарь, Глас 6:
Ангеле Божий, хранителю мой святый, живот мой соблюди со страсе Христа Бога, ум мой утверди во истеннем пути, и к любви горней уязви душу мою, да тобою направляем, получу от Христа Бога велию милость.
Кондак, Глас 4:
Явися мне милосерд, святый Ангеле Господень, хранителю мой, и не отлучайся мене сквернаго, но просвети мя светом неприкосновенным и сотвори мя достойна Царствия Небеснаго.

Тропари и кондаки святым.

118.Всем святым (неделя 1-я по Пятидесятнице)

Тропарь. Глас 4:
Иже во всем мире мученик Твоих...(см. тропарь и кондак в Неделю всех святых Триоди Цветной, N74)

119.Всем святым, в земли Российстей просиявшим (неделя 2-я по Пятидесятнице)

Тропарь, Глас 8:
Якоже плод красный Твоего спасительнаго сеяния, земля Российская приносит Ти, Господи, вся святыя в той просиявшия. Тех молитвами в мире глубоце церковь и страну нашу Богородицею соблюди, Многомилостиве.
Кондак, Глас 3:
Днесь лик святых в земли нашей Богу угодивших предстоит в церкви и невидимо за ны молится Богу; Ангели с ним славословят и вси святии Церкве Христовы ему спразднуют: о нас бо молят вси купно Превечнаго Бога.

120.Всем святым субботы

Тропарь, Глас 2:
Апостоли, мученицы и пророцы...(см.N13)

121.Святым праотцам

Тропарь, Глас 2:
Верою праотцы оправдал еси, от язык теми предобручивый Церковь; хвалятся в славе святии, яко от семене их есть Плод благословен, без семене Рождшая Тя. Тех молитвами, Христе Боже, помилуй нас.
Кондак, Глас 6:
Рукописаннаго образа не почетше, но неописанным Существом защитившеся, треблаженнии, в подвизе огня прославистеся, среде же пламене нестерпимаго стояще, Бога призвасте: ускори, о Щедрый, и потщися, яко Милостив, в помощь нашу, яко можеши хотяй.

122.Святым отцам

Тропарь, Глас 2:
Велия веры исправления: во источнице пламене, яко на воде упокоения, святии трие отроцы радовахуся, и пророк Даниил львом пастырь, яко овцам, являшеся. Тех молитвами, Христе Боже, спаси души наша.
Кондак, Глас 6:
Рукописаннаго образа...(см. предыдущий)

123.Святым отцам Седмого Вселенского Собора

Тропарь, Глас 8:
Препрославлен еси, Христе Боже наш, светила на земли отцы наши основавый, и теми ко истенней вере вся ны наставивый, Многоблагоутробне, слава Тебе.
Кондак, Глас 6:
Иже из Отца возсияв Сын неизреченно, из Жены родися сугуб естеством, Егоже видяще, не отметаемся зрака изображения, но сие благочестно начертающе, почитаем верно: и сего ради истинную веру Церковь держащи, лобызает икону вочеловечения Христова.

124.Свв. Новомученикам и исповедникам Российским

Тропарь, Глас 4:
Днесь радостно ликует Церковь Русская, яко мати чада, прославляющи новомученики и исповедники своя: святители и иереи, царственныя страстотерпцы, благоверныя князи и княгини, преподобныя мужи и жены и вся православныя христианы, во дни гонения безбожнаго жизнь свою за веру во Христа положившия и кровьми Истину соблюдшия. Тех предстательством, Долготерпеливе Господи, страну нашу в Православии сохрани до скончания века.
Кондак, Глас 3:
Днесь новомученицы Российстии в ризах белых предстоят Агнцу Божию и со Ангелы песнь победную воспевают Богу: Благословение, и слава, и премудрость, и хвала, и честь, и сила, и крепость нашему Богу во веки веков. Аминь.

Творение Русской Православной Церкви за границей
Тропарь, Глас 4:
Цвети Российскаго луга духовнаго в годину лютых гонений дивно процветшии новомученицы и исповедницы бесчисленнии, святителие, царственнии страстотерпцы и пастырие, монаси и мирстии, мужие, жены же и дети, добрый плод в терпении Христу принесшии, молитеся Ему яко насадителю вашему, да избавит люди своя от безбожных и злых, да утверждается же Церковь Русская кровьми и страдании вашими во спасение душ наших.
Кондак, Глас 2:
Новии страстотерпцы российстии, исповеднически поприще земное претекшии, страданьми дерзновение приимши, молитеся Христу, вас укрепившему, да и мы, егда найдет на ны испытания час, мужества дар Божий восприимем. Образ бо есте лобызающим подвиг ваш, яко ни скорбь, ни теснота, ни смерть от любве Божия разлучити вас не возмогоша.

125.Киево-Печерским отцам Тропарь, Глас 4:
Мысленное солнце и светлую луну первоначальных Печерских, со всем собором преподобных днесь почтим, тии бо церковную твердь озаряюще просвещают во тьме страстей бедствующих, и подают от Христа Бога молитвами своими помощь во всех скорбех и душам нашим просят избавления.
Кондак, Глас 8:
Избраннии от родов угодницы Божии, святии преподобнии Печерскии, на сих горах добродетельми просиявшии, вас земля не потаила есть, но небо отверзеся вам и райское селение. Темже мы похвальныя песни Богу прославльшему вас в памяти вашей приносим: вы же яко имущии дерзновение, ваш собор почитающих от всех бед молитвами вашими заступайте, яко заступницы наши и к Богу ходатаи.

126.Киево-Печерским отцам в Ближних пещерах

Тропарь, Глас 2:
Егда снидосте во гробы и самех себя заключисте, тогда страсти умертвивше плотския, спогребостеся Христу, богоноснии, и диавольския в подземных разрушисте ограды: сего ради Ангели венцы с небес вам подают.
Кондак, Глас 8:
Отцы всечестнии, личе богокрасный, чудес многих источницы, миро источающии, сокровища краснобогатная Господня, в земли сокровенная, не престайте, молим вы, о нас молитися ко Господу, да зовем вам: радуйся, всему миру светильницы.

Тропари и кондаки пророкам.

127.Пророку единому

Тропарь, Глас 2:
Пророка Твоего (имярек) память, Господи, празднующе, тем Тя молим: спаси души наша.
Кондак, Глас 4:
Просветившееся духом чистое твое сердце, пророчества бысть светлейшего приятелище: зриши бо яко настоящая далече сущая. Сего ради тя почитаем, пророче блаженне, (имярек) славне.

128.Пророкам общий

Тропарь, Глас 2:
Пророков Твоих память, Господи, празднующе, теми Тя молим: спаси души наша.

129.Даниилу и трем отрокам Ананию, Азарию и Мисаилу

Тропарь, Глас 2:
Велия веры исправления, во источнице пламене, яко на воде упокоения, святии трие отроцы радовахуся, и пророк Даниил львом пастырь яко овцам являшеся. Тех молитвами, Христе Боже, спаси души наша.
Кондак, Глас 3:
Просветившееся духом чистое твое сердце, пророчества бысть светлейшаго приятелище, зриши бо яко настоящая далече сущая, львы укротил еси, ввержен в ров; сего ради тя почитаем, пророче блаженне, Данииле славне.
Кондак отрокам, Глас 6:
Рукописаннаго образа не почетше, но Неописанным Существом защитившеся, треблаженнии, в подвизе огня прославистеся, среде же пламене нестерпимаго стояще, Бога призвасте: ускори, о Щедрый, и потщися, яко Милостив в помощь нашу, яко можеши хотяй.

130.Елиссею

Тропарь, Глас 4:
Иже во плоти ангел, и пророков начальнику свидетельствова, славный Елиссее, дивны чудеса соделал еси, пророче, поспешеством Святаго Духа; силою Илииною исцелив водное естество, звери же погуби, пожирающия, и Неемана очисти, и вдовича сына воскресил еси, и всем чтущим тя даруй благодать и исцеление.
Кондак, Глас 2:
Пророк Божий явился еси, сугубую благодать прием, воистинну достойную тебе, Елиссее блаженне: Илии бо был еси совсельник, с ним же Христу Богу молися непрестанно о всех нас.

131. Захарии, отцу Иоанна Предтечи

Тропарь, Глас 4:
Священства одеждою обложен, премудре, по закону Божию всесожжения приятна священнолепно приносил еси, Захарие, и был еси светильник и зритель тайных, знамения в тебе благодати нося явственно, всемудре, и мечем убиен быв в храме Божии, Христов пророче, с Предтечею моли, спастися душам нашим.
Кондак, Глас 3:
Пророк днесь и священник Вышняго, Захария, предложи Предтечев родитель трапезу своея памяти, верныя питая: питие бо правды всем растворив, сего ради скончавается, яко Божественный таинник Божия благодати.

132. Крестителю Спасову Иоанну Предтече

Тропарь, Глас 2:
Память праведнаго с похвалами, тебе же довлеет свидетельство Господне, Предтече: показал бо ся еси воистину и пророков честнейший, яко и в струях крестити сподобился еси Проповеданнаго. Темже за истину пострадав радуяся, благовестил еси и сущим во аде Бога явльшагося плотию, вземлющаго грех мира, и подающаго нам велию милость.
Кондак, Глас 6:
Плотскаго Твоего пришествия убоявся Иордан, страхом возвращашеся, пророческое же служение исполняя Иоанн, трепетом спряташеся, Ангельстии чини ужасахуся, зряще Тя во струях плотию крещаема, и вси сущии во тьме озаряхуся, воспевающе Тя, явльшагося и просветившаго вся.
Кондак усекновению, Глас 5:
Предтечево славное усекновение, смотрение бысть некое Божественное; да и сущим во аде Спасово проповесть пришествие. Да рыдает убо Иродиа, беззаконное убийство испросивши: не закон бо Божий, ни живый век возлюби, но притворный, привременный.

Рождеству Иоанна Предтечи

Тропарь, Глас 4:
Пророче и Предтече пришествия Христова, достойно восхвалити тя недоумеем мы, любовию чтущии тя: неплодство бо рождшия и отчее безгласие разрешися славным и честным твоим рождеством, и воплощение Сына Божия мирови проповедуется.
Кондак, Глас 3:
Прежде неплоды, днесь Христова Предтечу раждает, и той есть исполнение всякаго пророчества, Егоже бо пророцы проповедаша, на Сего во Иордане руку положив, явися Божия Слова пророк, проповедник вкупе и Предтеча.

Первому и второму обретению главы Иоанна Предтечи

Тропарь, Глас 4:
От земли возсиявши Предтечева глава, лучи испущает нетления, верным исцелений, свыше собирает множество Ангел, доле же созывает человеческий род, единогласную возсылати славу Христу Богу.
Кондак, Глас 2:
Пророче Божий и Предтече благодати, главу твою яко шипок священнейший от земли обретше, исцеления всегда приемлем, ибо паки, якоже прежде в мире проповедуеши покаяние.

Третьему обретению главы Иоанна Предтечи

Тропарь, Глас 4:
Яко Божественное сокровище сокровенное в земли, Христос откры главу твою нам, Пророче и Предтече. Вси убо сошедшеся в сея обретение, песньми богоглаголивыми Спаса воспоим, спасающа нас от тления молитвами твоими.
Кондак, Глас 6:
Светоявленный и Божественный в мире столп, солнца светильник, Предтеча, главу светоносную и Божественную свою показавый в концех, освящает той верно покланяющихся и взывающих: Христов премудрый Крестителю, спаси всех нас.

133.Илие

Тропарь, Глас 4:
Во плоти Ангел, пророков основание, вторый предтеча пришествия Христова Илия славный, свыше пославый Елисееви благодать, недуги отгоняти и прокаженныя очищати. Темже и почитающим его точит исцеления.
Кондак, Глас 2:
Пророче и провидче великих дел Бога нашего, Илие великоимените, вещанием твоим уставивый водоточныя облаки, моли о нас Единаго Человеколюбца.

134. Исаие

Тропарь общий:Пророка Твоего... (см. N127)
Кондак, Глас 2:
Пророчества дарование прием, пророкомучениче, Исаие Богопроповедниче, всем изъяснил еси вочеловечение Господне, возгласив велегласно концем: се Дева во чреве приимет.

135.Моисею

Тропарь, Глас 2:
На высоту добродетелей восшел еси, пророче Моисее; и сего ради сподобился еси видети славу Божию. Скрижали благодатныя Закона прият, и начертаний благодать в себе нося, и пророков был еси честная похвала, и благочестия великое таинство.
Кондак, Глас 2:
Лик пророческий с Моисеем и Аароном веселием днесь веселится, яко конец пророчествия их на нас исполнися; днесь сияет Крест, имже нас спасл еси. Тех молитвами Христе Боже помилуй нас.

Тропари и кондаки апостолам и равноапостольным святым.

136. Апостолу единому:

Тропарь, Глас 3:
Апостоле святый (имярек), моли Милостиваго Бога, да прегрешений оставление подаст душам нашим.
Кондак, Глас 4:
Яко звезду пресветлую церковь всегда стяжа тя, апостоле (имярек), чудес твоих многоподаванием просвещаема. Темже зовем Христу: спаси чтущих верою память Твоего апостола, Многомилостиве.

137. Апостолам общий:

Тропарь, Глас 3:
Апостоли святии, молите Милостиваго Бога, да прегрешений оставление подаст душам нашим.
Кондак, Глас 4:
Лозие явистеся Христова винограда мудрии, гроздие приносяще в добродетелех, вино нам спасения источающе: егоже приемлем веселия исполняющеся. Празднуем честную вашу память, в нюже молите дароватися нам велицей милости, и отпущению грехов, Господни апостоли.

138.Андрею Первозванному

Тропарь, Глас 4:
Яко Апостолов первозванный и верховнаго сущий брат, Владыце всех, Андрее, молися мир вселенней даровати и душам нашим велию милость.
Кондак, Глас 2:
Мужества тезоименитаго Богоглагольника и Церкве возследователя верховнаго, Петрова сродника восхвалим, зане якоже древле сему, и ныне нам воззва: приидите, обретохом желаемаго.

139.Владимиру, св. блгв. кн., равноап.

Тропарь, Глас 4:
Уподобился еси купцу, ищущему добраго бисера, славнодержавный Владимире, на высоте стола седя матере градов, богоспасаемаго Киева, испытуя же и посылая к Царскому Граду уведети Православную веру, обрел еси бесценный бисер Христа, избравшаго тя яко втораго Павла, и оттрясшаго слепоту во святей купели, душевную вкупе и телесную. Темже празднуем твое успение, людие твои суще: моли спастися душам нашим.
Кондак, Глас 8:
Подобствовав великому апостолу Павлу в сединах, всеславне Владимире, вся яко младенческая мудрования, яже о идолех тщания оставль, яко муж совершенный украсился еси Божественнаго крещения багряницею. И ныне Спасу Христу в веселии предстоя, моли спастися державы Российския начальником и множеству владомых.

140.Иакову, брату Господню по плоти

Тропарь, Глас 2:
Яко Господень ученик, восприял еси праведно Евангелие, яко мученик, имаши еже неописанное дерзновение, яко брат Божий, еже молитися, яко иерарх, моли Христа Бога, спастися душам нашим.
Кондак, Глас 4:
Отчее единородное Бог Слово, пришедшее к нам в последняя дни, Иакове Божественне, перваго тя показа иерусалимлян пастыря и учителя и вернаго строителя таинств духовных. Темже тя вси чтим, Апостоле.

141.Иакову Заведееву, брату Иоанна Богослова

Тропарь, Глас 3:
Апостол Христов был еси избранный, и Богослову возлюбленному брат единородный, всехвальне Иакове, поющим тя грехов оставление испроси и душам нашим велию милость.
Кондак, Глас 2:
Глас Божий слышав призывающ тя, любовь отца презрел еси и притекл еси ко Христу, Иакове, с сродником твоим, славне, с нимже сподобился еси видети Господне Божественное Преображение.

142.Иоанну Богослову

Тропарь, Глас 2:
Апостоле Христу Богу возлюбленне, ускори избавити люди безответны, приемлет тя припадающа, Иже падша на перси приемый: Егоже моли, Богослове, и надлежащую мглу языков разгнати, проси нам мира и велия милости.
Кондак, Глас 2:
Величия твоя, девственниче, кто повесть? Точиши бо чудеса, и изливаеши исцеления, и молишися о душах наших, яко Богослов и друг Христов.

143.Кириллу и Мефодию, учителям Словенским, свв. равноапп.  

Тропарь, Глас 4:
Яко апостолом единонравии и словенских стран учителие, Кирилле и Мефодие Богомудрии, Владыку всех молите вся языки словенския утверди в Православии и единомыслии, умирити мир и спасти души наша.
Кондак, Глас 3:
Священную двоицу просветителей наших почтим. Божественных писаний преложением источник богопознания нам источивших, из негоже даже до днесь неоскудно почерпающе, ублажаем вас, Кирилле и Мефодие, Престолу Вышняго предстоящих и тепле молящихся о душах наших.

144.Кириллу, св. равноап., учителю Словенскому

Тропарь, Глас 4:
От пелен прилежно премудрость сестру себе сотворив, Богогласе, пресветлую видев, яко девицу чисту, юже прием, приведе, яко монисты златыми сею украсив свою душу и ум, и обретеся яко другий Кирилл, блаженне, разумом и именем мудре.
Кондак, Глас 2:
Твердым и богодуховенным учением просвещая мир пресветлыми зарями, обтече, яко молния вселенную, Кирилле блаженне, разсевая пресветлое Божие слово, на западе и севере и юзе мир просвещая чудесы.

145.Константину и Елене, свв. равноапп.

Тропарь, Глас 8:
Креста Твоего образ на небеси видев и якоже Павел звание не от человек прием, в царех апостол Твой, Господи, царствующий град в руце Твоей положи, егоже спасай всегда в мире, молитвами Богородицы, Едине Человеколюбче.
Кондак, Глас 3:
Константин днесь с матерью Еленою Крест являют всечестное Древо, всех убо иудеов посрамление суще, оружие же на противныя: нас бо ради явися знамение велие и во бранех грозное.

146.Луке, Евангелисту

Тропарь, Глас 5:
Апостольских деяний сказателя, и Евангелия Христова светла списателя, Луку препетаго, не исписанна суща Христове Церкви, песньми священными святаго Апостола похвалим, яко врача суща человеческия немощи, естества недуги, и язи душ исцеляюща, и молящася непрестанно за души наша.
Кондак, Глас 2:
Истиннаго благочестия проповедника, и таин неизреченных ритора, звезду церковную, Луку Божественнаго восхвалим: Слово бо его избра с Павлом мудрым, языков учителя, един ведый сердечная.

147.Марии Магдалини, равноап.

Тропарь, Глас 1:
Христу, нас ради от Девы рождшемуся, честная Магдалини Марие, последовала еси, Того оправдания и законы хранящи. Темже днесь всесвятую твою память празднующе, грехов разрешение молитвами твоими приемлем.
Кондак, Глас 3:
Предстоящи, преславная, у Креста Спасова со иными многими, и Матери Господни состраждущи, и слезы точащи, сие в похвалу приношаше глаголющи: что сие есть странное чудо, Содержай всю тварь, пострадати изволи: слава державе Твоей.

148.Марку, Евангелисту

Тропарь, Глас 3:
У верховнаго Петра научився, апостол Христов был еси, и яко солнце странам возсиял еси, александриом удобрение быв, блаженне. Тобою Египет от прелести свободися, евангельским твоим учением просвещ вся, яко свет, столп церковный. Сего ради твою память чтуще, светло празднуем, Марко, богогласе: моли тобою благовестимаго Бога, да согрешений оставление подаст душам нашим.
Кондак, Глас 2:
С высоты приим благодать Духа, риторская плетения разрушил еси, апостоле, и языки вся уловив, Марко всеславне, твоему Владыце привел еси, Божественное проповедав Евангелие.

149.Матфею, Евангелисту

Тропарь, Глас 3:
Усердно от мытницы ко звавшему Владыце Христу, явльшуся на земли человеком за благость, Тому последовав. Апостол избранный явился еси и благовестник Евангелия вселенней велегласен. Сего ради чтим честную память твою, Матфее Богоглаголиве, моли Милостиваго Бога, да грехов оставление подаст душам нашим.
Кондак, Глас 4:
Мытарства иго отверг, правды игу припряглся еси, и явился еси купец всеизряднейший, богатство принес, юже с высоты премудрость. Отонудуже проповедал еси Истины слово, и унылых воздвигл еси души, написав час судный.

150. Мефодию, равноап., учителю Словенскому

Тропарь, Глас 4:
Святителя Твоего, Христе, творяще светло торжество успения, милости Твоея свыше подаждь, отверзи же Царствия двери, разреши же юзы наша многих грехов, ходатайством святаго Твоего ученика, отца нашего.
Кондак, Глас 2:
Божественна и верна Мефодия вси воспоим людие, и любовию ублажим, яко пастыря великаго словеном, служителя Троицы честна, прогонителя ереси, молит бо ся о всех нас.

151.Нине, просветительнице Грузии, равноап.

Тропарь, Глас 4:
Слова Божия служительнице, во апостольстей проповеди Первозванному Андрею и прочим апостолом подражавшая, просветительнице Иверии и Духа Святаго цевнице, святая равноапостольная Нино, моли Христа Бога спастися душам нашим.
Кондак, Глас 2:
Приидите днесь вси, воспоим избранную от Христа равноапостольную проповедницу Божия слова, мудрую благовестницу, люди Карталинии приведшу на путь живота и истины, Богоматере ученицу, усердную заступницу и неусыпающую хранительницу нашу, Нину прехвальную.

152.Петру и Павлу, первоверховным апостолам

Тропарь, Глас 4:
Апостолов первопрестольницы, и вселенныя учителие, Владыку всех молите мир вселенней даровати и душам нашим велию милость.
Кондак, Глас 2:
Твердыя и боговещанныя проповедатели, верх апостолов твоих, Господи, приял еси в наслаждение благих твоих и покой: болезни бо онех и смерть приял еси паче всякаго всеплодия, Едине сведый сердечная.

Честным веригам апостола Петра

Тропарь, Глас 4:
Рима не оставль, к нам пришел еси, честными веригами, яже носил еси, Апостолов первопрестольне, имже верою покланяющеся, молимся: твоими к Богу молитвами даруй нам велию милость.
Кондак, Глас 2:
Камень Христос, каменя веры прославляет светло, учеников первопрестольника: созывает бо вся праздновати, Петре, чудеси твоея честныя вериги, и подает согрешений прощение.
Ин кондак, Глас 2:
Верховнаго и перваго Апостолов, истины Божественнаго ученика, Петра великаго восхвалим, и того верою целуем вериги, прегрешений разрешение приемлюще.

153Стефану, первомученику и архидиакону

Тропарь, Глас 4:
Подвигом добрым подвизался еси, первомучениче Христов и апостоле, и мучителей обличил еси нечестие. Камением бо побиен от рук беззаконных, венец от яже свыше десницы приял еси, и к Богу взывал еси вопия: Господи, не постави им греха сего.
Ин тропарь, Глас 4:
Царским венцем венчался твой верх от страданий, яже претерпел еси по Христе Бозе, мучеников первострадальче Стефане: ты бо иудейское обличивый неистово, видел еси твоего Спаса одесную Отца; того убо моли о душах наших.
Кондак, Глас 3:
Владыка вчера нам плотию прихождаше, и раб днесь от плоти исхождаше; вчера Царствуяй плотию родися, днесь раб камением побивается. Того ради и скончавается первомученик и Божественный Стефан.
Ин кондак, Глас 6:
Первый сеялся еси на земли Небесным Делателем, всехвальне Стефане, первый на земли за Христа кровь излиял еси, блаженне, первый от него победы венцем увязлся еси на небесех, страдальцев начало, венечниче мучеников, первострадальне.

154.Тимофею

Тропарь, Глас 4:
Благости научився и трезвяся во всех благою совестию священнолепно оболкся, почерпл еси от сосуда избраннаго неизреченная, и веру соблюд, равное течение совершил еси, апостоле Тимофее. Моли Христа Бога, спастися душам нашим.
Кондак, Глас 1:
Божественнаго ученика и спутешественника Павлова Тимофея, вернии воспоим вси, с сим почитающе мудраго Анастасиа, возсиявшаго от Персиды яко звезду, и отгоняющаго душевныя наша страсти и недуги телесныя.

155.Фекле, первомученице и равноапостольной

Тропарь, Глас 4:
Словесем Павловым научившися, богоневестная Фекло, и верою утвердившися от Петра, богозванная первомученица явилася еси и первострадальница в женах; возшла еси на пламень, яко на место благоцветущее, звери и юнцы устрашишася тебе, вооружися бо крестом. Тем моли, всехвальная, Христа Бога, спастися душам нашим.
Кондак, Глас 8:
Девства добротою просияла еси, и мученичества венцем украсилася еси, апостольству вверяешися, дево, яко преславная; и огня убо пламень в росу преложила еси, юнца же ярость молитвою твоею укротила еси, яко первострадальная.
Ин кондак, Глас 2:
Уязвивши твое сердце добродево, любовию Христовою, обручника временнаго яко небрегома преобидела еси и на огнь дерзнула еси; зверей же уста заградила еси, и спасшися от них прилежаше Павла ищущи, Фекло первострадальная.

156.Филиппу, от 12-ти

Тропарь, Глас 3:
Благоукрашается вселенная, Ефиопия ликовствует, яко венцем красуема тобою, просветившися светло, торжествует память твою Богоглаголиве Филиппе; вся бо веровати Христу научил еси, и течение совершил достойно Евангелия. Тем дерзновенно варит ефиопская  рука к Богу, Егоже моли даровати нам велию милость.
Кондак, Глас 8:
Ученик и друг Твой, и подражатель страсти Твоея, вселенной Бога Тя проповеда, Богоглаголивый Филипп. Того молитвами от врагов пребеззаконных Церковь Твою и всяк град Твой Богородицею соблюди, Многомилостиве.

157.Фоме Тропарь, Глас 2:
Ученик Христов быв, Божественнаго собора апостольскаго сопричастник, неверствием во Христово Воскресение известив, и того пречистую страсть осязанием уверив, Фомо всехвальне, и ныне нам проси мира и велия милости.
Кондак, Глас 4:
Премудрости благодати исполнен Христов апостол, и служитель истинный, в покаянии вопияше Тебе: Ты мой еси Бог же и Господь.

Тропари и кондаки святителям.

158.Святителям, священномученикам, преподобным общий

Тропарь, Глас 4:
Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.
Кондак, Глас 3:
Яко светильники незаходимыя разумнаго солнца, сошедшеся днесь восхвалим песньми: возсияли бо есте сущим во тьме неразумия, всех возвышающе к высоте благочестия священномученицы. Тем вопием вам: радуйтеся постников всех основание.
Ин кондак, святителям, Глас 8:
Яко добродетелей учителие, и иерархов украшение, церковь поющи вас славит: молитвами вашими подайте чтущим вас любовию, добродетелей исправление, и соблазнов избавление, яко непобедимии.

159. Святителю единому:

Тропарь, Глас 4:
Правило веры и образ кротости, воздержания учителя яви тя стаду твоему, яже вещей истина: сего ради стяжал еси смирением высокая, нищетою богатая, отче (имярек), моли Христа Бога спастися душам нашим.
Кондак, Глас 2:
Божественный гром, труба духовная, веры насадителю, и отсекателю ересей, Троицы угодниче, великий святителю (имярек), со ангелы предстоя присно, моли непрестанно о всех нас.

160.Алексию, митрополиту Московскому

Тропарь, Глас 8:
Яко апостолам сопрестольна и врача предобра, и служителя благоприятна, к раце твоей честней притекающе, святителю Алексие Богомудре, чудотворче, сошедшеся любовию в память твою светло празднуем, в песнех и пениих радующеся и Христа славяще, таковую благодать тебе Даровавшаго исцелений и граду твоему великое утверждение.
Ин тропарь, Глас 4:
Апостольских догмат опасна хранителя, Церкве Российския пастыря и учителя, преблаженнаго Алексия святителя память празднующе, славословим Христа Бога нашего песньми достодолжными, даровавшаго нам угодника Своего, яко обильный источник точащь врачевания, граду же Москве похвалу и утверждение.
Кондак, Глас 8:
Божественнаго и пречестнаго святителя Христова, новаго чудотворца Алексия, верно вси поюще, людие, любовию да ублажим, яко пастыря великаго, служителя же и учителя премудра земли Российстей: днесь в память его притекше, радостно возопием песнь Богоносному, яко имея дерзновение к Богу, многообразных нас избави обстояний, да зовем ти: радуйся, утверждение граду нашему.

161.Амвросию Медиоланскому, еп.

Тропарь общий святителю
Правило веры и образ кротости...(см. N159)
Кондак, Глас 3:
Божественными догматы облистая, помрачил еси Ариеву прелесть, священнотаинниче и пастырю Амвросие; чудодействуя же силою Духа, страсти различныя яве исцелил еси, отче преподобне, Христа Бога моли спастися душам нашим.

162. Арсению Сербскому, архиеп.

Тропарь, Глас 8:
Милости наставниче, и благоутробия сокровище, еже всем отверзл еси, правоверия учителю, и архиереев божественное удобрение, отче наш иерарше Арсение, нищих был еси заступник. Тем моли Христа Бога, просветити души наша, да не когда уснем в смерть.
Кондак, Глас 2:
В пищи словес твоих, Богоносе Арсение, разумно чада твоя питая, языком хваля, устнами же пение принося, вещанием зовый: Христе, Ты еси Свет неизреченный.

163.Арсению Тверскому

Тропарь, Глас 8:
Благочестно пожив во святительстве, люди просветил еси учением твоим, и о храме Пречистыя вельми подвизався, и любитель монахов быв, сего ради от Христа паствы твоея венец приял еси. Темже, яко апостольскаго престола наместника, и святителя великаго чтуще тя, молим чада твоя, блаженне: от всех бед избави нас яже ко Христу молитвами твоими, святителю Христов Арсение, отче наш.
Кондак, Глас 8:
Восприемши радостно честныя твоя мощи, пречистая церковь, в нюже честно вносими множеством священномонахов, и князи благоверными, и яже приемше яко сокровище многоценное. Темже и мы ныне твоея ограды словесныя овцы, окрест раки твоея предстояще, любезно вопием ти: радуйся, святителю Арсение, пастырю и учителю наш.

164.Афанасию Великому и Кириллу, архиепископам Александрийским

Тропарь, Глас 3:
Делы возсиявше Православия, все погасивше злославие, победителие победоносцы бысте, благочестием вся обогативше, Церковь вельми украсивше, достойно обретосте Христа Бога, дарующа нам велию милость.
Кондак, Глас 4:
Священноначальницы величайшии благочестия, и доблии поборницы Церкве Христовы, вся соблюдите поющия: спаси, Щедре, верою чтущия Тя.

165.Василию Великому

Тропарь, Глас 1:
Во всю землю изыде вещание твое, яко приемшую слово твое, имже боголепно научил еси, естество сущих уяснил еси, человеческия обычаи украсил еси, царское священие, отче преподобне: моли Христа Бога спастися душам нашим.
Кондак, Глас 4:
Явился еси основание непоколебимое Церкве, подая всем некрадомое господство человеком, запечатлея твоими веленьми, небоявленне Василие, преподобне.

166. Василию Великому, Григорию Богослову и Иоанну Златоустому, свтт. Вселенским

Тропарь, Глас 4:
Яко апостолов единонравнии и вселенныя учителие, Владыку всех молите мир вселенней даровати и душам нашим велию милость.
Ин тропарь, Глас 1:
(принятый в арабской, греческой, сербской и болгарской церкви)
Три величайшая светила трисолнечного Божества, вселенную лучами догматов Божественных просветившая, медоточныя реки премудрости, тварь всю боговедения водами напоившия, Василия Великаго и Богослова Григория, со славным Иоанном, языком Златоглаголивым, вси словес их рачителие, сошедшеся песньми почтим: тии бо Троицы о нас присно молятся.
Кондак, Глас 2:
Священныя и боговещанныя проповедники, верх учителей, Господи, приял еси в наслаждение благих твоих и упокоение: труды бо онех и смерть приял еси паче всякаго всеплодия, едине Прославляяй святыя Твоя.

167.Василию, еп. Рязанскому, чдтв.

Тропарь, Глас 4:
Первее в Муроме святительством почтен был еси, из негоже неправедно изгоняемъ, на мантию, яко на легкий корабль, возшел еси, на нейже паче естества, яко бесплотен, по водам шествие творя, промышлением Вышняго и заступлением Богоматере управляемъ, богоспасаемаго града Рязани достигл еси и в нем архиерейства престол восприим, богоданную паству Рязанскую добре упасл еси, святителю отче наш Василие, моли Христа Бога, спастися душам нашим.

168.Геннадию, архиеп. Новгородскому

Тропарь, Глас 5:
Уподобился еси древним отцем, святителю отче Геннадие, Священныя Книги собрав и еретики посрамив, ревность по Бозе показуя, паству оградил еси, моли и ныне Христа Бога мир Церкви даровати и спастися душам нашим.
Кондак, Глас 2:
Велия исправления о церковном благолепии являя, Православную веру утвердил еси, святителю отче Геннадие, не престай молитися о нас, во Царствии Небеснем Безсмертныя трапезы наслаждаяся.

169.Герману, архиеп. Казанскому

Тропарь, Глас 4:
От юности иго Христово усердно восприим, бденными подвиги поста и молитвы, прославился еси. Отонудуже призывающу тя Богу на служение Церкви в новопросвещеннем царстве Казанстем, вкупе со святителем Гурием воззван был еси, идеже, яко первоначальник созданныя тобою в граде Свияжске обители, и достойный первосвятителю преемник явился еси. Духом предстоя Престолу Владычню, молися, святителю Германе, со святителем Гурием, православней пастве во благочестии преспевати, и тьме иноверия светом веры разгнатися.
Кондак, Глас тойже:
Доблестьми преподобия и правды врученное тебе словесное стадо озаряя, и на злачных слова Христова пажитех питая, на правый путь заповедей Господних силою духа твоего наставлял еси е. Темже и ныне осеняемии цельбоносными чудотворении твоими, в святую память твою, зовем тебе: не престай, святителю, предстательствовати пред пастыреначальником о стаде твоем, яко паствы твоея утверждение, и сущим по тебе святителем удобрение.

170.Григорию Богослову

Тропарь, Глас 1:
Пастырская свирель богословия твоего риторов победи трубы, якоже бо глубины духа изыскавшу, и доброты вещания приложишася тебе. Но моли Христа Бога, отче Григорие, спастися душам нашим.
Кондак, Глас 3:
Богословным языком твоим сплетения риторская разрушивый, славне, Православия одеждею свыше истканною Церковь украсил еси, юже и носящи, с нами зовет твоими чады: радуйся, отче, богословия уме крайнейший.

171.Григорию Двоеслову, папе Римскому

Тропарь, Глас 4:
Иже от Бога свыше Божественную благодать восприемъ, славне Григорие, и Того силою укрепляемъ, евангельски шествовати изволил еси. Отонудуже у Христа возмездие трудов приял еси, всеблаженне, Егоже моли, да спасет души наша.
Кондак, Глас 3:
Подобоначальник показася еси Начальника пастырем Христа, иноков чреды, отче Григорие, ко ограде Небесней наставляя, и оттуду научил еси стадо Христово заповедем Его, ныне же с ними радуешися и ликуеши в Небесных кровех.

172.Григорию, еп. Неокесарийскому, чдтв.

Тропарь, Глас 8:
В молитвах бодрствуя, чудес деланьми претерпевая, тезоимение стяжал еси исправления, но молися Христу Богу, отче Григорие, просветити души наша, да не когда уснем в смерть.
Кондак, Глас 2:
Чудес многих прием действо, знаменьми ужасными демоны усташил еси, и недуги отгнал еси человеческия, всемудре Григорие: чудотворец же именуешися, звание от дел прием.

173.Григорию Паламе, архиеп.

Тропарь, Глас 8:
Православия светильниче, Церкве утверждение и учителю, монахов доброто, богословов поборниче непреборимый, Григорие чудотворче, Фессалонитская похвало, проповедниче благодати, молися выну спастися душам нашим.
Кондак, Глас 4:
Ныне время делательное явися, при дверех суд, востанем убо постящеся, принесем слезы умиления, милостынями, зовуще: согрешихом паче песка морскаго, но ослаби, Содетелю всех, яко да приимем нетленныя венцы.

174.Гурию и Варсонофию, Казанским чдтв.

Тропарь, Глас 3:
Первии учителие прежде темному, ныне же светлому и новопросвещенному граду Казани, первии возсветителие пути спасительнаго, истиннии хранителие апостольских преданий, столпи непоколебимии, благочестия учителие и Православия наставницы, Гурие и Варсонофие, Владыку всех молите мир вселенней даровати и душам нашим велию милость.
Тропарь Гурию, Глас 4:
Правило веры и образ целомудрия, учителя добрых дел и наставника спасения даде тя Господь новопросвещенному граду Казани, в немже приобрел еси новыя от язык люди и привел еси я Христови. Сего ради в память твою радостно сошедшеся, честне празднуем святое твое успение, ты же, отче наш, святителю Христов Гурие, моли Христа Бога спастися душам нашим.
Ин тропарь, Глас 4:
От младости удаляяся земнаго мудрования и последовав скорбным путем Законоположителю своему Христу Богу. Темже и Он тя воздарова на земли нетлением, на Небесех же со угодившими Ему архиереи ликовствуеши, Гурие святителю, моли Христа Бога подати отечеству нашему на враги победу, и мир мирови, и душам нашим велию милость.
Кондак Варсонофию, Глас 6:
Воздержанием тело духу поработив, душу же равноангельну сотворил еси, сего ради святительства саном почется, чисте Чистейшему предстоиши. Моли Христа Бога, святителю, упасти люди твоя, святе, да вси вопием ти: радуйся, отче преподобне Варсонофие, граду нашему Казани похвала и утверждение.
Кондак Гурию, Глас 4:
Чувстенныя страсти победив, чистотою, яко солнце, возсиял еси, чисто житие до конца сохранив, и от неверия в веру многих ко Христу привел еси; того ради от Бога нетлением почтен, чудесы твоими вся удивил еси. Молим убо тя, святителю Гурие, молитвами твоими от бед избави нас, да зовем ти: радуйся, отче предивный, граду Казани похвала и утверждение.

175.Димитрию Ростовскому

Тропарь, Глас 8:
Православия ревнителю и раскола искоренителю, Российский целебниче, и новый к Богу молитвенниче, списаньми твоими буих уцеломудрил еси; цевнице духовная, Димитрие блаженне, моли Христа Бога спастися душам нашим.
Кондак, Глас 8:
Звезду Российскую от Киева возсиявшую, и чрез Новград Северский в Ростов достигшую, всю же страну сию ученьми и чудесы озарившую, ублажим златословеснаго учителя Димитрия, той бо всем вся написа, яже к наставлению, да всех приобрящет, якоже Павел Христу, и спасет правоверием души наша.

176.Игнатию (Брянчанинову), еп. Кавказскому и Черноморскому

Тропарь, Глас 8:
Православия поборниче, покаяния и молитвы делателю и учителю изрядный, архиереев Богодухновенное украшение, монашествующих славо и похвало, писании твоими вся ны уцеломудрил еси. Цевнице духовная Игнатие Богомудре, моли Слова Христа Бога, Егоже носил еси в сердце твоем, даровати нам прежде конца покаяние.
Кондак, Глас 8:
Аще и совершал еси стезю жития земнаго, святителю Игнатие, обаче непрестанно зрел еси законы бытия вечнаго, сему поучая ученики словесы многими, имже последовати и нам, святче, помолися.

177.Иннокентию, еп. Иркутскому

Тропарь, Глас 3:
Светильниче Церкве пресветлый, озаривый лучами доброт твоих страну сию, и исцеленьми многими притекающих к раце твоей с верою Бога прославивый, молим тя, святителю отче Иннокентие, ограждай молитвами твоими град сей от всех бед и печали.
Кондак, Глас 4:
Непорочности соименнаго пастыря, проповедника веры в языцех монгольских, славу и украшение иркутския паствы, любовию восхвалим вси вернии: той бо есть хранитель страны сея и молитвенник о душах наших.

178.Иоанну Златоустому, архиеп. Константинопольскому

Тропарь, глас 8:
Уст твоих якоже светлость огня возсиявши благодать, вселенную просвети: не сребролюбия мирови сокровища сниска, высоту нам смиренномудрия показа. Но твоими словесы наказуя, отче Иоанне Златоусте, моли Слова Христа Бога спастися душам нашим.
Кондак, Глас 6:
От небес приял еси Божественную благодать, и твоими устнами вся учиши покланятися в Троице единому Богу, Иоанне Златоусте, всеблаженне преподобне, достойно хвалим тя: еси бо наставник, яко Божественная являя.

179.Иоанну (Максимовичу), еп. Сан-Францизскому

Творение зарубежной ЦерквиТропарь, Глас 6:
Славный апостолом Христовым наследниче, явился еси нас маловерных и хладных сердцем спасти. Древних святых благодатию и подвигами облеклся еси, сего ради от Бога небесныя тайны приемше. О, сиропитателю предобрый, подающий надежду миром отверженным, о, светильниче Христов, Божественным пламенем на заре Страшнаго Суда возженный. Моли о нас, святителю отче Иоанне, да возгорятся и наша сердца пламенем спасительной любви ко Христу, и спастися душам нашим во времена последняя.
Ин тропарь, Глас 5:
Попечение твое о пастве в странствии ея, се прообраз и молитв твоих, за мир весь присно возносимыых; тако веруем, познав любовь твою, святителю и чудотворче Иоанне. Весь от Бога освящен священнодействием Пречистых Таин, имиже сам присно укрепляемъ, поспешал еси ко страждущим, целителю отраднейший. Поспеши и ныне в помощь нам, всем сердцем чтущим тя.
Кондак, Глас 4:
Сердце твое распространися ко всем, любовию молящим тя, Иоанне святителю, поминающим подвиг всего многотруднаго жития твоего, безболезненно же легкое преставление твое, Одигитрии Пречистыя верный служителю.

180.Иоанну Милостивому, архиеп. Александрийскому

Тропарь, Глас 8:
В терпении твоем стяжал еси мзду твою, отче преподобне, в молитвах непрестанно терпевый, нищия возлюбивый и сия удобливый. Но молися Христу Богу, Иоанне Милостиве блаженне, спастися душам нашим.
Кондак, Глас 2:
Богатство твое расточил еси убогим, и небесное богатство ныне восприял еси, Иоанне всемудре: сего ради вси тя почитаем, совершающе память твою, милостыни о тезоимените!

181. Иоанну, митрополиту Тобольскому, чдтв.

Тропарь, Глас 8:
Наставниче благочестия, сиротствующих питателю, скорбящих утешителю, недугующих врачу безмездный, душею страждушим скорый помощниче, теплый молитвенниче ко Господу, святителю отче Иоанне, моли Христа Бога, спастися душам нашим.
Кондак, Глас 2:
Явился еси во тьме неведения пребывающим просветитель, вдов и сирот утешитель, дивный врач немощствующих, младенцев и отроков наставник, родителем же пресветлое радование, святителю отче Иоанне, моли Христа Бога, подати стране нашей в вере утверждение, воинам на враги победу и одоление, людем же своим велию милость.

182.Иоасафу Белгородскому:

Тропарь, Глас 3:
Святителю Христу Богу возлюбленне, правило веры и образ милосердия людем был еси, бдением же, постом и молитвою яко светильник пресветлый просиял еси, и прославлен от Бога явился еси: телом убо в нетлении почивая, духом же Престолу Божию предстоя, чудеса преславно источаеши. Моли Христа Бога, да утвердит Отечество наше в Православии и благочестии, и спасет души наша.
Кондак, Глас 8:
Многоразличныя подвиги жития твоего кто исповесть? Многообразныя милости Божия тобою явленныя кто исчислит? дерзновение же твое у Пречистыя Богородицы и Всещедраго Бога добре ведуще, во умилении сердечнем зовем ти: не лиши и нас твоей помощи и заступления, святителю Христов и чудотворче Иоасафе.

183.Иову, патриарху Московскому и всея Руси

Тропарь, Глас 3:
Да торжествует Церковь Христова и да радуется град Москва яко возсия светильник земли Российской во исповедании и силе непоколебимой Иов патриарх, егоже молитвами, Господи, вся соблазны мира сего и ересь искорени, люди во благочестии настави и утверди в православии.
Кондак, Глас 6:
Светильник Церкве Русския и пастырь добрый явился еси, святителю отче Иове, молитвою твоею ко Господу храни землю Российскую и спаси души наша.

184.Ионе Московскому, чдтв.

Тропарь, Глас 4:
От юности твоея весь сам себе Господеви возложив, в молитвах и трудех, и в постех, образ быв добродетели, отонудуже видев Бог твое благое произволение, архиерея тя и пастыря Церкви Своей устрояет. Темже и по преставлении, честное тело твое цело и нетленно соблюдеся, Ионо святителю: моли Христа Бога, да спасет души наша.
Кондак, Глас 8:
Яко от младенства Господеви поработив себе, мудре, постом и бдением тело твое удручая. Темже сосуд чист и дом духу Пресвятому явился еси: сего ради и Церкви Своей тебе архиерея и пастыря устрояет, юже добре упасл ко Господу отходиши, Егоже возлюбил еси. Тем молим тя: поминай нас верою чтущих святую память твою, да вси зовем ти: радуйся, отче Ионо, святителю всечестный.

185.Иосифу Астраханскому

Тропарь, Глас 6:
Подвигом добрым подвизався, жизнь твою страданиями за правду увенчав, переселился еси в Небесныя обители, идеже предстоя Престолу Святыя Троицы, моли, святителю Иосифе, граду Астрахани и отечеству нашему в мире спастися.
Кондак, Глас 2:
Яко звезда пресветлая возсиял еси, святителю Иосифе, во Астрахани, идеже родился и воспитался еси и за верность Богу мученическую смерть приял еси. Мы же, чтуще страдания твоя, зовем ти: святителю Иосифе, моли Христа Бога о душах наших.

186.Леонтию, еп. Ростовскому, чдтв.

Тропарь, Глас 4:
Апостолом сопричастник и к Богу молебник верен, добродетельми возшед на небесная, и любовь возложил еси к Любящему тя, и неверныя люди обратил еси в веру. Тем ныне со Ангелы ликуя, предстоиши Престолу Славы всех Царя Христа Бога. Молися, святителю Леонтие, да спасет души наша.
Кондак, Глас 4:
Жития ради чистоты, Всевидец Господь, свет Свой насади в души твоей, вразумити люди многия твоими учении, Леонтие преподобне.

187.Макарию, митр. Московскому и всея Руси

Тропарь, Глас 4:
Яко великим пастырем единонравна, и учителем вселенныя единомысленна, Божий премудрости служителя изрядна, иже блаженству тезоименита, днесь, вернии, вси воспоим: Христа Бога моли, святителю Макарие, умирити мир и спасти души наша.
Кондак, Глас 3:
Богомудрым учением и книжным списанием потщался еси, святителю Макарие, люди Российския просветити, и святых земли нашея прославити. Сего ради чуден пронаречен, преемниче первопрестольников российских. Моли сохранитися нам в вере и благочестии невредимо.

188.Митрофану, еп. Воронежскому

Тропарь, Глас 4:
Правило веры и образ кротости, словом и житием, пастве твоей, отче смиренномудре Митрофане, был еси, темже и во светлостех святых, солнца светлейше возсиял еси, венцем нетления и славы украшаемъ, моли Христа Бога, всей стране нашей и граду твоему в мире спастися.
Кондак, Глас 8:
Воздержанием тело духу поработив, душу же равноангельну сотворив, святительскою одеялся еси одеждою, яко венец священства; и ныне всех Владыце предстоя, моли, всеблаженне Митрофане, умирити и спасти души наша.

189.Михаилу, митрополиту Киевскому, чдтв.

Тропарь, Глас 4:
Днесь пророчествие во апостолех первозваннаго исполнися: се бо на сих горах возсия благодать и вера умножися: и иже неверием обветшавшии, Божественною купелию отродишася, и быша людие обновления, царское священие, язык свят, Христово стадо: Емуже ты первый пастырь явился еси, яко первее крещением послуживый. И ныне, предстоя Владыце Христу Богу, моли, всем сыном Российским спастися: имаши бо дерзновение, яко иерарх Божий, и священнослужитель.
Кондак, Глас 2:
Моисей вторый России явился еси, отче, принесый мысленный виноград от египетскаго идолослужения в землю пророчествием предувиденную, о нейже подобообразно рещи: будет утверждение веры на земли, и на версех гор киевских превознесется паче ливана плод, питающ мира всего: от негоже вкусивше, ублажаем тя, Михаиле, Божий святителю.

190.Московским святителям Петру, Алексию, Ионе, Филиппу и Ермогену

Тропарь, Глас 4:
Первопрестольницы Российстии, истиннии хранителие апостольских преданий, столпи непоколебимии, православия наставницы, Петре, Алексие, Ионо, Филиппе и Ермогене, Владыку всех молите мир вселенней даровати, и душам нашим велию милость.
Кондак, Глас 3:
Во святителех благочестно пожисте, и люди к Богоразумию настависте, и добре Богу угодисте, сего ради от Него нетлением и чудесы прославистеся, яко ученицы Божия благодати.

191.Никите Новгородскому

Тропарь, Глас 4:
Насладився, Богомудре, воздержания и желание плоти твоея обуздав, на престоле святительства сел еси, и яко звезда многосветлая, просвещая верных сердца зарями чудес твоих, отче наш, святителю Никито, и ныне моли Христа Бога, да спасет души наша.
Кондак, Глас 6:
Архиерейства саном почтився, и чисте Чистейшему предстоя, прилежно моление за люди твоя приносил еси, яко и дождь молитвою свел еси, овогда же и града запаления угасил еси. И ныне, святителю Никито, моли Христа Бога, спасти люди твоя молящияся, да вси вопием ти: радуйся, святителю, отче предивный.

192.Николаю, архиеп. Мир Ликийскому, чдтв.

Тропарь, Глас 4:
Правило веры и образ кротости, воздержания учителя яви тя стаду твоему, яже вещей истина: сего ради стяжал еси смирением высокая, нищетою богатая, отче священноначальниче Николае моли Христа Бога спастися душам нашим.
Кондак, Глас 3:
В Мирех святе священнодействитель показался еси: Христово бо преподобне Евангелие исполнив, положил еси душу твою о людех твоих, и спасл еси неповинныя от смерти: сего ради освятился еси, яко великий таинник Божия благодати.

Пренесению честных мощей

Тропарь, Глас 4:
Приспе день светлаго торжества, град Барский радуется, и с ним вселенная вся ликовствует песньми и пеньми духовными: днесь бо священное торжество, в пренесение честных и многоцелебных мощей святителя и чудотворца Николая, якоже солнце незаходимое возсия, светозарными лучами, разгоняя тьму искушений же и бед от вопиющих верно: спасай нас яко предстатель наш, великий Николае.
Кондак, Глас 3:
Взыде яко звезда от востока до запада твоя мощи, святителю Николае, море же освятися шествием твоим, и град Барский приемлет тобою благодать: нас бо деля явился еси чудотворец изящный, предивный и милостивый.

193.Петру, митрополиту Московскому

Тропарь, Глас 4:
Яже прежде безплодная земле, ныне веселися: се бо Христос светильника в тебе показа, яве сияюща в мире, и исцелевающа недуги и болезни наша. Сего ради ликуй и веселися со дерзновением: святитель бо есть Вышняго сия соделоваяй.
Ин тропарь, глас 8:
Ликуй светло благославнейший граде Москва, имеяй в себе архиерея Петра яко зарю солнца, всю Россию чудодеянии озаряюща, той бо немощи врачует, и недуги яко тьму прогонит от вопиющих ему: радуйся, иерарше Бога Вышняго, тобою сия пастве твоей соделовающаго.
Кондак, Глас 8:
Взбранному и дивному нашея земли чудотворцу, днесь любовию к тебе притекаем, песнь Богоносе плетуще, яко имея дерзновение ко Господу, многообразных избави нас обстояний, да зовем ти: радуйся, утверждение граду нашему.

194.Питириму, еп. Тамбовскому, чдтв.

Тропарь, Глас 4:
Веры и благочестия наставниче, Церкве светильниче, монашествующих образе, святителю Питириме премудре, стадо твое благочестно упасл еси и ко Христу привел еси; темже и вышних венцем славы украшен, с нами на земли духом пребываеши, сияя чудесы. Моли Христа Бога, спастися душам нашим.
Кондак, Глас 8:
Монахов наставника изрядна и святителя всем людем милостива, чудотворца предивна и молитвенника о нас неусыпна, сошедшеся воспоим Питирима, Тамбовския земли похвалу.

195.Савве, архиеп. Сербскому

Тропарь, Глас 3:
Пути вводящаго в жизнь, наставник и первопрестольник и учитель был еси; первее бо пришед, святителю Савво, Отечество твое просветил еси, и породив тое Духом Святым, яко древа маслинная в мысленнем раи насадил еси всеосвященная твоя чада. Тем яко апостолом и святителем сопрестольна чтуще тя, молим: моли Христа Бога, даровати нам велию милость.
Кондак, Глас 8:
Яко первосвятителя великаго, и Апостолов сообщника, Церковь прославляет тя людей твоих преподобне. Но яко имея дерзновение ко Христу Богу, молитвами твоими от всяких нас бед спасай, да зовем ти: радуйся, отче Савво, Богомудре.

196.Софронию, еп. Иркутскому

Тропарь, Глас 1:
Скорый в бедах и скорбех заступниче, отче иерарше страны Сибирския, святителю Софроние, на небеси предстояй с первоиерархом Иркутския Церкви и всеми святыми, выну имаши благоволение Господа славы: призри на люди, притекающия к честным останкам святых мощей твоих, с верою и любовию слезно просящия твоея помощи и заступления, моли, Егоже проповедал еси людем Сибири, избавити я от находящих щол и наветов вражиих, просветити людие оляденевшая древле неверием сердца, даровати утверждение веры Христовы и спасти души наша.
Ин тропарь, Глас 4:
От юности Христа возлюбил еси, блаженне Софроние, добре управил еси иноческия обители, и архиерейства саном почтен быв, упасл еси Иркутскую паству: темже и по преставлении дарования чудес от Бога приял еси, и молиши Христа Бога избавити нас от бед и спасти души наша.
Кондак, Глас 3:
Пастырей начальнику Христу трудился еси, святителю Софроние, на пажити духовней северныя страны нашея, языцы монгольстии от прелести и скверны идольския избавляя, привел еси я к свету веры Христовы, и ныне со Ангелы Владычню Престолу предстоя, моли непрестанно о всех нас, избавити ны от бед и спасти души наша.
Ин кондак, Глас 4:
Соименнаго мудрости иерарха, изрядное Церкве Иркутския украшение, отца нашего святителя Софрония любовию восхвалим вси вернии, той бо есть хранитель града и страны сея и молитвенник о душах наших.

197.Спиридону, еп. Тримифунтскому

Тропарь, Глас 1:
Собора Перваго показался еси поборник и чудотворец, Богоносе Спиридоне, отче наш. Темже мертву ты во гробе возгласив, и змию в злато претворил еси, и внегда пети тебе святыя молитвы, Ангелы сослужащия тебе имел еси, священнейший. Слава Давшему тебе крепость, слава Венчавшему тя, слава Действующему тобою всем исцеления.
Кондак, Глас 2:
Любовию Христовою уязвився, священнейший, ум вперив зарею духа, детельным видением твоим деяние обрел еси, Богоприятне, жертвенник Божественный быв, прося всем Божественнаго сияния.

198.Стефану, еп. Пермскому

Тропарь, Глас 4:
Божественным желанием от юнаго возраста, Стефане премудре, разжегся, ярем Христов взял еси, и людей оляденевшая древле неверием сердца, Божественное семя в них сеяв, евангельски духовне породил еси. Темже преславную твою память почитающе, молим тя: моли, Егоже проповедал еси, да спасет души наша.
Кондак, Глас 8:
Самозванен не ищущим тебе, святителю, обрелся еси, люди от идольския лести свободив, ко Христове вере привел еси, и волхва пансотника посрамил еси, темже и первый епископ и учитель Перми был еси. Сего ради духовная твоя чада, яко тобою избавльшеся от идол, благодарная тебе возопием: радуйся, Стефане, учителю премудрый.

199.Тихону, еп. Амафунтскому, чдтв.

Тропарь, Глас 1:
Пустынный житель и в телеси Ангел, и чудотворец явился еси, богоносе отче наш Тихоне: постом, бдением, молитвою Небесная дарования приим, исцеляеши недужныя и души верою притекающих ти. Слава Давшему тебе крепость, слава Венчавшему тя, слава Действующему тобою всем исцеления.
Кондак, Глас 3:
В постничестве, святе, боголюбезном пребыв, Утешителеву силу с высоты приял еси, идол низложити прелести, люди же спасти, демоны отгнати, недуги исцеляти: сего ради почитаем тя яко Божия друга, Тихоне блаженне.

200.Тихону Задонскому

Тропарь, Глас 8:
От юности возлюбил еси Христа, блаженне, образ всем был еси словом, житием, любовию, духом, верою, чистотою и смирением. Темже и вселился еси в небесныя обители, идеже предстоя Престолу Пресвятыя Троицы, моли, святителю Тихоне, спастися душам нашим.
Кондак, Глас 8:
Апостолов преемниче, святителей украшение, Православныя Церкве учителю, Владыце всех молися, мир вселенной даровати и душам нашим велию милость.

201.Тихону, патриарху Московскому и всея Руси

Тропарь, Глас 3:
В годину тяжкую Богом избранный в совершенной святости и любви Бога прославил еси, во смирении величие, в простоте силу Божию являя, положил душу за Церковь, за люди своя, исповедниче патриарше святе Тихоне, моли Христа Бога, Емуже сораспялся еси, и ныне спасти землю Русскую и паству Твою.
Ин тропарь, Глас 1:
Апостольских преданий ревнителя и Христовой Церкви пастыря добраго, душу свою за овцы положившаго, жребием Божиим избраннаго, Всероссийскаго патриарха Тихона восхвалим и к нему с верою и упованием возопиим: предстательством святительским ко Господу Церковь Русскую в тишине соблюди, расточенныя чада ея во едино стадо собери, отступившия от правыя веры к покаянию обрати, страну нашу от междоусобныя брани сохрани, и мир Божий людям испроси.
Кондак, Глас 2:
Тихостию нрава украшен, кротость и милосердие кающимся являяй, во исповедании православныя веры и любви ко Господу тверд и непреклонен пребыл еси, святителю Христов Тихоне, молися о нас да не разлучимся от любве Божия, яже о Христе Иисусе, Господе нашем.

202. Феодосию Черниговскому:

Тропарь, Глас 4:
Преудобрен во архиереях, святителю Феодосие, был еси светило своему стаду, таже преставился еси в вечныя обители. Умоли у Престола Царя славы избавитися нам от находящих на ны зол, и спастися душам нашим, святе, молитвами твоими.
Кондак, Глас 4:
Пастырей Начальнику Христу трудился еси, святителю Феодосие, на пажити духовней питая словесныя твоя овцы, и приял еси от Христа Спаса целебный дар целити от немощи душевныя и телесныя всякаго с верою приходящаго к целебным твоим мощем. Моли, святе, о призывающих имя твое, от наветов вражиих спастися душам нашим.

203.Феофану Затворнику, еп. Вышенскому

Тропарь, Глас 8:
Православия наставниче, благочестия учителю и чистоты, Вышенский подвижниче святителю Феофане Богомудре, писаньми твоими слово Божие изъяснил еси и всем верным путь ко спасению указал еси. Моли Христа Бога спастися душам нашим.
Кондак, Глас 4:
Богоявлению тезоименитый, святителю Феофане, учении твоими многия люди просветил еси, со ангелы ныне предстоя Престолу Святыя Троицы, моли непрестанно о всех нас.

204.Филарету, митрополиту Московскому

Тропарь, Глас 4:
Духа Святаго благодать стяжав, богомудре святителю Филарете, истину и правду разумом просвещенным людем проповедал еси, яко учитель веры и страж неусыпный паству Российскую жезлом правости сохранил еси. Сего ради ко Христу Богу дерзновение имея, моли даровати Церкве утверждение, людем и душам нашим спасение.
Кондак, Глас 2:
Яко истинный подражатель преподобнаго Сергия, добродетель измлада возлюбил еси, богоблаженне Филарете. Яко пастырь праведный и исповедник непорочный, по святем преставлении от безбожных поругание и поношения приял еси, Бог же знаменьми и чудесы тя прославити и заступника Церкве нашея яви.

205. Филиппу, митрополиту Московскому

Тропарь, Глас 8:
Первопрестольников преемчниче, столпе Православия, истины поборниче, новый исповедниче, святителю Филиппе, положивый душу за паству твою. Темже яко имея дерзновение ко Христу, моли за град же и люди, чтущия достойно святую память твою.
Кондак, Глас 3:
Православия наставника и истины провозвестника, златоустаго ревнителя, российскаго светильника, Филиппа премудраго восхвалим, пищею словес своих разумно чада своя питающа, той бо языком хваления пояше, устнама же пение вещаше, яко таинник Божия благодати.

Святым благоверным князем и царем.

206.Александру Невскому

Тропарь, Глас 4:
Познай свою братию, Российский Иосифе, не в Египте, но на небеси царствующий, благоверный княже Александре, и приими моления их, умножая жита людем плодоносием земли твоея, грады владычествия твоего ограждая молением, православным людем на сопротивныя споборствуя.
Ин тропарь, Глас тойже:
Яко благочестиваго корене пречестная отрасль был еси, блаженне Александре, яви бо тя Христос яко некое Божественное сокровище Российстей земли, новаго чудотворца преславна и Богоприятна. И днесь сошедшеся в память твою верою и любовию, во псалмех и пениих радующеся славим Господа, давшаго тебе благодать исцелений. Егоже моли спасти град сей, и стране нашей Богоугодней быти, и сыновом Российским спастися.
Кондак, Глас 8:
Яко звезду тя пресветлую почитаем, от востока возсиявшую, и на запад пришедшую, всю бо страну сию чудесы и добротою обогащаеши, и просвещаеши верою чтущия память твою, Александре блаженне. Сего ради днесь празднуем твое успение, людие твои сущии, моли спасти Отечество твое, и вся притекающия к раце мощей твоих, и верно вопиющия ти: радуйся, граду нашему утверждение.
Ин кондак, Глас 4:
Якоже сродники твои, Борис и Глеб, явишася тебе с Небесе в помощь, подвизающемуся на Вейлгера Свейскаго и воев его: тако и ты ныне, блаженне Александре, прииди в помощь твоим сродником, и побори борющия ны.

207.Анне Кашинской, прп.

Тропарь, Глас 3:
Днесь восхваляем тя, преподобная мати, великая княгине инокине Анно: яко лоза плодовита посреде терния, процвела еси во граде Кашине твоими добродетельми, и всех удивила еси чудным твоим житием, темже Христу Богу угодила еси, и ныне, радующися и веселящися, пребываеши с лики преподобных жен, наслаждающися райския красоты и веселия.Молим убо тя: моли о нас Человеколюбца, Христа Бога нашего даровати нам мир и велию милость.
Кондак, Глас 4:
Яко пресветлая звезда явилася еси в Российстей земли, во граде Кашине, преподобная мати Анно: во всех благочестивых и верных женах аки крин процвела еси чистым и непорочным твоим житием, во инокинях же совершенными твоими труды и подвиги, и возшла еси к вышнему граду, радующися и веселящися, яко добре совершивши твое течение. И ныне честныя твоя мощи, аки бисерие драгое явишася на исцеление всем приходящим с верою. Тем и вопием ти: радуйся, всекрасная душею, и моли Христа Бога о спасении душ наших.

208.Борису и Глебу, страстотерпцам

Тропарь, Глас 2:
Правдивая страстотерпца и истинная Евангелия Христова послушателя, целомудренный Романе с незлобивым Давидом, не сопротив стаста врагу сущу брату, убивающему телеса ваша, душам же коснутися не могущу. Да плачется убо злый властолюбец, вы же радующеся с лики ангельскими, предстояще Святей Троице, молитеся о стране нашей, богоугодней быти, и сыновом российским спастися.
Кондак, Глас 3:
Возсия днесь преславная память ваша, благороднии страстотерпцы Христовы, Романе и Давиде, созывающи нас к похвалению Христа Бога нашего. Тем притекающе к раце мощей ваших, исцеления дар приемлем молитвами вашими, святии: вы бо божественнии врачеве есте.

209.Всеволоду-Гавриилу

Тропарь, Глас 4:
Из млада явился еси, Богомудре княже Гаврииле, Божественный сосуд, избран Богови, благочестием воспитан, веру непорочну соблюд и многи святыя церкве устроив, изгнание претерпел еси от своих, якоже и целомудрии прародители твои, от брата убиение. С нимиже предстоя Святей Троице, молися державе Российстей сохраненней быти и всем нам спастися.
Кондак, Глас 8:
Многомудренно преселився во град Псков, блаженне княже Гаврииле, плод благий Богови в жизни сей был еси, присноцветущ добродетельми, и якоже Давид незлобием: того ради получил еси жизнь вечную на небесех, всегда зря Святую Троицу, моли избавитися нам от всяких бед, да зовем ти: радуйся, утверждение граду нашему.

210.Вячеславу Чешскому

Тропарь, Глас 4:
Днесь Ангели с человеки радуются вкупе общим веселием, Небо и земля светло ликует в память ти, святе. И мы, грешнии, прилежно ти вопием: помолитесь к Владыце о нас, избавити ны от напасти, видимых и невидимых враг, чтущих пресветлую ти память.
Кондак, Глас 1:
С лики Ангельскими предстоя, блаженне княже Вячеславе, наслаждаешися Божественныя и неизреченныя доброты, и оттуду благодетельныя дары почерп чудес, всем притекающим верою под твою святыню источаеши цельбам дарование.

211.Даниилу Московскому

Тропарь, Глас 3:
Явился еси в стране нашей яко звезда пресветлая, благоверный княже Данииле, лучами света твоего озаряя град твой и обитель твою, людем православным поборник еси, пленным свободитель и нищим защититель, моли Христа Бога державе Российстей даровати мир и спасти души наша.
Кондак, Глас 6:
Еже по образу соблюд непреложно, и яже в мире тленная оставив, со ангельскими лики предстоиши Христу, преподобне княже Данииле, никакоже забывая чад твоих, но милостивно посещая и глаголя им: аз есмь с вами и никтоже на вы.

212.Димитрию Донскому

Тропарь, Глас 3:
Велика обрете в бедах тя поборника земля Русская, языки побеждающа, якоже на Доне Мамаеву низложил еси гордыню, на подвиг сей прияв благословение преподобнаго Сергия. Тако княже Димитрие Христу Богу молися даровати нам велию милость.
Кондак, Глас 2:
Подвиги твоими, святе Димитрие, страну нашу Бог сохрани, давый тебе силу непобедимую. И ныне, предстателю крепкий, соблюдай молитвами святыми град твой Москву невредим от всех навет вражиих.

213.Димитрию, царевичу Угличскому, чдтв.

Тропарь, Глас 4:
Царскую диадиму обагрил еси кровию твоею, Богомудре мучениче, за скиптр крест в руку приим, явился еси победоносец, и жертву непорочну Владыце принесл еси себе, яко бо агнец незлобив от раба заколен еси, и ныне радуяся предстоиши Святей Троице. Молися о державе сродников твоих богоугодней быти и сыновом российским спастися.
Кондак, Глас 8:
Возсия днесь в славней памяти твоей верным веселие, яко бо доброрасленный грезн прозябл еси и Христу красен плод принесл еси себе. Темже и по убиении твоем соблюде тело твое нетленно, страдальчески обагреное кровию, благородне святе Димитрие, соблюдай Отечество твое и град твой невредим, тому бо еси утверждение.

214.Евфросинии (Евдокии) Московской, прп.

Тропарь, Глас 8:
По земнем вдовстве Небесному Жениху себя уневестивши и в княжестем чертозе подвижнически поживши, послежде и чертог, и чад твоих Бога ради оставила еси, преподобная Евфросиние, и вшедши во обитель, тобою созданную, во иноческом образе многи подвиги показала еси. И ныне, предстоящи Христу Богу, моли спастися душам нашим.
Кондак, Глас 2:
Вся красная мира сего,яко суетная презревши, и тело твое постом и бдением изнуривши, непрестанными молитвами Богу угодила еси, преподобная Евфросиние, и дар исцелений от Него прияти сподобльшися, слепому прозрение, и многим недужным исцеление даровала еси. Темже радостно взываем, глаголюще: слава Богу, прославляющему святыя Своя.

215.Елисавете Московской, мч.

Тропарь, Глас 1:
Смирением достоинство княжеское сокрывши, Богомудрая Елисавето, сугубым служением Марфы и Марии Христа почтила еси. Милосердием, терпением и любовию себе предочистивши, яко жертва праведная Богу принеслася еси. Мы же, чтуще добродетельное житие и страдания твоя, яко истинную наставницу усердно просим тя: святая мученице великая княгине Елисавето, моли Христа Бога спасти и просветити души наша.
Кондак, Глас 2:
Величие подвига веры кто повесть? Во глубине земли, яко в раи светлости, страстотерпица великая княгиня Елисавета со ангелы во псалмех и пениих радовашеся и, убиение претерпевающи, о безбожных мучителех взываше: Господи, прости им грех сей, не ведят бо, что творят. Тоя молитвами, Христе Боже, помилуй и спаси души наша.
Ин кондак, Глас 5:
От славы царственныя, вземши Крест Христов, прешла еси к славе небесней, молящи врагов, и обрела еси радость вечную, святая мученице княгине Елисавето, с Варварою мученицею. Темже молим вас: молите о душах наших.

216.Игорю Черниговскому

Тропарь, Глас 4:
Наста днесь всечестная память страстотерпца благовернаго князя Игоря, созывающая люди в пречестный храм Спасов, идеже радостно сошедшеся благочестивых множество молитвенно празднуют святую память твою, и с верою взывают ти: молися, святе, стране Российстей, граду Чернигову и всем православным христианом в мире и благоденствии спастися.
Ин тропарь, Глас 4:
Просветився Божественным крещением Духа Святаго светлостьми озаряем, Евангелие Христово в сердце твое восприял еси делом слово Сына Божия исполняя, благоверный княже Игоре, моли Всеблагаго Спасителя нашего даровати нам мир и милость и спасение душ наших, чтущих честную память твою.
Кондак, Глас 6:
Изменил еси земнаго княжения славу во иночества образ смиренный, и страдальчески земное житие скончав, ныне на Небесех радуешися, усердно моляся о чтущих тя, Игоре, страдальцев похвало.
Ин кондак, Глас 8:
Княжескую диадиму обагрил еси кровию твоею, Богомудре страстотерпче Игоре, за скиптр крест в руку приим, явился еси победоносец и жертву непорочну Владыце принесл еси себе. Яко бо агнец незлобив от раб убиен был еси, и ныне радуяся предстоиши Святей Троице, молися спастися душам нашим.

217.Константину и чадом его Михаилу и Феодору Муромским, чдтвв.

Тропарь, Глас 4:
Константин днесь весело ликовствует, предстоя Престолу Пресвятыя Троицы, видя Отечествие свое, мастию духовною сияющее: емуже последоваша Михаил и Феодор, сынове его, и молятся вси трие вкупе о душах наших.

Кондак, Глас 8:
Изрядному воеводе и правоверному князю Константину, с сынома его вкупе, Отечество его хвалящися вопиет, имеющее его начальника и заступника, яко избавльшееся им от прелести и скверны идольския: сего ради вопием ему сице: радуйся, княже Константине, блаженне.

218.Людмиле Чешской, св. блгв. кн.

Тропарь, Глас 4:
Оставльша тьму идолослужения и с горячей любовию прияв свет Православныя веры Христовы, явися ты, святая Людмило, яко звезда утренняя, и светом святости твоея истинный день Богопочитания и Честей земли начав.
Кондак общий мученице (см. ╧ 231)

219.Михаилу Тверскому

Тропарь, Глас 8:
Возвысив ум твой к Богу, и жития со Ангелы возжелел еси, тленную славу земную оставил еси, блаженне, и положил еси душу твою за люди твоя, восприял еси венец противу трудов твоих, Богомудре Михаиле, моли Христа Бога о чтущих любовию святую память твою.
Кондак, Глас 2:
Вышних ищя и земную славу презрев, Церковь Божию обагрил еси твоею кровию, за нюже и пострадал еси, святе Михаиле, заколение неправедное прием веселяся: темже со Ангелы предстоя Христу Богу, моли непрестанно за вся ны.

220.Михаилу Черниговскому и болярину Феодору, свв. мчч. и испп.

Тропарь, Глас 4:
Жизнь вашу мученически совершивше, исповедания венцы украсившеся, к небесным востекосте, Михаиле премудре с доблим Феодором, молите Христа Бога сохранити Отечество наше и люди, по велицей Его милости.
Кондак, Глас 8:
Царство земное и ничтоже вменив, славу яко преходящую оставил еси, самозван пришед к подвигом, Троицу проповедал еси пред нечестивым мучителем, страстотерпче Михаиле, с доблим Феодором, Царю сил предстояще, молите без вреда сохранити Отечество наше и люди, да вас непрестанно почитаем.

221.Николаю, св. блгв., страстотерпцу, Императору Российскому
(Творение Зарубежной Православной церкви)

Тропарь, Глас 5:
Царства земнаго лишение, узы и страдания многоразличныя кротко претерпел еси, свидетельствовав о Христе даже до смерти от богоборцев, страстотерпче великий Боговенчанный царю Николае, сего ради мученическим венцем на небесех, венча тя с царицею и чады и слуги твоими Христос Бог, Егоже моли помиловати страну Российскую и спасти души наша.
Кондак, Глас 6:
Надежда царя мученика с царицею и чады и слуги укрепи, и к Твоей любви окрыли, будущий им покой предвозвестивши, тех молитвами, Господи, помилуй нас.
Ин кондак (акафистный), Глас 6:
О, пречудный и преславный страстотерпче царю Николае, призри на царство твое земное и люди твоя. Всякаго бо ответа о гресех наших недоумеем, и моли Вседержителя, да не внидет в суд с нами, но сподобит ны непрестанно воспевати: Аллилуия.

222.Николе Святоше, кн. Черниговскому, прп.

Тропарь, Глас 2:
Отечество и славу княжения твоего оставил, князю смирения, Христови, усердно последовал еси, преподобне отче наш Николо: тем приял еси от Него вечное царство и славу на небеси, идеже ликуя, поминай нас, чтущих память твою верно.
Кондак, Глас 8:
Вся красная мира сего и тленное богатство нивочтоже вменив, обогатился еси многими чудесы и знамении от Христа Бога, Емуже в веселии предстоя, поминай нас, чтущих любовию память твою, да зовем ти: радуйся, Николо пречудне.

223.Олегу Брянскому

Тропарь, Глас 8:
От юности возлюбил Христа всем сердцем, преподобне, славу земную яко преходящу оставил еси, и царство земное в ничтоже вменивше лику инок радостно причелся еси, и труды многими град Брянск, аки солнце пресветло, озарил еси, тем быв Троицы украшение, моли, княже Олеже, Христа Бога спастися душам нашим.
Кондак, Глас 4:
Уподобился еси плодоносней леторасли от корене честнаго, Олеже благородне, истину возлюбив и нетленный Христов живот. Темже молитвою, бдением и пощением светильник великий быв твоим учеником, проствети, блаженне, Отечество твое и спаси души наша.

224.Ольге, равноап.

Тропарь, Глас 1:
Крилами богоразумия вперивши твой ум, возлетела еси превыше видимая твари, взыскавши Бога и Творца всяческих, и Того обретши, паки рождение крещением прияла еси: древа животнаго наслаждающися, нетленна во веки пребываеши, Ольго приснославная.
Кондак, Глас 4:
Воспоем днесь Благодетеля всех Бога, прославльшаго в России Ольгу Богомудрую: да молитвами ея подаст душам нашим грехов оставление.

225.Петру, во иноцех Давиду, и Февронии, во инокинях Евфросинии,Муромским чудтвв.

Тропарь, Глас 8:
Яко благочестиваго корене пречестная отрасль был еси, добре во благочестии пожив, блаженне Петре, тако с супружницею твоею премудрою Феврониею, в мире Богу угодивше, и преподобных житию сподобистеся: с нимиже молитеся Господеви, сохранити без вреда Отечество ваше, да вас непрестанно почитаем.
Кондак, Глас 8:
Мира сего княжение и славу временну помышляя, сего ради благочестно в мире пожил еси, Петре, купно и супружницею твоею премудрою Феврониею, милостынею и молитвами Богу угодивше. Темже и по смерти неразлучно во гробе лежаще, исцеление невидимо подаваете. И ныне Христу молитеся сохранити град же и люди, иже вас славящих.

226.Ростиславу - Михаилу, блгв. князю Смоленскому

Тропарь, Глас 6:
Обрете тя строителя градов и церквей земля Киевская, великий княже Ростиславе, смуты устранял еси, единство храня, темже Господь тебе мудрость ниспосла, сего ради Христу Богу молися спастися душам нашим.
Кондак общий мученику (см. N229)

227.Тамаре, св. блгв. царице Грузинской

Тропарь, Глас 8:
Вышния красоты желая, нижняя сласти телесныя далече от себе отгнала еси и, в чертозе царском пребывающи, ангельское житие препровождала еси, царице Тамаро блаженная, моли Христа Бога спастися душам нашим.
Ин тропарь, Глас 4:
Во святых дивная, Иверии светило, благоверная царице Тамаро, на горах высоких храмы воздвигшая, да в них моления возсылают ко Господу, мольбами твоими крепость даровавшая воем христолюбивых людей страны Иверския, десницею же своею полчища агарянская низпровергшая, моли Христа Бога спастися душам нашим.

228. Феодору Смоленскому и чадам его Давиду и Константину Ярославским, чудтв.

Тропарь, Глас 4:
От юности вашея Христове любви прилепившеся, святии, усердно закон и оправдания Того сохранисте: отонудуже и чудесными дарованьми обогатившеся, исцеления источаете: Феодоре, Давиде и Константине, о верою вас почитающих, молите Христа Бога, спастися душам нашим.
Кондак, Глас 8:
Явистеся светильницы всесветлии, во плоти яко Ангели, и яко жизни древеса райская, пощением, бдением и верою возвращаеми, процвели есте молитвами вашими, небесныя благодати приемше. Врачеве же крепцы явльшеся, исцеляете недугующих души, с верою прибегающих к раце мощей ваших, чудотворцы славнии, Феодоре, Давиде и Константине. Молите Христа Бога, грехов оставление даровати, верою и любовию чтущим память вашу.

Тропари и кондаки мученикам.

229. Мученику единому

Тропарь, Глас 4:
Мученик Твой, Господи, (имярек), во страдании своем венец прият нетленный от Тебе, Бога нашего: имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.
Кондак, Глас 6:
Звезда светлая явился еси, непрелестная мирови, солнца Христа возвещающи, зарями твоими, страстотерпче (имярек), и прелесть погасил еси всю: нам же подаеши свет, моляся непрестанно о всех нас.

230.Мученикам

Тропарь, Глас 4:
Мученицы Твои, Господи, во страданиих своих венцы прияша нетленныя от Тебе, Бога нашего: имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.
Ин тропарь, Глас 1:
Болезньми святых, имиже о Тебе пострадаша, умолен буди, Господи, и вся наша болезни исцели, Человеколюбче, молимся.
Кондак, Глас 2:
Светильницы светлии явльшеся, Божественнии мученицы, тварь всю светлостию чудес озаряете, недуги разрешающе, и глубокую тьму всегда отгоняюще, Христу Богу молящеся нерестанно о всех нас.

231.Мученице, преподобномученице единой

Тропарь, Глас 4:
Агница Твоя, Иисусе, (имярек), зовет велиим гласом: Тебе, Женише мой, люблю, и Тебе ищущи страдальчествую, и сраспинаюся и спогребаюся крещению Твоему, и стражду Тебе ради, яко да царствую и Тебе, и умираю за Тя, да и живу с Тобою, но яко жертву непорочную приими мя с любовию пожершуюся Тебе. Тоя молитвами, яко милостив, спаси души наша.
Кондак мученице единой, Глас 2:
Храм Твой всечестный, яко цельбу душевную обретше вси вернии, велегласно вопием ти, дево мученице (имярек), великоименитая: Христа Бога моли непрестанно о всех нас.
Кондак преподобномученице единой, Глас 2:
Божественная память твоя, (имярек), днесь возсиявши явися мирови яко солнце, сказующи житие твое: ты бо воздержанием плотская двизания разорши, и страдания кровию уненвестилася еси Христови. Темже хвалящия тя избави от всяких зол, да зовем ти: радуйся, мати преподобная.

232.Мученицам

Тропарь, Глас 1:
Агницы словесныя Агнцу и Пастырю приведостеся мучением ко Христу, течение скончавше, и веру соблюдше. Темже днесь радостною душею совершаем, досточудныя, святую вашу память, Христа величающе.
Кондак, Глас 4:
Страстотерпиц Христовых память празднуем и верою просящи помощи, избавитися всем от всякия скорби, зовущи: Бог наш с нами, иже сих прославивый якоже изволи.

233.Священномученику единому

Тропарь, Глас 4:
И нравом причастник, и престолом наместник апостолом быв, деяние обрел еси, Богодухновенне, в видения восход, сего ради слово истины исправляя, и веры ради пострадал еси даже до крове, священномучениче (имярек), моли Христа Бога спастися душам нашим
Кондак, Глас 4:
Во святителех благочестно пожив, и мучения путь прошед, идольския угасил еси жертвы, и поборник быв твоему стаду Богомудре. Темже тя почитающе тайно вопием ти: от бед избави ны присно твоими молитвами, отче наш (имярек).

234.Александру (Хотовицкому),сщмч., протопресвитеру

Тропарь, Глас 6:
Кротость и смирение стяжавый, любовь Христову пастве своей показал еси в годину огненных искушений Церкве Российския и, яко пастырь добрый, душу свою за Него положил еси. Молися о нас, священномучениче Александре, просветити души наша.
Кондак, Глас 2:
Труды и болезни на рамо свое взял еси и, радуяся, путем тесным шествовал еси, страданьми за Христа Небеснаго Царства достигл еси. Моли о нас Бога Спаса, священномучениче Александре, обрести нам милость в День Судный.

235.Александре, царице, мц.

Тропарь, Глас 4:
Царства земнаго славу презревши, единаго Христа нас ради распятаго, возлюбила еси и Того мужественне исповедающи, венцем мученическим увенчалася еси, всеблаженная царица Александро, темже и ныне Престолу Царя славы на небесех предстоящи, молися о спасении душ наших.
Кондак общий мученице (см. N231)

236.Анастасии Узорешительнице, вмц.

Тропарь, Глас 4:
Победоноснаго Воскресения истинноименитая наречена еси, мученице Христова, победы на враги поставила еси мук терпением, Христа ради, Жениха твоего, Егоже возлюбила еси. Того моли спасти души наша.
Кондак, Глас 2:
Во искушениих и скорбех сущии, к твоему храму притекающе, приемлют честная дарования от живущия в тебе Божественныя благодати, Анастасие: ты бо присно миру точиши исцеления.

237.Андрею Стратилату и иже с ним

Тропарь, глас 5:
Земнаго сана славу оставив, Небесное Царство наследовал еси: кровными каплями, яко пречудным камением нетленныя венцы украсил еси, и ко Христу привел еси собор страстотерпец, с лики ангельскими в невечернем свете незаходимаго Солнца Христа обрел еси, святе Андрее Стратилате. Егоже моли с пострадавшими с тобою присно, да спасет души наша.
Кондак, Глас 2:
В молитвах Господеви предстоя, якоже звезда солнцу предтекий, и желаемое сокровище Царствия узрел еси, радости неизреченныя исполняяся, Безсмертному Царю в бесконечныя веки, от Ангел беспрестани хвалимому поеши, Андрее Страстилате: с нимиже молися непрестанно о всех нас.

238.Антонию, Иоанну и Евстафию, Виленским и Литовским чудотворцам

Тропарь, Глас 4:
Иже земных чести и славы отвергшеся, доблии и честнии страдальцы, веры ради крепко и мужественно муки претерпесте, на смерть себе вдаше за Живот всех Владыку. Темже и Христос преславно столпом облачным с небесе вас озари, и почестьми и венцы от Престола Славы венча. Со Ангелы Тому предстояще, молите спастися душам нашим.
Ин тропарь, Глас тойже:
От корене неплодна, преблаженне, возрастивше Православныя веры ветви, первомучеником тезоименитии явистеся, злаго бо и нечестиваго князя ярости не убоястеся, повелевающа Христа отрещися. Сего ради мученическия венцы приемше, и со Ангелы Престолу Владычню предстояще, о нас молитеся, преблаженнии, православно чтущих святую память вашу.
Кондак, Глас 3:
Отеческую прелесть оставльше, святии, приведостеся Христови, всем души усердием стасте мужемудренно до смерти. Темже и взясте победы почесть воистину, о всех Владыку нашего непрестанно моляще.

239.Варваре, вмц.

Тропарь, Глас 8:
Варвару святую почтим: вражия бо сети сокруши, и яко птица избавися от них, помощию и оружием Креста, всечестная.
Кондак, Глас 4:
В Троице благочестно певаемому последовавши Богу, страстотерпице, идольская притупила еси чтилища, посреде же подвига страдальчествующи, Варваро, мучителей прещения не устрашилася еси, мужемудренная, велегласно поющи присно: Троицу чту, Едино Божество.

240.Вениамину, митрополиту Петроградскому, сщмч.

Тропарь, Глас 1:
Светильник всесветлый во граде святаго Петра явился еси, священномучениче отче Вениамине. Любовь и милосердие в сердцах верных насаждая, благотворити призывал еси терпящим глад и нищету. Сего ради и мы к тебе, пастырю добрый, прибегаем и с верою вопием: моли милостиваго Бога, отечество наше в Православии и благочестии утвердити и Церкви мир даровати.
Кондак, Глас 6:
От юности иго Христово на рамо взем, истинный страж Православныя Церкве явился еси, священномучениче Вениамине. Клевету, узы, страдания и суд неправедный от беззаконных мужественно претерпевая, святыню церковную на поругание не предал еси. Темже и Христос даром терпения и любве тя исполни, во еже пред мученическою кончиною со благодарением взывати: за вся, Господи, слава Тебе.

241.Вере, Надежде, Любве и Софии

Тропарь, Глас 4:
Торжествует Церковь первородных, и свеселится приемля матерь о чадах веселящуюся, яже яко мудрости тезоименитая тройственным богословским добродетелем равночислесленныя породи. Тыя с мудрыми девами зрит уневестившияся Жениху Богу Слову, с нею и мы духовне в памяти их свеселимся, глаголюще: Троицы поборницы, Веро, Любве и Надеждо, в вере, любви и надежде утверждайте нас.
Кондак, Глас 1:
Софии честныя священнейшия ветви, Вера и Надежда и Любовь, показавшеся, мудрость обуиша еллинскую благодатию, и пострадавше, и победоносицы явившеся, венцем нетленным от всех Владыки Христа увязошася.

242.Владимиру, митрополиту Киевскому, сщмч.

Тропарь, Глас 2:
Веру Православную непорочно соблюд, подвигом добрым во святительстве подвизался еси, священномучениче отче Владимире, и убивающим тя рекл еси: Господь да простит вас. Сего ради уготовася ти венец правды от Христа, Бога нашего, Егоже, яко имеяй дерзновение, моли оправдание даровати нам в День Судный.
Ин тропарь, Глас 2:
Веры православныя непорочный блюстителю и заповедей Христовых усердный исполнителю, священномучениче Владимире, Христа всем сердцем возлюбив, паству твою добре упасл еси, незлобиво мученическую смерть приял еси. Сего ради в вечной славе пребывая, моли спастися душам нашим.
Кондак, Глас 4:
Образ Христова милосердия являя, покров и защищение пастве твоей был еси, святителю отче Владимире, и кротости страдания приемля, безбожных мучителей, благословляя, простил еси. Темже и нам испроси у Христа Бога дух мирен и велию милость.

243.Вонифатию

Тропарь, Глас 4:
К сословию послан мучеников, мученик был еси истинен, пострадав за Христа крепчайше, всехвальне, мощми же возвратился еси верою пославшей тя, Вонифатие блаженне, моли Христа Бога прияти нам грехов прощение.
Кондак, Глас 4:
Священие непорочное самовольне Тебе привел еси, Иже от Девы тебе ради родитеся Хотящему, святе венченосче, премудре Вонифатие.

244.Георгию Победоносцу, вмч.

Тропарь, Глас 4:
Яко пленных свободитель и нищих защититель, немощствующих врач, Победоносче великомучениче Георгие, моли Христа Бога спастися душам нашим.
Ин тропарь, Глас тойже:
Подвигом добрым подвизался еси, страстотерпче Христов, верою, и мучителей обличил еси нечестие, жертва же благоприятна Богу принеслся еси, темже и венец приял еси победы, и молитвами, святе, твоими всем подаеши прегрешений прощение.
Кондак, Глас 8:
К возбранному и скорому заступлению твоему прибегше вернии, молим избавитися, страстотерпче Христов, от соблазн вражиих, воспевающим тя, и всяких бед и озлоблений, да зовем: радуйся, мучениче Георгие. Ин кондак, Глас 4: Возделан от Бога показался еси благочестия делатель честнейший, добродетелей рукояти собрав себе, сеяв бо в слезах, веселием жнеши, страдальчествовав же кровию, Христа приял еси, и молитвами, святе, твоими всем подаеши прегрешений прощение.

245.Гурию, Самону и Авиву, мчч. и испп.

Тропарь, Глас 5:
Чудеса святых Твоих мученик стену необоримую нам даровавый, Христе Боже, тех молитвами советы языков разори, яко Един Благ и Человеколюбец.
Кондак, Глас 2:
С высоты мудрии благодать приемше, сущим во искушениих предстоите, всехвальнии. Темже отроковицу святии от смерти горькия избависте: вы бо воистинну есте Едесу слава и миру радость.

246.Димитрию Солунскому, мироточцу, вмч.

Тропарь, Глас 3:
Велика обрете в бедах тя поборника вселенная, страстотерпче, языки побеждающа, якоже бо Лиеву низложил еси гордыню, и на подвиг дерзновенна сотворив Нестора, тако, святе Димитрие, Христу Богу молися даровати нам велию милость.
Кондак, Глас 2:
Кровей твоих струями, Димитрие, Церковь Бог обагри, Давый тебе крепость непобедимую, и соблюдая град твой невредим: того бо еси утверждение.

247.Дионисию Ареопагиту, сщмч.

Тропарь, Глас 4: Благости научився, и трезвяся во всех, благою совестию священнолепно оболкся, почерпл еси от сосуда избраннаго неизреченная, и веру соблюд, равное течение совершил еси, священномучениче Дионисие, моли Христа Бога, спастися душам нашим.
Кондак, Глас 8:
Небесная врата прошед духом, яко ученик до третияго небесе достигшаго Апостола, Дионисие, неизреченных обогатился еси всяким разумом, и озарил еси во тьме неведения седящия. Темже зовем: радуйся, отче всемирный.

248.Евдокии, прпмц.

Тропарь, Глас 8:
Правостию умною душу твою привязавши в любовь Христову, тленных и красных и временных забытием претекла еси, яко Слова ученица, пощением страсти первее умертвивши, страдальчески второе врага посрамила еси. Тем Христос сугубых венцев сподоби тя, славная Евдокие, преподобная страстотерпице, моли Христа Бога спастися душам нашим.
Кондак, Глас 4:
Во страдании твоем добре подвизавшися, и по смерти нас освящаеши чудес излиянии, всехвальная, верою прибегающия в Божественную церковь твою, и торжествующе молим тя, преподобная мученице Евдокие, да избавимся недуг душевных и чудес благодать почерпем.

249.Евфимии всехвальной

Тропарь, Глас 4:
Жениха твоего Христа возлюбивши, и свещу твою светло уготовльши, добродетельми возсиявши, всехвальная Евфимие, тем возшла еси с ним на брак, венец страдания от Него приемши. Но от бед избави нас, чтущих верою память твою.
Кондак, Глас 6:
Подвиги во страдальчестве, подвиги в вере положила еси тепле за Христа, Жениха твоего, но и ныне якоже ереси, и врагов шатание покорити моли Богородицею, яже от шестисот тридесяти богоносных отец предел приемшая, и хранящая, всехвальная.

250. Екатерине, св. вмч.

Тропарь, Глас 4:
Добродетельми, яко лучами солнечными, просветила еси неверныя мудрецы, и якоже пресветлая луна ходящим в нощи неверия тьму отгнала еси, и царицу уверила еси, вкупе же и мучителя обличила еси, Богозванная невесто блаженная Екатерино. Желанием востекла еси в Небесный Чертог к Прекрасному Жениху Христу, и от Него царским венцем венчалася еси. Емуже со ангелы предстоящи, за ны молися, творящия пречестную память твою.
Кондак, Глас 2:
Лик честный Божественне мучениколюбцы воздвигните ныне, почитающе всемудрую Екатерину: сия бо в тризнищи Христа проповеда, и змия попра, риторов разумы укротивши.

251. Ермогену, сщмч.

Тропарь, Глас 4:
Российския земли первопрестольниче и неусыпный о ней Богу молитвенниче! За веру Христову и паству твою душу свою положив, страну нашу от нечестия избавил еси. Темже вопием ти: спасай нас молитвами твоими, священномучениче Ермогене, отче наш.
Кондак, глас 6:
Темницею и гладом изнуряем, даже до смерти верен пребыл еси, блаженне Ермогене, малодушие от сердец людей твоих изгоняя и на общий подвиг вся призывая. Темже и нечестивых мятеж низложил еси и державу нашу утвердил еси, да вси зовем ти: радуйся, заступниче Российския земли.

252. Игнатию Богоносцу, сщмч.

Тропарь, Глас 4:
Апостольских нравав подражателю и престола их сонаследниче, архиереев удобрение и мучеников славо, Богодухновенне, на огнь, и меч, и звери дерзнул еси, веры ради и, слово истины исправляя, до крове пострадал еси, священномучениче Игнатие, моли Христа Бога спастися душам нашим.
Кондак, Глас 4:
От востока днесь возсиявый и тварь всю просветивый ученьми, мученичеством украсися, Богоносный и Божественный Игнатие.

253. Иоанну Воину, мч. и чдтв.

Тропарь, Глас 4:
Всеблагаго Бога и Царя благоверный раб и воин явился еси, Иоанне чудодетелю, пострадав бо ради веры мужески, блаженно же скончав течение, зриши Всетворца Господа в небесех светлейше. От Негоже прием дарование чудес, страждущим человеком во всяких напастех помогаеши, укрепляеши воины в ратех, от врагов пленения, ран же и внезапных смертей и от бед лютых изымаеши. Темже моли Владыку Христа, приснопамятне, да во всяком обстоянии сотворит нам милость, и не введет нас во искушения, но спасет души наша, яко Человеколюбец.
Кондак, Глас 6:
Благочестиваго воина Христова, победившаго враги душевныя и телесныя богомудренно, Иоанна мученика достодолжно песньми восхвалим: чудодействуя бо подает обильная исцеления страждущим людем, и молится Господу Богу от всяких бед спасти правоверныя.

254. Иоанну Новому, Сочавскому, вмч.

Тропарь, Глас 4:
Житие на земли добре окормляя, страдальче, милостынями и частыми молитвами и слезами, паки же ко страданию мужески устремився, персское обличил еси нечестие. Темже Церкве был еси утверждение и христиан похвало, Иоанне приснопамятне.
Кондак, Глас 4:
Морскую плавая пучину куплею, от востока тщался еси к северу, но Богу призвавшу тя, якоже Матфей мытницу, ты же куплю оставль и Тому последовал еси кровию мучения, временными искупив непроходимая, и венец приял еси непобедимый.

255. Киру и Иоанну, безсеребр., чдтв.

Тропарь, Глас 5:
Чудеса святых твоих мученик, стену необориму нам даровавый, Христе Боже, тех молитвами советы языков разори, яко един Благ и Человеколюбец.
Кондак, Глас 3:
От Божестенныя благодати дар чудес приемше святии, чудодействуете, непрестанно, вся наша страсти рукодейством секуще невидимым, Кире Богомудре со Иоанном славным: вы бо Божественнии врачеве есте.

256. Клименту, папе Римскому, сщмч.

Тропарь, Глас 4:
Иже от Бога чудодействы преславно удивляя вселенныя концы мира, священный страдальче, паче естества морю, составы водам содеваеши разделение, в честней памяти твоей, всегда притекающим усердно в Богозданную ти церковь, чудесным твоим мощем: и по всенародном хождении море во едино течение чудодетельне твориши, Клименте предивный, моли Христа Бога, спастися душам нашим.
Кондак, Глас 2:
Божественнаго винограда священноодеянна всем лоза явися, каплющи сладость премудрости, молитвами твоими, всечестне, да тебе исткану яко багряницу, песнь мысленную принесем, Клименте святе: спаси рабы твоя.

257. Кукше и Пимену постнику, Печерским, сщмчч.

Тропарь, Глас 3:
Мученическою кровию, священне Кукше, в проповеди Евангелия со учеником ти блаженным Никоном честне украсивыйся, и Пимене в постничестве светозарно просиявый, в един день и час внидосте в свет незаходимый, идеже молитеся Господеви, да подаст нам велию милость.
Кондак, Глас 4:
Светила разумная сошедшеся хвалами воспоем, людие, просияли бо суть в мире сем Пимен многими подвиги, Кукша же со учеником Никоном проповедию слова и сии трие единоумно предстояще Святей Троице, яко солнце сияют, и просвещают любовию память их восхваляющих.

258. Маккавеям, матери их Соломонии и учителю Елеазару

Тропарь, Глас 1:
Болезньми святых, имиже о Тебе пострадаша, умолен буди, Господи, и вся наша болезни исцели, Человеколюбче, молимся.
Кондак, Глас 2:
Премудрости Божия столпи седмочисленнии, и Божественнаго света светильницы седмосвещнии, Маккавеи всемудрии, прежде мучеников превелии мученицы: с ними же всех Богу молитеся, спастися почитающим вас.

259. Никите, вмч.

Тропарь, Глас 4:
Крест Христов, яко некое оружие усердно восприим, и к борению врагов притекл еси, и за Христа пострадав, последи огнем священную твою душу Господу предал еси: отонудуже и даров исцеления от Него сподобился еси прияти, великомучениче Никито. Моли Христа Бога спастися душам нашим.
Кондак, Глас 2:
Прелести посек державу стоянием твоим, и победы приим венец во страдальчествех твоих, со Ангелы славне радуешися, Никито тезоимените, с ними Христа Бога моля непрестанно о всех нас.

260. Никомидийским двадцати тысячам сожженных мучеников

Тропарь, Глас 2:
Страстотерпцы Господни, блаженна земля, напившаяся кровьми вашими, и свята селения, приимшая телеса ваша: в подвизе бо врага победисте, и Христа со дерзновением проповедасте. Того, яко блага, молите, спастися, молимся, душам нашим.
Кондак, Глас 2:
Тверди душею по вере, святии, огнем страдания приемше две тмы страдалец, вопиюще Рождшемуся от Девы: приими всесожжения наша за Тя, якоже дары персских царей, злато, и смирну, и ливан, Превечный Боже.

261. Пантелеимону, вмч. и целителю

Тропарь, Глас 3:
Страстотерпче святый и целебниче Пантелеимоне, моли милостиваго Бога, да прегрешений оставление подаст душам нашим.
Кондак, Глас 5:
Подражатель сый Милостиваго, и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоня присно борца соблазны от вопиющих верно: спаси ны, Господи.

262. Параскеве (Пятнице)

Тропарь, Глас 4:
Премудрая и всехвальная Христова мученица Параскева, мужескую крепость приемши, женскую же немощь отвергши, диавола победи и мучителя посрами, вопиющи и глаголющи: приидите, тело мое мечем ссецыте и огнем сожгите, аз бо радующися иду ко Христу, Жениху моему. Тоя молитвами, Христе Боже, спаси души наша.
Кондак, Глас 3:
Всесвятое и непорочное мучение принесши, яко вено пречестное Безсмерному Жениху Христу, ангельское ликостояние возвеселила еси, и победила еси демонския козни: сего ради тя честно верою чтим, мученице Параскево, многострадальная.

263. Петру (Полянскому), сщмч.

Тропарь, Глас 2:
Божиим смотрением к святительскому служению святым Патриархом Тихоном призванный, стаду Христову явился еси страж неусыпный и защитник небоязненный, священномучениче Петре. Жестокая заточения и дальная изгнания, страдания и смерть от богоборцев претерпел еси. Венец мученический прияв, на Небеси ныне радуешися. Моли милостиваго Бога, да сохранит Церковь нашу от нестроений, единомыслие и мир людем Своим дарует и спасет души наша.
Кондак, Глас 4:
Дух мирен и кроток стяжав, твердое упование на милосердие Божие имея, блюститель верный церкве нашея и исповедник Христов явился еси, священномучениче Петре, присный о нас пред Богом предстателю и молитвенниче о душах наших.

264. Савве Стратилату

Тропарь, Глас 5:
Земнаго сана пояс оставив и почести, страдальче, пред мучителем, льстивым царем, Христа Бога суща исповедал еси, и того ради многа страдания подъял еси, славне, тем прекрасным победы венцем увязлся еси от Царя всех царствующаго, с небесными вои светло преукрашен. Предстоя Тому, Савво, моли, да спасет души наша.
Кондак, Глас 4:
Непобедимый явлься, стратилат, варварския козни победил еси, и страдальчествовав славне твердейши, множество врагов невидимых поборил еси: темже венец исплел еси победы, о нас моли Христа, Савво всеблаженне, верою почитающих тя.

265. Севастийским сорока мученикам

Тропарь, Глас 3:
Страстотерпцы Христовы четыредесяте, во граде Севастийстем мужественно пострадавшии, чрез огнь и воду прошедшии, в покой вечный вшедшии, молитеся о нас ко Господу да жизнь мирну сохранит и души наша спасет, яко Человеколюбец.
Ин тропарь, Глас 1:Страстотерпцы всечестнии, воини Христовы четыредесяте, твердии оружницы, сквозе бо огнь и воду проидосте и Ангелом сограждане бысте, с нимиже молитеся Христу о иже верою хвалящих вас. Слава Давшему вам крепость, слава Венчавшему вас, слава Подавающему вами всем исцеления.
Кондак, Глас 6:
Все воинство мира оставльше, на небесех Владыце прилепистеся, страстотерпцы Господни четыредесять, сквозе огнь бо и воду прошедше, блаженнии, достойно восприясте славу с Небес и венцев множество.

266. Серафиму (Чичагову), сщмч.

Тропарь, Глас 5:
Воинство Царя Небеснаго паче земнаго возлюбив, служитель пламенный Святыя Троицы явился еси. Наставления Кронштадскаго пастаря в сердце своем слагая, данная ти от Бога многообразная дарования к пользе народа Божия преумножил еси. Учитель благочестия и поборник единства церковнаго быв, пострадати даже до крове сподобился еси. Священномучениче Серафиме, моли Христа Бога спастися душам нашим.
Кондак, Глас 6:
Саровскому чудотворцу тезоименит быв, теплую любовь к нему имел еси, писаньми своими подвиги и чудеса того миру возвестив, верныя к его прославлению подвигл еси и благодарственнаго посещения самого Преподобнаго сподобился еси. С нимже ныне, священномучениче Серафиме, В Небесных чертозех водворяяся, моли Христа Бога серафимския радости нам причастником быти.

267. Сергию и Вакху, мчч.

Тропарь, Глас 5:
Удобрение Христовых страстотерпец, и очи Христовы Церкве, очи просветите душ наших, Сергие многострадальне и Вакше преславне, молитеся ко Господу, яко да убежим тьмы греховныя, и света явимся общницы невечерняго, молитвами вашими, святии.
Кондак, Глас 2:
Разум на враги мужески вооруживше, всю тех лесть разрушисте, и победу свыше приимше, мученицы всехвальнии, единомысленно вопиюще: добро и красно, еже быти с Богом.

268. Татиане, мц.

Тропарь, Глас 4:
Агну Пречистому и пастырю последуя, агнице словесная Татиано мысленных зверей не убоялася еси, но знамением крестным вооружившися, до конца тех низложила еси, и вошла еси в Небесную ограду, идеже помяни и нас, мученице Христова многомудрая.
Кондак, Глас 4:
Светло во страдании твоем возсияла еси, страстотерпице, от кровей твоих преиспещрена, и, яко красная голубица, к небеси возлетела еси, Татиано: темже моли присно за чтущия тя.

269. Фаддею, архиеп., сщмч.

Тропарь, Глас 1:
Хвала Богу и жертва живая житие твое, священномучениче Фаддее, явися. Постом, бдением и молитвою Небесная дарования приим, многим добрый помощник и утешитель бысть. Пастырскою мудростию и тихостию нрава украшен, лукавства врагов Христовых препобедил еси. Слава Давшему тебе во страданиих крепость, слава, яко мученика, Венчавшему тя, слава Действующему тобою всем исцеления.
Кондак, Глас 4:
Духа небоязни, силы, любве и упования даде Пастыреначальник ти, святителю Фаддее, во страдании бо твоем благодарение Богу воздавал еси и в гонениих страждущия утешал еси, глаголя: Не унывайте, Христос бо с нами есть.

270. Феодору Стратилату, вмч.

Тропарь, Глас 4:
Воинствословием истинным, страстотерпче, Небеснаго Царя воевода предобрый был еси, Феодоре, оружиями бо веры ополчился еси мудренно и победил еси демонов полки, и победоносный явился еси страдалец. Темже тя верою присно ублажаем.
Кондак, Глас 2:
Мужеством души в веру оболкийся, и глагол Божий аки копие в руку взем, врага победил еси, мучеников превелий Феодоре, с ними Христу Богу моляся не престай о всех нас.

271. Феодосии

Тропарь, Глас 4:
Добродетель благоприятно, мученице, постигла еси, Христово приятелище бывши чистое, и Святаго Духа Дом возлюблен, отнюдуже посрамила еси врага борющаго род человеческий, добре страдавшая, и посекла еси Копронима, Феодосие, мечем веры, и к чертогу Небесному преставилася еси радующися. Тебе верою чтущим присно проси велия милости.
Кондак, Глас 2:
Трудами живот нетрудный достигла еси, кровию же Копронима удавила еси, мученице, сквернаго врага Христовы Церкве, всеблаженная Феодосие, и с вышними радуешися воинствы, чтущия память твою покрывающи.

272. Флору и Лавру

Тропарь, Глас 4:
Преудобренную и Богомудрую двоицу пресветлую восхвалим вернии по достоянию, Флора преблаженнаго и Лавра всечестнаго, иже усердно Троицу Несозданную ясно проповедаста всем. Темже пострадавша до крове и венцы пресветлыми увязостеся: молитеся Христу Богу, да спасет души наша.
Кондак, Глас 8:
Яко благочестия мученики, и страдальцы Христовы Богомудренны, вселенная преславно почитает Флора и Лавра днесь: яко да улучим благодать и милость молитвами их, и избавимся бед и напастей гнева же и скорби в день судный.

273. Херсонесским священномученикам Василию, Ефрему, Евгению, Капитону, Евферию.

Тропарь, Глас 4:
Боже отец наших...(см. N274)
Кондак, глас 2:
Светоносный день наста пастырей, епископствовавших светло в Херсоне, ихже воспеваем праздник, пострадавших за Христовы овцы. Священномученицы, молите Пастыреначальника Христа, и нас причести деснаго овец стояния, да вопием вам: радуйтеся, священнии отцы, за Христа кровь свою излиявшии.

Тропари и кондаки преподобным.

274. Преподобным, преподобномученникам общий

Тропарь, Глас 4:
Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.
Кондак, Глас 2:
Волнений множество невлажно проходяще, безплотныя враги струями слез ваших крепко погрузили есте, Богомудрии и преподобнии; и чудес дар приимше, молите непрестанно о всех нас.

275. Преподобному, преподобномученику единому

Тропарь, Глас 8:
В тебе, отче, известно спасеся, еже по образу: приим бо крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со ангелы срадуется, преподобне (имярек), дух твой.
Ин тропарь, Глас 8:
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенной, сияя чудесы, (имярек) отче наш. Моли Христа Бога, спастися душам нашим.
Кондак преподобному единому, Глас 2:
Чистотою душевною божественно вооружився, и непрестанные молитвы яко копие вручив крепко, пробол еси бесовская ополчения. (имярек), отче наш, моли непрестанно о всех нас.
Кондак преподобномученику единому, Глас 2:
Яко постника благочестна и искусна, и страдальца произволением честна, и пустыни жителя сообразна, в песнех достойно восхвалим (имярек), приснохвального: той бо змия попрал есть.

276. Преподобным женам

Тропарь, Глас 2:
Истинному желанию уневестившеся Христославнии, и временнаго обручника отвергшеся совокупления, и добродетельными подвиги возрастше, на высоту востекосте нетления, краснодушнии и многобогатнии, столпи инокующим женам и правило. Темже о нас молите непрестанно, иже любовию вашу память празднующих.
Кондак, Глас 2:
Телеса своя постом изнуривше, и неусыпными молитвами моляще Зиждителя о гресех своих; яко да приимете совершенное прощение, и приясте Божественное оставление, и Царствие Небесное, молите Христа Бога о всех нас.

277. Преподобной жене

Тропарь, Глас 8:
В тебе, мати, известно спасеся еже по образу: приимши бо крест, последовала еси Христу, и деющи учила еси презирати убо плоть, преходит бо, прилежати же о души, вещи безсмертней. Темже и со ангелы срадуется, преподобная (имярек), дух твой.
Кондак, Глас 2:
За любовь Господню преподобная, покоя желание возненавидела еси, пощением дух твой просветивши: крепко бо звери победила еси. Но молитвами твоими пртивных шатание разори.

278. Александру Свирскому чудтв.

Тропарь, Глас 4:
От юности, Богомудре, желанием духовным в пустыню вселився, единаго Христа возжелал еси усердно стопам в след ходити. Темже и ангельстии чини зряще тя удивишася, како с плотию к невидимым кознем подвизався, премудре, победил еси полки страстей воздержанием, и явился еси равноангелен на земли, Александре, преподобне. Моли Христа Бога, да спасет души наша.
Кондак, Глас 8:
Яко многосветлая звезда днесь в странах Российских возсиял еси, отче, вселився в пустыню, Христовым стопам последовати усердно возжелал еси, и того святое иго на рамо твое взем честный крест, умертвил еси, труды подвиг твоих, телесная взыграния. Темже вопием ти: спаси стадо твое, еже собрал еси мудре, да зовем ти: радуйся, преподобне Александре, отче наш.

279. Алексею, человеку Божию

Тропарь, Глас 4:
Возвысився на добродетель и ум очистив, к Желанному и Крайнему достигл еси, безстрастием же украсив житие твое, и пощение изрядное восприим совестию чистою, в молитвах яко безплотен пребывая, возсиял еси яко солнце в мире, преблаженне Алексие.
Кондак, Глас 2:
Дом родителей твоих яко чуждь имев, водворился еси в нем нищеобразно, и по преставлении венец прием славы, дивен на земли явился еси, Алексие, человече Божии, Ангелом и человеком радование.

280. Алипию, иконописцу Печерскому

Тропарь, Глас 8:
Зраки изобразуя святых на дщицах, сих благодеяния спешно яко искусен художник, всехвальне Алипие, написовал еси на скрижалех твоего сердца, и сего ради аки образ Боголепне украшен, свяещенства благодатию аки златом обложился еси от Христа Бога и Спаса душ наших.
Кондак, Глас 2:
От юности Божественное в себе имея начертание, вдан был еси научение иконнаго писания, и внегда небеси подобная Богородицы писашеся церковь, ты таможде пособствовал, и видел еси Духа Святаго осияние, от Негоже приял еси чудес действо, яко иконы твоя чудотворяху, тем тя чтем и ублажаем, чудне Алипие.

281. Амвросию Оптинскому

Тропарь, Глас 5:
Яко к целебному источнику притекаем к тебе, Амвросие, отче наш. Ты бо на путь спасения нас верно наставляеши, молитвами от бед и напастей охраняеши, в телесных и душевных скорбех утешаеши, паче же смирению, терпению и любве научаеши. Моли Человеколюбца Христа и Заступницу усердную спастися душам нашим.
Кондак, Глас 2:
Завет Пастыреначальника исполнив старчества благодать наследовал еси, болезнуя сердцем о всех, с верою притекающих к тебе, темже и мы, чада твоя, с любовию вопием ти: отче святый Амвросие, моли Христа Бога спастися душам нашим.

282. Андрею Критскому, св. прпмч.

Тропарь, Глас 4:
Постнически преподвизався на горе, умная врагов ополчения всеоружием Креста погубил еси, всеблаженне, паки же ко страдальчеству мужески облеклся еси, убив Копронима мечем веры, и обоих ради венчался еси от Бога, преподобнемучениче Андрее приснопамятне.
Кондак, Глас 3:
Празднует днесь царствующий град праздник пресветлый светоносныя твоея памяти, всякий призывая град и страну, радуется бо, яко имея сокровище велие, многострадальное твое тело, Андрее мучениче, Православия светильниче.
Ин кондак, Глас 8:
Мужества тезоименитому благодарение, яко благочестия тайноглагольнику, похвальная воззовем от любве тебе, Богоблаженне. Но яко имея дерзновение ко Господу, от всяких лютых ны спаси, да поем: радуйся, отче приснопамятне.

283. Андрею Рублеву

Тропарь, Глас 3:
Божественнаго света лучами облистаемый, преподобне Андрее, Христа познал еси Божию премудрость и силу, и иконою святыя Троицы всему миру проповедал еси единство во Святей Троице. Мы же со удивлением и радостию вопием ти: имеяй дерзновение ко Пресвятей Троице моли просветити души наша.
Кондак, Глас 8:
От юности к Божественней красоте устремляяся, чудный иконописец в земли Российстей был еси, и, богоносным твоим учителем поревновав, сиянием добродетелей украсился еси, преподобне Андрее, темже и явися Церкве нашея похвала и радование.

284. Антонию Великому

Тропарь, Глас 4:
Ревнителя Илию нравы подражая, Крестителю правыми стезями последуя, отче Антоние, пустыни был еси житель, и вселенную утвердил еси молитвами твоими. Темже моли Христа Бога, спастися душам нашим. Кондак, Глас 2: Житейския молвы отринув, безмолвно житие скончал еси, Крестителя подражаяй всяким образом преподобнейший, с ним убо тя почитаем, отцев начальниче Антоние.

285. Антонию, игумену Киево-Печерскому

Тропарь, Глас 4:
От мирскаго мятежа исшед, отвержением же мира евангельски Христу последовал еси и равноангельное житие пожив, в тихое пристанище Святыя Горы Афона достигл еси. Отонудуже благословением отцев в гору Киева пришед, и тамо трудолюбно жизнь совершив, отечество твое просветил еси, и множеству монашествующих стезю ведущую к Небесному Царствию показав, Христу сия привел еси: Егоже моли, Антоние преподобне, да спасет души наша.
Кондак, Глас 8:
Возложив себе Богу, паче всех возлюбленному от юности, преподобне, Тому от всея души любовию последовал еси; мира же тленная нивочтоже вменив, в земли пещеру соделал еси, в ней добре противу невидимаго врага козней подвизався, яко светозарное солнце во вся концы земли возсиял еси, отонудуже веселяся прешел еси к Небесным Чертогом. И ныне со Ангелы Владычню Престолу предстоя, поминай нас, чтущих память твою, да зовем ти: радуйся, Антоние, отче наш.

286. Антонию Римлянину, Новгородскому чудотворцу

Тропарь, Глас 4:
Ветхий Рим отечество твое оставив, на камень, яко на легкий корабль возшел еси, и на нем паче естества аки бесплотен по водам шествовал еси, промышлением Божественнаго разума направляем, Великаго Новаграда достигл еси, и обитель в нем сотворив тело твое в ней предложил еси, яко дар освящен. Тем молим тя, отче Антоние, моли Христа Бога, да спасет души наша.
Кондак, Глас 8:
Римское воспитание, великому же Новуграду благодатное процветение, многими бо труды и подвиги в нем Богу угодил еси: сего ради чудес дарований от Него сподобился еси, и тело твое многими леты соблюде нетленно. Мы же сие лобызающе, радостно от души вопием ти: радуйся, отче Антоние.

287. Антонию и Феодосию, игуменам Киево-Печерским

Тропарь, Глас 3:
Двоицу начальных Российских светил почитаем: Антония, Богом посланнаго, и Феодосия, Богом дарованнаго. Тии бо первии, равноангельным в России житием просиявше от гор Киевских, осветиша отечествия нашего вся концы, и путь к небеси правый многим показаша, и первоотцы иноком бывше, лики спасаемых Богови приведоша, и ныне, предстояще в Вышних немерцаемому Божества Свету молятся о душах наших.
Кондак, Глас 8:
Двоицу великих отец и правило иноков светлое, умныя зари онебесившии Российскую Церковь кто по достоянию хвалами воспоет, тии бо Престолу Божию предстоят: но яко имущии дерзновение к Святей Троице, Антоние преблаженне и Феодосие приснопамятне, молитеся о молебная к вам приносящих, и любовию песньми вас ублажающих.
Ин кондак, Глас 2:
Твердыя столпы благочестия, недвижимая иноческих законоположений основания, и необоримыя стены Российския восхвалим: Антония, возлюбльшаго Бога, и Феодосиа, возлюбленнаго Богом: труды бо онех и постническия подвиги прият паче всякаго всеплодия, Един во святых прославляемый.

288. Антонию Сийскому чдтв.

Тропарь, Глас 1:
Желанием духовным распалився и мятежи мирския отринув, ко единому же Богу любовию прилепился еси, и Того вседушне взыскуя, во внутреннюю пустыню отшел еси, при водах вселився, идеже во слезах и трудех пребывая многолетное время, в терпении мнозем житие ангельское проходил еси, в наставлении Божественнаго Разума: и множество монахов собрал еси, мудре, ихже посещая не остави, Антоние преподобне отче наш, Пресвятей Троице моляся от зол всяческих избавити и спасти души наша.
Кондак, Глас 8:
От юности, преподобне, плоть твою в постех и молитвах истончил еси и крест твой взем, Христу последовал еси, темже и к вышним течение радостно совершил еси, идеже со всеми святыми Святей Троице предстоиши. И ныне стадо твое посещая, поминай чтущих пресвятую память твою, да вси благодарне вопием ти: радуйся, Богомудре Антоние, наставниче пустынный.

289. Арсению Великому

Тропарь общий, Глас 8:
Слез твоих┘ (см. ╧ 275)
Кондак, Глас 3:
От Рима возсиял еси якоже солнце великое и к царскому граду достигл еси, преблаженне, словесы твоими просвещая сего и делы, всяку неразумия мглу отгоня, сего ради тя почитаем, отцев славо, Арсение преподобне.

290. Афанасию Афонскому

Тропарь, Глас 3:
Еже во плоти житию твоему удивишася ангельстии чини, како с телом к невидимым сплетением изшел еси, приснославне, и уязвил еси демонския полки. Отонудуже, Афанасие, Христос тебе воздаде богатыми дарованьми: сего ради, отче, моли спастися душам нашим.
Кондак, Глас 8:
Яко невещественных существ зрителя изрядна, и деятельна сказателя всеистинна, взывает тя стадо твое, Богоглагольниче: не оскудей моля о рабех твоих, избавитися напастей и обхождений, вопиющим ти: радуйся, отче Афанасие.

291. Варлааму Хутынскому, Новгородскому чудотворцу

Тропарь, Глас 3:
Иже на земли леганием, пощением же и бдением тело твое изнуряя, преподобне, вся плотская мудрования умертвил еси, и исцелений струя независтная явился еси, верою притекающим к тебе, Варлааме, отче наш, моли Христа Бога, спастися душам нашим.
Кондак, Глас 8:
Якоже другий Илия отче, дождь с небесе свел еси: он убо огнь сведе, и царя удиви, ты же люди твоя возвеселил еси, и торжествовати устроил еси. Великий бо Новград вельми тобою хвалится, имея мощи твоя в себе, Егоже сохраняй от враг непоколебима, да зовем ти: радуйся, преподобне Варлааме, отче наш.

292. Варлааму и Иоасафу, царевичу

Тропарь, Глас 4:
От духовнаго наставника научився, Иоасафе, Бога познати, крещением же просветився, люди к вере обратил еси, и отцу твоему от купели приемник быв, царство оставив, пустыню достигл еси, и в ней трудолюбне подвизался еси: моли Христа Бога со учителем твоим Варлаамом, спастися душам нашим.
Кондак, Глас 8:
Ведый твое из младенства благое изволение, Иоасафе, един Сердцеведец Бог, и от царствия земнаго в монашеское пребывание приведый тя, великому Варлааму последовати сподоби, с нимже и ныне горний Иерусалим всесветлый Отечество имея, желаемыя доброты красно наслаждаешися Святыя Троицы. Молим тя, царская красото, поминай нас, верою чтущих тя.

293. Герману Аляскинскому

Тропарь, Глас 7:
Звездо пресветлая Церкве Христовы, на севере просиявшая, вся к Царствию Небесному путеводящая, учителю и апостоле истинныя веры, предстателю и заступниче гонимых, украшение изящное Святыя Церкве во Америце, преподобне отче Германе Аляскинский, молися ко Господу Спасу нашему, спастися душам нашим.
Кондак, Глас 3:
Свет вечный Христа Спаса нашего тя на путь евангельский во Америку настави, возвестити весть о мире евангельскую. Днесь Престолу Славы предстоя, молися о стране твоей и людех ея, о мире всего мира и спасении душ наших.

294. Герману Соловецкому

Тропарь, Глас 8:
Желанием духовным от юности распаляемъ, преподобне Германе, Христу тесным жития путем последовал еси, и в морский пустынный остров аки в тихое пристанище вселився, в нем многа лета постнически пожил еси, идеже Божественным отцем Зосиме и Савватию сожитель был еси. С нимиже моли Христа Бога о нас, любовию чтущих светлую память твою.
Кондак, Глас 4:
Вышних желая, вся долу влекущая возненавидел еси и, отечество свое оставль, в поморие пустынное отшел еси, таже в морский остров удалився, в нем многа лета Господеви поработал еси. Темже, память твою ныне празднующе, любовию вопием ти: радуйся, Германе Богомудре, отче наш.

295. Григорию Декаполиту

Тропарь, Глас 3:
Образ был еси воздержания, Божественным Духом вся просветив, правоверия течение совершил еси, учением мир просветил еси, и зловерных обличил еси смыслы, отче преподобне Григорие, Христа Бога моли даровати нам велию милость.
Кондак, Глас 3:
Светлое тя солнце Церковь познавает, добродетелей красотами и исцелений лучами всех просвещая, Христов угодниче. Темже празднуем честную память твою, и почитаем подвиги твоя, всеблаженне отче, премудре Григорие.

296. Даниилу Столпнику

Тропарь, Глас 1:
Терпения столп был еси, ревновавый праотцем, преподобне: Иову в страстех, Иосифу во искушениих, и безплотных жительству, сый в телеси, Данииле, отче наш, моли Христа Бога спастися душам нашим.
Кондак, Глас 8:
Якоже звезда многосветлая ты возшед, блаженне, на столп, мир просветил еси преподобными делы твоими, и тьму прелести отгнал еси, отче. Темже молим тя: и ныне облистай в сердцах раб твоих незаходящий свет разума.

297. Димитрию Прилуцкому

Тропарь, Глас 1:
Свыше от Бога, преподобне, благодать приял еси духовную, и от Него убо познался еси, блаженне, Того ради и ты духом познал еси лучшая Его, будущаго века пребывание, и постнически испытався во своих обителех. И ныне со ангели ликовствуя, Спасу всех за ны молися, святе Димитрие, да вси вопием: Слава Давшему ти крепость, слава Венчавшему тя, слава Действующему тобою всем исцеления.
Кондак, Глас 8:
От юности, преподобне, крест твой взем, Христу последовал еси, в молитвах и пощениях, во бдениих же и злостраданиих плоть твою изнуряя. Темже и Всевидящее Око твоя труды видев, чудесы тя прославляет, и всех звати тебе научает: радуйся, преподобне отче Димитрие, постников удобрение.

298. Дионисию, Глушицкому чдтв.

Тропарь, Глас 1:
Божественною любовию от юности распаляемъ, Дионисие преподобне, вся яже в мире красная возненавидев, Христа единаго возлюбил еси, и сего ради во внутреннюю пустыню вселился еси, со зверьми живый, весь Христови. Отонудуже и Всевидящее Око твоя труды видев, даром чудес и по преставлении обогатил тя есть. Темже вопием ти: моли непрестанно о всех нас, честную память твою присно в песнех почитающих.
Кондак, Глас 8:
Все твое умное желание к Богу вперив, Тому невозвратно от души последовал еси, в пустыню вселився, и тамо ангельски пожив, многим путь был еси ко спасению, сего ради и Христос тебе прослави и даром чудес обогати. Темже вси вопием ти: радуйся, Дионисие преподобне, пустынный жителю.

299. Евфимию Великому

Тропарь, Глас 4:
Веселися пустыня нераждающая, благодушствуй неболящая, яко умножи тебе чада муж желаний духовных, благочестием насадив, воздержанием воспитав в добродетелей совершенство. Того молитвами Христе Боже, умири живот наш.
Кондак, Глас 8:
В честнем рождестве твоем радость тварь обрете, и в Божественней памяти твоей, преподобне, благодушие прият многих твоих чудес, от нихже подаждь богатно в души наша, и очисти грехов скверны, яко да поем: аллилуия.

300. Евфимию Суздальскому

Тропарь, Глас 3:
Яко светозарная звезда пришел еси от востока на запад, оставив Отечество твое Нижний Новград, и дошед богоспасаемаго града Суждаля, в нем обитель сотворил еси, и собрал еси монахов множества, и прием дар чудес от Бога, отче Евфимие, был еси о Христе собеседник и спостник преподобному Сергию. С нимже у Христа Бога испроси душам нашим велию милость.
Кондак, Глас 2:
Волнений множества невлажно преходя, безплотныя враги струями слез твоих погрузил еси, Богомудре Евфимие, преподобне. Тем и чудес дар приял еси, моли непрестанно о всех нас.

301. Евфросинии, игумени Полоцкой

Тропарь, Глас 4:
Подражающи дванадесятолетна дванадесятолетну Христу, учившему во святилищи, Божию слову последовала еси, Евфросиние, славу временную и земнаго обручника оставльши и вся мирская презревши краснейшему паче всех Христу себе уневестила еси, крест вземши, путем ангельскаго жития шествующи и многия к нему наставляющи, во благоухании мира, в Небесный Чертог востекла еси, идеже моли, Егоже возлюбила еси, о чтущих благочестно память твою.
Кондак, Глас 4:
Избранней Богом от самаго рождения, и призванней на служение Ему, в чине ангельстем Господеви послужившей свято, и преподобно пожившей, и ныне с небесными силами Господа восхваляющей, о нас же грешных пред Господом ходатайствующей, с радостию и любовию воззовем: радуйся, Евфросиние, невесто Христова всечестная.

302. Ефрему Новоторжскому

Тропарь, Глас 1:
Божественною свыше просветився благодатию, преподобне, многим терпением во временной жизни подвиг совершил еси. Темже источаеши чудес благодать всем с верою приходящим к раце мощей твоих, Ефреме преблаженне. Сего ради зовем: слава Давшему ти крепость, слава Венчавшему тя, слава Действующему тобою всем исцеления.
Кондак, Глас 8:
Яко Богоявленная Российская звезда, днесь сияя чудесы, явился еси, преподобне отче Ефреме. Тем не престай молися о стаде своем, сохраняяй отечество твое, град же и люди, иже тебе верою почитающих и к честным мощем твоим усердно притекающих, да велегласно тебе вопием: радуйся, Богомудре Ефреме, отче наш.

303. Ефрему Сирину

Тропарь общий, Глас 8:
Слез твоих...(см. N275)
Кондак, Глас 2:
Час присно провидя суда, рыдал еси горько, Ефреме, яко любобезмолвный, делателей же был еси в делех учитель, преподобне. Темже, отче всемирный, ленивыя воздвизаеши к покаянию.

304. Зосиме, игумену Соловецкому

Тропарь, Глас 4:
Изволением Божественнаго разума вселился еси в пустыню, и тамо вперив ум твой в небесныя обители, равно Ангелом житие на земли пожив, в молитвах и трудех и пощениих образ твой был еси твоим учеником. Отонудуже Бог, видя твое благое изволение, умножи тебе чада в пустыни, слез твоих теченьми напаяемей, но яко имеяй дерзновение к Богу, поминай стадо, еже собрал еси, мудре, и не забуди якоже обещался еси, посещая чад твоих, Зосимо, преподобне отче наш.
Кондак, Глас 8:
Христовою любовию уязвився, преподобне, и того крест славный на рамо взем понесл еси, божественне вооружився, и непрестанныя молитвы яко копие в руце имый, крепко ссекл еси бесовская ополчения. Тем зовем ти: радуйся, преподобне отче Зосимо, монахов удобрение.

305. Зосиме и Савватию Соловецким

Тропарь, Глас 4:
Постническое и равноангельское житие ваше, преподобнии отцы Зосимо и Савватие, вселенней познаны сотвори вас: чудодеянии различными богоноснии, просвещайте верою призывающия вы и чтущия честную память вашу.

306. Зосиме, Савватию и Герману Соловецким

Тропарь, Глас 8:
Яко светильницы явистеся всесветлии во отоце окияна моря, преподобнии отцы наши Зосимо, Савватие и Германе, вы бо крест Христов на рамо вземше, усердно Тому последовасте и, чистотою Богови приближившеся, отонудуже силами чудес обогатистеся. Темже и мы любезно притекаем в ракам честных мощей ваших и умильно глаголем: о, преподобнии, молите Христа Бога спастися душам нашим.
Кондак, Глас 2:
Христовою любовию;уязвившеся, преподобнии, и Того крест, на рамо вземше, понесли есте, божественне вооружившеся на невидимыя враги и непрестанныя молитвы, яко копие в руках, имуще, крепко победили есте бесовская ополчения; благодать Господню приемше целити недуги душ и телес притекающих к ракам честных мощей ваших, чудес лучи испущаете всюду. Тем зовем вам: радуйтеся, преподобнии отцы Зосимо, Савватие и Германе, монахов удобрение.

307. Иакову Боровичскому, чдтв.

Тропарь, Глас 1:
Божественною благодатию просветився, и по смерти даруеши исцеление притекающим к раце мощей твоих, премудре Иакове: темже и мы ныне чтим честных мощей твоих пренесение, веселяще вкупе души и телеса. Тем вси вопием: слава Давшему ти крепость, слава Венчавшему тя, слава Действующему тобою всем исцеления.
Кондак, Глас 8:
Верою и любовию твое честное пренесение празднующих, блаженне, сохрани и соблюди от всякия злобы и соблазна змиина: имаши бо дерзновение ко Владыце всех Христу Богу, Егоже моли спасти люди молящия тя, да вси вопием ти: радуйся, отче Иакове, всея Российския земли удобрение.

308. Илариону Великому

Тропарь общий, Глас 8:
Слез твоих...(см. N275)
Кондак, Глас 3:
Яко светильника незаходимаго, умнаго тя солнца, сошедшеся днесь восхваляем в песнех: возсиял бо еси сущим во тьме неведения, вся возводя к Божественней высоте, Иларионе, темже вопием: радуйся, отче, всех постников основание.

309. Иоанникию Великому

Тропарь общий, глас 8:
Слез твоих...(см. N275)
Кондак, Глас 8:
Звезда явился еси всесветлая, в мире просвещаяй, и сущия во мраце страстей облиставаяй: врач же крепчайший явился еси, но яко приял еси благодать исцелений, просящим тя подаждь исцеление, да зовем: радуйся, отче Иоанникие.

310. Иоанну, списателю Лествицы

Тропарь общий, Глас 8:
Слез твоих...(см. N275)
Кондак, Глас 1:
Плоды присноцветущия от твоея книги принося учения, премудре, услаждаеши сердца, сим с трезвением внемлющих, блаженне: лествица бо есть, души возводящая от земли к небесней и пребывающей славе, верою чтущих тя.
Ин кондак, Глас 4:
На высоте Господь воздержания истинна тя положи, якоже звезду нелестную, святоводящую концы, наставниче Иоанне, отче наш.

311. Иоанну Многострадльному, затворнику Печерскому

Тропарь, Глас 1:
Терпения столп воистинну непоколебимый, и забрало от вражиих стреляний необоримо, равноангельне и многострадальне отче наш Иоанне, имуще тя, мы недостойнии, молимся припадающе к честным твоим мощем тепле, избави нас душетленных страстей плотских и спаси твоими молитвами.
Кондак, Глас 2:
Столп целомудрия, вражиими бореньми непобедимъ сый, аки столп, многострадальное водруженно оставил еси нам тело твое, всечестне Иоанне, емуже в немощех душевных и телесных покланяющеся, молим тя, преподобне: моли Христа Бога непрестанно о всех нас.

312. Иоанну Рыльскому

Тропарь, Глас 1:
Покаяния основание, прописание умиления, образ утешения, духовнаго совершения, равно Ангелом житие твое бысть, преподобне: в молитвах убо и пощениих, и в слезах пребывая, отче Иоанне, моли Христа Бога о душах наших.
Кондак, Глас 8:
Ангельскому житию поревновав, преподобне, вся земная оставив, ко Христу притекл еси, и того заповедьми ограждаяся, явился еси столп непоколебимъ от вражиих нападений. Тем зовем ти: радуйся, отче Иоанне, светило пресветлое.

313. Иову, игумену Почаевскому, чдтв.

Тропарь, Глас 4:
Мнострадальнаго праотца долготерпение стяжав, Крестителеву воздержанию уподобляяся, Божественныя же ревности обою приобщаяся, тех имена достойно прияти сподобился еси и истинныя веры был еси проповедник безбоязнен: темже монахов множества ко Христу привел еси и вся люди в Православии утвердил еси, Иове преподобне отче наш, моли спастися душам нашим.
Ин тропарь, Глас 4:
Возложь на ся иго Христово от юности, преподобне отче Иове, многолетне свято подвизался еси на поприще благочестия во обители Угорницкой и на острове Дубенстем: и пришед к горе Почаевской, знаменанной цельбоносною стопою Пресвятыя Богородицы, в тесной пещере каменней богомыслия ради и молитвы многократно заключался еси, и благодатию Божиею укрепляяся, мужественно потрудился еси на пользу обители твоея, купно же и противу врагов Православия и благочестия христианскаго, и наставив сицевому ополчению иночествующих, победители тех представил еси Владыце своему и Богу: того моли спастися душам нашим.
Кондак, Глас тойже:
Явился еси истинныя веры столп, евангельских же заповедей ревнитель, гордыни обличение, смиренным же предстатель и научение: темже и ублажающим тя грехов отпущение испроси, и обитель твою невредиму сохрани, Иове отче наш, многострадальному подобный.

314. Иосифу, игумену Волоцкому, чдтв.

Тропарь, Глас 5:
Яко постников удобрение и отцев красоту, милости подателя, разсуждения светильника, вси вернии сошедшеся восхвалим, кротости учителя, и ересей посрамителя, премудраго Иосифа, Российскую звезду, молящася Господу, помиловатися душам нашим.
Кондак, Глас 8:
Жития треволнения и мятеж мирский, и страстная взыграния в ничтоже вменив, пустынный гражданин показался еси, многих быв наставник, Иосифе преподобне, монахов собратель, и молебник верен, чистоты рачитель. Моли Христа Бога, спастися душам нашим.

315. Кириллу, игумену Белозерскому, чдтв.

Тропарь, Глас 1:
Яко крин в пустыни Давидски процвел еси, отче Кирилле, злострастия терние искореняя, и собрал еси в ней ученик множество, страхом Божиим и учением твоим наставляемых, ихже и до конца яко чадолюбивый отец не оставил еси посещая, да вси вопием: слава Давшему ти крепость, слава Венчавшему тя, слава Действующему тобою всем исцеления.
Кондак, Глас 8:
Яко преобидев тленная и долу влекущая мудрования, отче, к вышнему течению радостно устремился еси, и тамо со святыми Пресвятей Троице предстоя, моли от враг сохранитеся стаду твоему, яко да святое Твое успение празднующе, вопием: радуйся, преблаженне Кирилле, отче наш.

316. Кириллу и Марии, родителям прп. Сергия Радонежского.

Тропарь, Глас 3:
Блаженств Христовых Причастницы, честнаго супружества и попечения о чадех добрый образе, праведнии Кирилле и Марие, плод благочестия, Сергия преподобнаго, нам явивший, с ним же усердно молите Господа низпослати нам дух любве и смиренномудрия, да в мире и единомыслии прославим Троицу Единосущную.
Кондак, Глас 4:
Днесь, вернии, сошедшеся, восхвалим двоицу блаженную, благовернаго Кирилла и Марию добронравную, тии бо молятся вкупе со возлюбленным сыном своим преподобным Сергием ко Единому во Святей Троице Богу Отечество наше в правоверии утвердити, домы миром оградити, юныя от напастей и соблазнов избавити, старость укрепити и спасти души наша.

317. Корнилию Комельскому, чдтв.

Тропарь, глас 4:
От юности горящим желанием Божественныя любве разжигаемъ, житейския молвы оставил еси, преподобне, ревнитель Антонию Великому бысть, безмолвием и жестоким пребыванием последуя Христу, бдением и молитвами и постом образ быв своим учеником. Темже молися Господеви, Корнилие блаженне, спастися душам нашим.
Кондак, Глас 8:
Господеви, от Святыя Девы возсиявшу мирови, и Тому из млада яко ангел послужил еси, блаженне, и силою Его пустыню яко град сотворил еси, множество же ученик в ней собрал еси, ихже богодухновенными ученьми просветил еси. Тем вопием ти: радуйся, отче наш Корнилие, иноком божественное удобрение.

318. Макарию Великому, Египетскому

Тропарь, Глас 1:
Пустынный житель и во плоти Ангел, и чудотворец явился еси, Богоносе отче наш Макарие: постом, бдением, молитвою, небесныя дарования приим, исцеляеши недужныя и души верою приходящих ти. Слава Давшему тебе крепость, слава Венчавшему тя, слава Действующему тобою всем исцеления.
Кондак, Глас 4:
В дому Господь воздержания воистинну тя положи, якоже звезду непрелестную, световодящу концы, отче отцев, Макарие преподобне.
Ин кондак, Глас 1:
Блаженную жизнь скончав в житии с мученическими лики, в земли кротких достойно водворяешися, Богоносне Макарие, и пустыню, якоже град населив, благодать приял еси от Бога чудес, темже тя почитаем.

319. Макарию, игумену Калязинскому, чдтв.

Тропарь, Глас 8:
Плотская мудрования, отче Макарие, воздержанием и бдением умертвил еси, место бо, на немже поты твоя излиял еси, яко труба вопиет к Богу, поведающи твоя исправления, и по смерти честныя твоя мощи источают исцеления. Темже вопием ти: моли Христа Бога, да спасет души наша.
Кондак, Глас 2:
Вышних желая, воздержанием и труды, и поты насладився, желание плоти твоея обуздав, чудес дар прием от Христа Бога, светильник явился еси пресветлый. Темже Христова Церковь песньми славит тя, преподобне Макарие, отче наш.

320. Макарию Римлянину, Новгородскому чдтв.

Тропарь, Глас 4:
Рим отечество твое оставив, в пустыню вселился еси, и тамо в пусте месте обрет жилище себе, отбегл еси суеты мира сего, и в безмолвнем пристанищи добре направлял еси себе ко Господу. Сего ради и мы чтущии тя, притекающе к раце мощей твоих и любезно тую облобызающе, молим тя, отче Макарие: моли о нас Господа, да помилует нас в день судный.
Кондак, Глас 7:
От Рима возсиял еси, якоже звезда пресветлая, преподобне отче наш Макарие, и, в пустыни вселився, просветил еси чистым житием твоим верно притекающия к тебе. Темже и мы, прославляюще светлую память твою, вопием ти: радуйся, преподобне отче Макарие.
Ин кондак, Глас 8:
Якоже пресветлая звезда, от Рима возсиял еси, преподобне, и, Богом наставляемъ, Российскую страну светом чудес твоих озарил еси духовно, созывая верныя к мощем твоим, от нихже исцеления недужным подаеши. Темже молимся тебе: научи нас, отче, твоему Богоразумию и уврачуй недуги наша душевныя и телесныя, да зовем ти: радуйся, преподобне отче Макарие.

321. Максиму Греку

Тропарь, Глас 8:
Зарею Духа облистаемъ, витийствующих богомудренно сподобился еси разумения, неведением омраченная сердца человеков светом благочестия просвещая, пресветел явился еси православия светильник, Максиме преподобне, отонудуже ревности ради Всевидящаго, отечества чужд и странен, Российския страны был еси пресельник, страдания темниц и заточения от самодержавнаго претерпев, десницею Вышняго венчаешися и чудодействуеши преславная. И о нас ходатай буди непреложен, чтущих любовию святую память твою.
Кондак, Глас 8:
Богодухновенным Писанием и богословия проповеданием неверствующих суемудрие обличил еси, всебогате, паче же в Православии исправляя, на стезю истиннаго познания наставил еси, якоже свирель богогласная, услаждая слышащих разумы, непрестанно веселиши, Максиме досточудне. Сего ради молим тя: моли Христа Бога грехов оставление низпослати верою поющим всесвятое твое успение, Максиме, отче наш.

322. Марии Египетской

Тропарь общий преподобной жене, Глас 8:
В тебе, мати...(см. N277)
Кондак, Глас 4:
Греха мглы избежавши, покаяния светом озаривши твое сердце, славная, пришла еси ко Христу, сего всенепорочную и святую Матерь, молитвенницу милостивную принесла еси. Отонудуже и прегрешений обрела еси оставление, и со Ангелы присно срадуешися.

323. Мартину, затворнику Туровскому

Тропарь, Глас 6:
Тяжким недугом страждущий и людьми забытый, молил еси жажду утолити, преподобне Мартине, темже Христос посла с Небесе благоверных Бориса и Глеба тебе послужити и недуг исцелити, молися ныне ко Господу спастися душам нашим.
Кондак общий, Глас 8:
Чистотою душевною...(см. N275)

324. Михаилу Клопскому

Тропарь, Глас 8:
Иже на земли Христа ради, волею в буйство преложився, мира сего красоты отнюд возненавидел еси, и плотская играния увядив постом и жаждею, и на земли леганием, от зноя же и студени, от дождя и снега, и от прочия воздушныя тягости никогдаже уклонился еси, душу же очистил еси добродетельми, яко злато в горниле, отче преподобне Богоносне Михаиле, и ныне на небесех предстоиши Престолу Пресвятыя Троицы, но яко имея дерзновение многое, моли Христа Бога, спастися душам нашим.
Кондак, Глас 8:
Духа Святаго силою уподобился еси богоглаголивым древним пророком, сказав безвестная и тайная, и еже годе судьбам Божиим в сбытие, и ина многа чудеса о Христе сотворив, и люди удивив, торжествовати устроил еси, вопиющия: слава Богу, прославляющему святыя Своя.

325. Моисею Мурину

Тропарь, Глас 1:
Пустынный житель, и в телеси Ангел, и чудотворец явился еси, Богоносе отче наш Моисее: постом, бдением, молитвою, Небесная дарования приим, исцеляеши недужныя, и души верою притекающих ти. Слава Давшему тебе крепость, слава Венчавшему тя, слава Действующему тобою всем исцеления.
Кондак, глас 4:
Мурины заушив, и лица демонов поплевав, мысленно просиял еси якоже солнце светло, светом жития твоего и учением наставляя души наша.

326. Моисею Угрину

Тропарь, Глас 3:
Другаго тя Иосифа, великий чистоты и целомудрия рачителю, всечестне и равноангельне Моисее, священными песньми восхваляюще, грешнии, молимтися прилежно: моли Христа Бога, яко да исцелит вся наша страсти и подаст велию милость.
Ин тропарь, Глас тойже:
Труды и подвиги со страстьми по чистоте твоей видя, святе, кто не удивится? Глад бо, темницу и раны приемля, не поработился еси сластем ляховицы, но, яко царь, страстьми обладаяй, ныне и тогда возпрославился еси от Всевидящаго человеческая сердца, от Негоже во искушениих всем способствовати благодать прием, пособствуй и нам, твою память чтущим, Моисее преподобне.
Кондак, Глас 3:
В Вышних единаго Бога ища земная вся презрел еси, о телеси своем нерадив, на муки мужески себе вдал еси, глад, жажду, узы, в темнице затворяемъ, доблественно претерпел еси, биения, крове излияние и удов отрезание, чистаго ради девства твоего мужески понесл еси. И ныне с девственными лики предстоя Пресвятей Троице, от всех искушений моли избавитися вопиющим ти: радуйся, Моисее, отче блаженнейший.

327. Никону, чдтв., ученику Сергия Радонежского

Тропарь, глас 1:
Послушания добрый рачитель быв, преподобне Никоне приснопамятне: церковь бо прекрасну Святыя Троицы в похвалу отцу твоему воздвигл еси, и заточения от самодержавнаго претерпев, десницею Вышняго венчаешися и чудодействуеши преславная. И о нас ходатай буди непреложен, чтущих любовию святую память твою.
Кондак, Глас 8:
Богодухновенным Писанием и богословия проповеданием неверствующих суемудрие обличил еси, всебогате, паче же в Православии исправляя, на стезю истиннаго познания наставил еси, якоже свирель богогласная, услаждая слышащих разумы, непрестанно веселиши, Максиме досточудне. Сего ради молим тя: моли Христа Бога грехов оставление низпослати верою поющим всесвятое твое успение, Максиме, отче наш.

328. Нилу Сорскому

Тропарь, Глас 4:
Удалився бегая Давидски мира, и вся яже в нем яко уметы вменив, и в месте безмолвне вселився, духовныя радости исполнился еси, отче наш Ниле: и Единому Богу изволив служити, процвел еси яко финикс, и яко лоза благоплодна умножил еси чада пустыни. темже благодарственно вопием: слава Укрепившему тя в подвизе пустынножительства, слава Избравшему тя в России отшельником уставоположника изрядна, слава молитвами твоими и нас Спасающему.
Кондак, глас 8:
Любве ради Христовы удалився мирских смущений, радостною душею вселился еси в пустыни, в нейже подвизався добре, яко Ангел на земли, отче Ниле, положил еси: бдением бо и постом тело свое изнурил еси вечныя ради жизни. Еяже ныне сподобився, во свете неизреченныя радости Пресвятей Троице со святыми предстоя моли, молимтися, припадающе, чада твоя, сохранитися нам от всякаго навета и злых обстояний видимых и невидимых враг и спастися душам нашим.

329. Нилу Столбенскому

Тропарь, Глас 4:
Яко светильник всесветел, явился еси во острове Селигера езера, преподобне отче Ниле, ты бо крест Христов от юности своея на рамо взем, усердно Тому последовал еси, чистотою Богови приближився, отонудуже и чудес дарованием обогатился еси. Тем и мы, притекающе к раце мощей твоих, умильно глаголем: отче преподобне, моли Христа Бога спастися душам нашим.
Кондак, Глас 8:
Отечества, преподобне, удалився, в пустыню вселился еси, и на остров Селигера езера возшед, жестоко житие показал еси, и многих добродетельми удивив, дарования чудес от Христа приял еси. Поминай нас, чтуших память твою, да зовем ти: радуйся, Ниле, отче наш.

330. Паисию Величковскому

Тропарь, Глас 2:
Странен быв на земли, Небеснаго Отечества достигл еси преподобне отче Паисие, добротолюбия подвижниче, верных научил еси ум к Богу возводити и сердцем к Нему взывати: Господи Иисусе Христе, Сыне Божий, помилуй мя, грешнаго.
Кондак, Глас 8:
Избранный иноческаго жития ревнителю, яко пчела многотрудная, писаньми отеческими души наша снабдил еси, коегождо наставляя на путь спасения, сего ради зовем ти: радуйся, Паисие премудре, старчества духовнаго в стране нашей возродителю.

331. Пахомию Великому

Тропарь общий, Глас 8:
Слез твоих┘ (см. ╧ 275)
Кондак, Глас 2:
Светильник светел показался еси в концех, пустыню же грады сотворил еси множествы монашескими, сам себе распен, крест твой на рамо взем и воздержанием тело изнурил еси, моля непрестанно о всех нас.

332. Пафнутию, Боровскому чдтв.

Тропарь, Глас 4:
Жития светлостию просветив твое отечество, в молитвах и постех дарований Божественнаго Духа исполнился еси, и во временней сей жизни добре подвизався, милости благоутробия всем скорбящим отверзл еси и нищим был еси заступник. Тем молим тя, отче Пафнутие, моли Христа Бога, да спасет души наша.
Кондак, Глас 8:
Божиим светолитием просвещен, отче, постническое стяжал еси жительство, преподобне, иноком предобрый наставниче и постником благое украшение. Сего ради Господь труды твоя видев, чудес даром обогати тя, источаеши бо исцеления. Мы же радующеся вопием ти: радуйся, отче Пафнутие.

333. Петру, царевичу Ордынскому, Ростовскому

Тропарь, Глас 8:
Отечества своего, блаженне Петре, удалився, и богомерзкую веру отнюд возненавидев, и от мглы греховныя изшед, и от тьмы во свет прииде, и вселися во славный и многонародный град Ростов, в немже житие честно пожив, и Христову церковь во имя святых Апостол Петра и Павла воздвиг Христовою благодатию, и сию чудными иконами, яко невесту украсив, святителя же и князя и вся люди житием своим удивив. Темже и по смерти твоей даром чудес обогати тя: поминай нас чтущих пресветлую память твою, преподобне отче Петре, моли Христа Бога, спастися душам нашим.
Кондак, Глас 4:
Явися велие солнце Христовой Церкви, просвещая учения светлостьми, всечестне, яко черпалом златым, от кладезя неископаннаго чудес почерпл еси, от источника неистощимаго, на память успения твоего пришедшим, всеблаженне Петре, ныне всем подаваеши грехов прощение, славо преподобным.

334. Пимену Великому

Тропарь общий, Глас 8:
Слез твоих┘ (см. ╧ 275)
Кондак, Глас 4:
Светлых подвиг твоих, преподобне отче, наста днесь святая память твоя, души благочестивых веселящи, Пимене Богомудре, отче наш преподобне.

335. Роману Сладкопевцу

Тропарь, Глас 3 (творение Регентской школы МДА):
Подвигом поста, молитвы и бдения, глубиною веры и смиренномудрия от юности совлеклся еси ветхаго человека, равноангельному житию уподобився, преподобне Романе Сладкопевче, достоин был еси явления Богородицы, яже повеле ти дивный свиток съести, и тем препода ти дар песнотворения, абие воспел еси, яко ангели небеснии, славу Воплотившемуся из Нея Сыну Божию. Молися за ны ко Господу, даровати всем воспевающим Христа Жизнодавца согласное пение, мир и велию милость.
Кондак, Глас 8:
Божественными добродетельми духа измлада украсився, Романе премудре, Церкви Христове пречестное украшение был еси; пением бо прекрасным украсив ю, блаженне. Тем молим тя: подаждь желающим Божественнаго дарования твоего, яко да вопием ти: радуйся, отче преблаженне, красото церковная.

336. Савватию Соловецкому, чдтв.

Тропарь, Глас 3:
Удалився мира и водворився в пустыню, добрым подвигом подвизался еси, злостраданием и вниманием и молитвами: отонудуже и по смерти источаеши исцеления, Савватие отче наш, моли Христа Бога, спастися душам нашим.
Кондак, Глас 2:
Житейския молвы отбег, вселился еси в морский остров, мудре, и крест твой взем, Христу последовал еси, в молитвах, и во бдениих, и в пощениих злостраданьми плоть твою изнуряя. Тем был еси преподобных удобрение: сего ради любовию память твою празднуем, преподобне Савватие, моли Христа Бога непрестанно о всех нас.

337. Савве Вишерскому

Тропарь, Глас 4:
От юности твоея весь Богу поработился еси, блаженне, и Того ради любве Отечество и род оставил еси, в пустыню вселився, и в ней жестокое житие показав, чудес дарования от Господа приял еси, Савво преподобне: моли Христа Бога, спастися душам нашим.
Кондак, Глас 8:
Отечества преподобне удалився, и вселився в пустыню, и тамо на столп вшед, идеже жестокое житие показал еси, и многих житием удивив, отнюдуже дарование чудес от Христа приял еси. Поминай нас, чествующих память твою, да зовем ти: радуйся, Савво, отче наш.

338. Савве, иг. Сторожевскому, Звенигородскому чдтв.

Тропарь, Глас 8:
Пустыни явился еси доброе прозябение, преподобне: от юности бо изволил еси чистое житие, духовному твоему Учителю последуя, и Того учением ум к небесным вперив, стаду твоему премудр наставник показался еси: темже и Христос, яко пресветла тя светильника, чудесы обогати. Савво, отче наш, моли спастися душам нашим.
Кондак, глас 2:
Господним желанием распалився, страсти плотския воздержанием отряс, Божественнаго света незаходимое светило явился еси, чудес лучами всех просвещаеши притекающих к раце мощей твоих, Савво преподобне отче наш.

339. Савве Освященному

Тропарь общий, Глас 8:
Слез твоих┘ (см. ╧ 275)
Кондак, Глас 8:
Яко от младенства Богу жертва непорочная принеслся еси добродетелию, Савво блаженне, садоделатель быв благочестия. Темже был еси преподобных удобрение, гражданин же пустынный достохвален. Темже зовем ти: радуйся, Савво пребогате.

340. Сампсону Странноприимцу

Тропарь, Глас 8:
В терпении твоем стяжал еси мзду твою, отче преподобне, в молитвах непрестанно терпевый, нищия возлюбивый и сия удовливый, но молися Христу Богу, Сампсоне милостиве блаженне, спастися душам нашим.
Кондак, Глас 8:
Яко врача всеизрядна и молитвенника благоприятна, к раце твоей Божественней притекающе, Сампсоне Богомудре, преподобне, сошедшеся любовию псалмы и песньми радующеся, Христа прославляем, таковую тебе благодать подавающа исцелений.

341. Серафиму Саровскому, чдтв.

Тропарь, Глас 4:
От юности Христа возлюбил еси, блаженне, и Тому единому работати пламенне вожделев, непрестанною молитвою и трудом в пустыни подвизался еси, умиленным же сердцем любовь Христову стяжав, избранник возлюблен Божия Матере явился еси. Сего ради вопием ти: спасай нас молитвами твоими, Серафиме, преподобне отче наш.
Кондак, Глас 2:
Мира красоту и яже в нем тленная оставив, преподобне, в Саровскую обитель вселился еси, и тамо ангельски пожив, многим путь был еси ко спасению: сего ради и Христос тебе, отче Серафиме, прослави и даром исцелений и чудес обогати. Темже вопием ти: радуйся, Серафиме, преподобне отче наш.

342. Сергию, игумену Радонежскому, чдтв.

Тропарь, Глас 4:
Иже добродетелей подвижник, яко истинный воин Христа Бога, на страсти вельми подвизался еси в жизни временней, в пениих, бдениих же и пощениих образ быв твоим учеником; темже и вселися в тя Пресвятый Дух, Егоже действием светло украшен еси. Но яко имея дерзновение ко Святей Троице, поминай стадо, еже собрал еси, мудре, и не забуди, якоже обещался еси, посещая чад твоих, Сергие преподобне, отче наш.
Ин тропарь, Глас 8:
От юности восприял еси Христа в души твоей, преподобне и паче всего вожделел еси мирскаго мятежа уклонитися, мужески в пустыню вселился еси, и чада послушания в ней, плоды смирения возрастил еси. Тем быв Троице вселение, чудесы твоими всех просветил еси приходящих к тебе верою, и исцеления всем подая обильно, отче наш Сергие, моли Христа Бога, да спасет души наша.
Кондак, Глас 8:
Христовою любовию уязвився, преподобне, и Тому невозвратным желанием последовав, всякое наслаждение плотское возненавидел еси, и яко солнце Отечеству твоему возсиял еси; тем и Христос даром чудес обогати тя. Поминай нас чтущих пресветлую память твою, да зовем ти: радуйся, Сергие Богомудре.
Ин кондак, Глас 8:
Днесь яко солнце пресветло, возсиявше от земли честныя мощи твоя нетленны обретошася. Яко благоуханный цвет, множеством чудес сияюще, и всем верным источающе различная исцеления, и веселяще избранное твое стадо, еже мудре собрав и добре паствил еси, о нихже и ныне Троице предстоиши моляся, сего ради вси вопием ти: радуйся, Сергие Богомудре.

343. Сергию и Герману, Валаамским чдтв.

Тропарь, Глас 4:
Евангелиа Христова истиннии послушницы явистеся, преподобнии, мир и вся яже в нем, яко не сущая, преобидевше любве ради Христовы и в морский остров вселистеся, и трудолюбно в нем противу козней невидимых врагов подвизастеся, постом, бдением же и всенощным стоянием плоти своя духу мудру повинули есте: сего ради от Вседержительныя десницы достойныя венцы прияли есте. И ныне Пресвятей Троице предстояще, молитеся, всеблаженнии отцы, Сергие и Германе, спастися душам нашим.
Кондак, Глас 4:
От мирскаго жития изшедше, отвержением мира Христу последовасте, и достигосте великаго Нева езера, и, в нем на острове Валааме всельшеся, равноангельное житие пожили есте, отонудуже, веселящеся, прешли есте к Небесным чертогом. И ныне со Ангелы Владычню Престолу предстояще, поминайте нас, чад своих, яже собрали есте, Богомудрии, да радостно от души вопием: радуйся, Сергие и Германе, отцы преблаженнии.

344. Силуану Афонскому

Тропарь, Глас 4:
Христа Учителя в пути смиренне помолився приял еси свидетельствующу Духу в сердце твоем спасение. Сего ради веселятся ныне людие вси о памяти твоей на упование звании, преподобне отче Силуане, моли Христа Бога спастися душам нашим.
Ин тропарь, Глас 2:
Серафимския любве ко Господу пламенный ревнителю и Иеремии, о народе плачущему, усердный подражателю, всеблаженне отче Силуане, ты зову Матере Господа Сил внемляй, змия греховнаго мужемудренно изрыгнул еси и в Гору Афонскую от суеты мира удалился еси, идеже в трудех и молитвах со слезами благодать Святаго Духа обильно стяжа. Еюже сердца наша воспламени и с тобою умильно взывати укрепи: Господи мой, Жизнь моя и Радосте Святая, спаси мир и нас от всяких лютых.
Кондак, Глас 2:
Смиренномудрия исповедниче предивный, и человеколюбия Духом Святым согреваемая доброто, Богу возлюбленне Силуане, о подвизе твоем Церковь Российская радуется, иноцы же Горы Афонския и вси христианстии людие, веселящеся, сыновнею любовию к Богу устремляются. Егоже моли о нас, равноангельне боговедче, во еже спастися нам, в горении любве тебе подражающим.

345. Симеону Столпнику, архимандриту

Тропарь, Глас 1:
Терпения столп был еси, ревновавый праотцем, преподобне: Иову во страстех, Иосифу во искушениих, и безплотных жительству, сый в телеси, Симеоне отче наш, моли Христа Бога, спастися душам нашим.
Кондак, Глас 2:
Вышних ищяй, вышним совокупляяся, и колесницу огненную столп соделавый: тем собеседник Ангелом был еси, преподобне, с ними Христу Богу моляся непрестанно о всех нас.

346. Сисою Великому

Тропарь, Глас 1:
Пустынный житель, и в телеси Ангел, и чудотворец явился еси, Богоносе отче наш Сисое, постом, бдением, молитвою Небесная дарования приим, исцеляеши недужныя, и души верою притекающих ти. Слава Давшему тебе крепость, слава Венчавшему тя, слава Действующему тобою всем исцеления.
Кондак, Глас 4:
Подвизався, Ангел на земли виден был еси, озаряя, преподобне, помышления верных богознаменьми всегда. Темже тя верою, Сисое, почитаем.

347. Тихону Медынскому, Калужскому чдтв.

Тропарь, Глас 4:
Яко светильник пресветлый явился еси в Российстей земли, преподобне отче Тихоне, в пустыни вселився, в нейже преходя жестокое жительство, яко безплотен пожил еси: сего ради и чудес дарованием обогати тя Бог. Тем и мы, пиртекающе к раце мощей твоих, умильно глаголем: отче преподобне, моли Христа Бога, спастися душам нашим.
Кондак, Глас 8:
Отечества удалився, преподобне, в пустыню вселился еси, идеже жестокое житие твое показал еси и многих добродетельми удивив, дарование чудес от Христа приял еси. Темже поминай нас, чтущих память твою, да зовем ти: радуйся, преподобне Тихоне, отче наш.

348. Феодосию Великому

Тропарь общий, глас 8:
Слез твоих┘ (см. ╧ 275)
Кондак, Глас 8:
Насажден во дворех Господа твоего, преподобными твоими добродетельми красно процвел еси, и умножил еси чада твоя в пустыни, слез твоих тучами напаяемая, стадоначальниче Божий Божественных дворов. Темже зовем: радуйся, отче Феодосие.

349. Феодосию, игумену Киево-Печерскому

Тропарь, Глас 8:
Возвысився на добродетель, измлада возлюбив монашеское житие, к желанию доблественне достиг, вселился еси в пещеру, и украсив житие твое пощением и светлостию, в молитвах яко безплотен пребывал еси, в Российстей земли яко светлое светило просияв, отче Феодосие: моли Христа Бога, спастися душам нашим.
Кондак, Глас 3:
Звезду Российскую днесь почтим, от востока возсиявшую, и на запад пришедшую, всю бо страну сию чудесы и добротою обогатившую, и вся ны содеянием и благодатию монашескаго устава, блаженнаго Феодосия.

350. Феоктисту, игумену Палестинскому

Тропарь общий, Глас 8:
Слез твоих┘ (см. ╧ 275)
Кондак, Глас 4: В постницех присовокупився великому Евфимию, в подвизех, яко Ангел на земли явися, очищая, преподобне, сердца верных Божественными знаменьми повсегда, сего ради любовию, Феоктисте, тя почитаем.

351. Харитону, исповеднику

Тропарь общий, Глас 8:
Слез твоих┘ (см. ╧ 275)
Кондак, Глас 2:
Насладився, Богомудре, воздержания, и плоти твоея вожделения обуздав, явился еси верою возвращаемъ, и яко жизни древо посреде рая процвел еси, Харитоне всеблаженне, священнейший.

Тропари и кондаки исповедникам и праведникам.

352.Исповеднику единому

Тропарь, Глас 8:
Православия наставниче, благочестия учителю и чистоты, вселенныя светильниче, архиереев богодухновенное удобрение, (имярек) премудре, ученьми твоими вся просветил еси, цевнице духовная. Моли Христа Бога спастися душам нашим.
Кондак, Глас 2:
Насладився Богомудре воздержания, и желания плотская ты успил еси, явися верою возвращаемъ, и яко живота древо райское процвел еси, (имярек) отче священный.

353. Безсеребреникам общий

Тропарь, Глас 8:
Святии безсеребреницы и чудотворцы, посетите немощи наша: туне приясте, туне дадите нам.
Кондак, Глас 2:
Благодать приимше исцелений, простираете здравие сущим в нуждах, врачеве, чудотворцы преславнии: но вашим посещением ратников дерзости низложите, мир исцеляюще чудесы.

354. Анне

Тропарь, Глас 4:
Жизнь рождшую во чреве носила еси, Чистую Богоматерь, Богомудрая Анно: темже к приятию небесному, идеже веселящихся жилище, в славе радующися, ныне преставилася еси, чтущим тя любовию прегрешений просящи очищение, присноблаженная.
Кондак, Глас 2:
Прародителей Христовых память празднуем, тех верно просяще помощи, избавитися всем от всякия скорби, зовущим: Бог наш с нами, сих прославлей, якоже благоволи.

355. Зачатию, егда зачат Пресвятую Богородицу

Тропарь, Глас 4:
Днесь безчадия узы разрешаются, Иоакима бо и Анну услышав Бог, паче надежды, родити тем яве обещавает Богоотроковицу, из Неяже Сам родися Неописанный, Человек быв, Ангелом повелев вопити Ей: радуйся, Благодатная, Господь с Тобою.
Кондак, Глас 4:
Празднует днесь вселенная Аннино зачатие, бывшее от Бога: ибо та породи паче слова Слово рождшую.

356. Артемию Веркольскому, отроку

Тропарь, Глас 2:
Вышняго повелением тученосным облаком помрачившим, и молниям блистающим, грому же восшумевшу с прещением, испустил еси душу твою в руце Господеви, премудре Артемие, и ныне предстоиши Престолу Владыки всех, о иже верою и любовию приходящим к раце твоей, подая исцеление всем неотложно, и моляся Христу Богу, спастися душам нашим.
Кондак, Глас 8:
Возсия днесь пресветлая память премудраго Артемия, богоданная благодать яко река изливает от святоцелебныя раки мощей его дивная исцеления, имиже от многоразличных недуг избавляемся, с верою приемлюще я, и взывающе: радуйся, Артемие Богомудре.

357. Евдокиму

Тропарь, Глас 4:
От земли Воззвавый тя к небесным селением, соблюдает и по смерти невредимо тело твое, святе Евдокиме: ты бо в целомудрии и чистом жительстве, блаженне, жительствовал еси, не осквернив плоти. Темже со дерзновением моли Христа Бога спастися нам.
Кондак, Глас 2:
Вышних желая, с вышними совокупляяся, и колесницу огненную, Божественными восхожденьми добродетелей, совершил еси душу, преблаженне Евдокиме, и на земли пожив яко безплотен, Зиждителю всех благоугодил еси.

358. Иоакиму и Анне, Богоотцем:

Тропарь, Глас 2:
Праведных Твоих Иоакима и Анны, Господи, память празднующе, теми молим Тя, спаси души наша.
Ин тропарь, Глас 1:
Иже в законней благодати праведни бывше, младенца Богоданнаго породиша нам Иоаким и Анна. Темже днесь светло торжествует, весело празднующи, Божественная Церковь честную вашу память, славящи Бога, воздвигшаго рог спасения нам в дому Давидове.
Кондак, Глас 2:
Радуется ныне Анна, неплодства разрешившися соуз, и питает Пречистую, созывающи вся воспети Даровавшаго от чрева ея человеком едину Матерь и неискусомужную.

359. Иоанну Кронштадскому, чдтв.

Тропарь, Глас 4:
Со апостолы изыде вещание твое в концы вселенныя, с исповедники страдания за Христа претерпел еси, святителем уподобился еси Слова проповеданием, с преподобными во благодати Божией просиял еси. Сего ради вознесе Господь бездну смирения твоего превыше небес, и дарова нам имя твое во источник предивных чудес. Темже во Христе во веки живый, чудотворче, любовию милуй сущия в бедах, слыши чада твоя, верою тя призывающия, Иоанне праведне, возлюбленный пастырю наш.
Кондак, Глас 6:
Проповедником истины, богоносным отцем подражая, всего себе на служение Богу и ближним вдал еси, и сан священства нося, покоя не ведал еси, службы Божия в храме присно совершая, и в домех верних молебныя пения воспевая, нуждающимся щедро благотворя, тако наименование благотворца и безсеребренника стяжал еси, Иоанне. Темже и по успении твоем российския людие прославляют имя твое, и вечную память тебе возглашающе, поют Богу: аллилуия.

360. Иоанну Русскому, исповеднику

Тропарь, Глас 4:
На небеси предстоя Святей Троице, праведне блаженне Иоанне, земный Ангеле, Божий человече, с бесплотными лики славословиши Любовь Неизреченную, в Церкви первородных со святыми водворяяся, о нас, сущих на земли, возносиши молитвы к Содетелю всех и Спасу, да подаст мир всему миру, Церквам на земли благостояние и соединение всех, чтущих Сына Божия во плоти пришедша, во святем Теле Христа Иисуса, еже есть Церковь Бога Живаго, во спасение рода человеческаго.
Кондак, Глас 4:
Евангельския любве служителя, правды Божия ревнителя, чистоты душевныя и телесныя хранителя, веру Христову исповедавша в страданиих, праведнаго Иоанна ублажаем и почитаем днесь, и житием его назидающеся, поем: радуйся, молитвенниче наш, от Бога прославленный.

361. Иову Многострадальному

Тропарь, Глас 1:
Богатство видев добродетелей Иовлих, украсти кознствоваше праведных враг, и разтерзав столп телесе, сокровище не украде духа, обрете бо вооружену непорочнаго душу, мене же и обнажив плени, предварив убо мя прежде конца, избави мя льстиваго, Спасе, и спаси мя.
Кондак, Глас 8:
Яко истинен и праведен, благочестив и непорочен, освящен же явлься всеславне, Божий угодниче истинный, просветил еси мир в терпении твоем, терпеливейший и доблейший. Темже вси, Богомудре, память твою воспеваем.

362. Иосифу Обручнику, Целомудренному

Тропарь, Глас 2:
Благовествуй, Иосифе, Давиду чудеса богоотцу, Деву видел еси рождшую, с пастырьми славословил еси, с волсви поклонился еси, Ангелом весть прием; моли Христа Бога спасти души наша.

Кондак, Глас 3:
Веселия днесь Давид исполняется Божественный, Иосиф же хваление со Иаковом приносит, венец бо сродством Христовым приемше, радуются и неизреченно на земли Рождшагося воспевают, и вопиют: Щедре, спасай Тебе чтущия.

363. Марфе и Марии, сестрам лазаря

Тропарь, Глас 3:
Праведнаго Лазаря боголюбивыя сестры, Марфо и Марие преславныя, чистым сердцем Христа в житии вашем возлюбили есте, мироносиц вземше чин, и Его, яко Сына Божия, безбоязненно исповедали есте; сего ради ныне во обителех Отца Небеснаго со ангелы и всеми святыми славно царствуете. Умолите, Егоже возлюбили есте, и нам грешным в вере и любви Христове утвердитеся и Царствия Небеснаго сподобитися.
Кондак женам мироносицам, Глас 2:
Радоватися мироносицам┘ ( см. ╧ 68)

364. Семи отрокам Ефесским

Тропарь, Глас 4:
Велия веры чудесе, в пещере, яко в чертозе царском святии седмь отроцы пребыша, и умроша без тли, и по мнозех временех восташа яко от сна, во уверение воскресения всех человеков. Тех молитвами, Христе Боже, помилуй нас.
Кондак, Глас 4:
Мира сущая тленная презревше, и нетленныя дары приемше, умерше кроме тления пребыша. Темже востают по многих летех, все погребше лютых неверие; яже во хвалении днесь вернии восхваляюще, Христа воспоим.

365. Симеону Богоприимцу

Тропарь Сретению Господню, Глас 1:
Радуйся, Благодатная Богородице Дево┘ (см. ╧ 42)
Кондак, Глас 4:
Старец днесь отрешитися от юз, моляшеся, сего жития тленнаго, Христа восприят на руки Зиждителя и Господа.

366. Тавифе

Тропарь, Глас 4:
Днесь вера Христова утверждается каменем веры, и ликовствует в веселии Иоппия, псаломски славословят Жизнодавца Сына Божия вернии, видяще совершаемо велие чудо: первоверховный апостол глаголет, и умершая востает от гроба, юже Низложитель смерти дарует Церкви, да украшаются во образ ея добродетельми людие. Приидите убо, христиане, принесем ко святей моления наша: блаженная Тавифо и милосердная, вознеси наша воздыхания Пресвятей Троице, и молися со дерзновением, да сынове света Превечнаго будем, да сподобимся Божия милости, да пребываем в любви Божественней, и да царствует мир во вселенней.
Кондак, Глас 4:
Ужасахуся Иоппийстии людие, и дивляхуся Ангели Божии, егда Исцеливый Еннея воззва от мертвых серну нарицаемую, милосердием преукрашенную, о нейже к нему взываху вдовицы неимущия. И ныне, Тавифо блаженная, услыши молитвы наша, к тебе приносимыя, и испроси у всяческих благ Подателя милости и щедроты верным Его, да блажаще тя, вопием ти: радуйся, добродетели нас научающая.

Тропари и кондаки Христа ради юродивым.

367. Христа ради юродивому общий

Тропарь, Глас 1:
Глас апостола Твоего Павла услышав глаголющ: мы юроди Христа ради, раб Твой, Христе Боже, (имярек) юрод бысть на земли Тебе ради: темже память его почитающе, Тебе молим Господи, спаси души наша.
Кондак, Глас 8:
Вышния красоты желая, и нижния сласти телесныя тощно оставил еси, нестяжанием суетнаго мира, ангельское житие проходя, скончався, (имярек) блаженне: с нимиже Христа Бога моли непрестанно о всех нас.

368. Василию блаженному, Московскому чдтв.

Тропарь, Глас 8:
Житие твое Василие неложное и чистота нескверна, Христа ради тело твое изнурил еси постом и бдением, и мразом и теплотою солнечную, и слотою, и дождевным облаком, и просветися лице твое, яко солнце. И ныне приходят к тебе российстии народи и вси людие, прославляюще святое твое успение. Тем Христа Бога моли, да избавит ны от варварскаго пленения и междоусобныя брани, и мир мирови подаст, и душам нашим велию милость.
Кондак, Глас 4:
Духом Божиим водимъ, преблаженне Василие, отрясл еси мирский мятеж, и жития треволнения возгнушался еси, и совлекся одеяний тленных, и облекся в ризу бесстрастия, убежал еси ловления льстиваго миродержца, и был еси странен во твоем языце, и паче земнаго богатства избрав богатство небесное, увязлся еси венцем терпения, и ныне, преблаженне Василие, моли Христа Бога о творящих святую память твою, да зовем ти: радуйся, преблаженне Василие.

369. Иоанну блаженному, Устюжскому чдтв.

Тропарь, Глас 5:
Нагатою телесною и терпением обнажил еси вражия коварствия, обличая неподобное его деяние, зельне стражда солнечный вар, и нуждныя великия студени мраза, и огня не чул еси, Божиею помощию покрываемъ, Иоанне премудре: моли о верою творящих память твою честно и усердно притекающих к раце мощей твоих, избавитися от бед и нападения избежати.
Кондак, Глас 8:
Вышния красоты желая, нижния сладости телесное ядение тщательно оставил еси, нестяжанием суетнаго мира, возлюбил еси ангельское житие, преходя скончався, Иоанне блаженне; с нимиже моли Христа Бога непрестанно о всех нас.

370. Исидору Блаженному, Ростовскому чдтв.

Тропарь, Глас 4:
Просветився Божественною благодатию, Богомудре, целомудрием многим и терпением во временней жизни течение добре скончал еси, тем и по смерти яви тя светлость жития твоего, источаеши бо исцелений благодать, иже с верою притекающим ко святому твоему гробу, Исидоре блаженне. Моли Христа Бога, да спасет души наша.
Кондак, Глас 8:
Взбранному и дивному в праведницех, иже убо от Христа дар чудес приимшему, похвальныя ныне принесем глаголы, но яко имея дерзновение ко Святей Троице, Юже моли избавитися от бед рабом твоим, да зовем ти: радуйся, Богомудре Исидоре.

371. Ксении Петербуржской, блаженной

Тропарь, Глас 7:
Нищету Христову возлюбивши, безсмертныя трапезы ныне наслаждаешися, безумием мнимым безумие мира обличивши, смирением крестным силу Божию восприяла еси. Сего ради дар чудодейственныя помощи стяжавшая, Ксение блаженная, моли Христа Бога избавитися нам от всякаго зла покаянием.
Кондак, Глас 3:
На земли яко странна пребывши, о небеснем же отечествии воздыхающи, юрода от буйих и неверных, премудра же и свята от верных познаваешися, и от Бога славою и честию венчаешися, Ксение мужеумная и богоумная, сего ради зовем ти: радуйся, яко по странствии земнем в дому Отчем водворяешися.

372. Максиму блаженному, Московскому чдтв.

Тропарь, Глас 5:
Наготою телесною и терпением обнажил еси вражия коварствия, обличая неподобное его деяние: зельне стражда солнечный вар и нуждныя великия студени, мраза и огня не чул еси, Божиею помощию покрываемъ, Максиме премудре. О верою творящих память твою честно, и усердно притекающих к раце мощей твоих, моли избавитися от бед и нападения избежати.
Кондак, Глас 2:
Вышния красоты желая, нижния сладости и телесная одеяния в ничтоже вменил еси, и нестяжание паче суетнаго мира возлюбил еси, ангельское житие проходя скончался еси, блаженне Максиме. С нимиже Христа моли непрестанно о всех нас.

373. Матроне блаженной, Московской чдтв.

Тропарь, Глас 4:
Земли Тульския прозябение, града Москвы ангелоподобная воительнице блаженная старице Матроно, от рождения в слепоте телесней до конца своих дней пребывшая, но от Бога щедро духовное зрение приявшая, прозорливице и молитвеннице, наипаче дар исцеления болезней стяжавшая. Помогай всем, с верою к тебе притекающим, и просящим в болезнех душевных и телесных, радосте наша.
Кондак, Глас 3:
Еще дышит святостью многострадальная Россия, земля Русская, яко осьмый столп плодоносит, тако тебе, блаженная мати Матроно, праведный пастырь Иоанн Кронштадтский возносит, ты явилася еси дивное излияние Святаго Духа, и борясь за каждую приходящую к тебе душу, претерпела еси множество гонений и страданий, и по преставлении не оставляеши в болезнех и скорбех сущих.

374. Прокопию блаженному, Устюжскому чдтв.

Тропарь, Глас 4:
Просветився Божественною благодатию, Богомудре, и весь разум и сердце от суетнаго мира сего к Зиждителю неуклонно возложив, целомудрием и многим терпением, во временней жизни течение добре скончал еси, веру соблюл еси непорочну. Темже и по смерти явися светлость жития твоего: источаеши бо чудес источник неисчерпаемый, верою притекающим ко святому твоему гробу, Прокопие всеблаженне, моли Христа Бога, да спасет души наша.
Кондак, Глас 4:
Христа ради юродством воздушная мытарства на руках ангельских неприкосновенно прешед, Царскаго достигл еси Престола, и от Царя всех Христа Бога дар прием, благодать исцелений: многими бо чудесы твоими и знамением страшным удивил еси град твой, великий Устюг. Людем твоим милость испросив, миро от честнаго образа Пресвятыя Богородицы молитвою извел еси, и недужным подал еси цельбы. Темже молим тя, чудоносче Прокопие, моли Христа Бога непрестанно, подати грехов наших прощение.